བོད་ལྗོངས་སློབ་གྲྭ་ཆེན་མོ་ནི་སྤྱི་ལོ1951ལོར་ལས་བྱེད་པའི་བོད་ཡིག་གསོ་སྦྱོང་འཛིན་གྲྭ་བཙུགས་པ་ནས་བཟུང་ཐོག་མའི་རྣམ་པ་ཆགས་པ་ཡིན་ཞིང་། དེའི་རྗེས་བོད་ལྗོངས་དམག་ཁུལ་གྱི་ལས་བྱེད་པའི་སློབ་གྲྭ་དང་། བོད་ལྗོངས་ས་གནས་ལས་བྱེད་པའི་སློབ་གྲྭ། བོད་ལྗོངས་སྲིད་འཛིན་ལས་བྱེད་པའི་སློབ་གྲྭ། བོད་ལྗོངས་དགེ་ཐོན་སློབ་གྲྭ། བོད་ལྗོངས་དགེ་ཐོན་སློབ་གླིང་སོགས་འཕེལ་རྒྱས་ཀྱི་རིམ་པ་དུ་མ་བརྒྱུད་མཐར།1985ལོའི་ཟླ7པར་བོད་ལྗོངས་སློབ་ཆེན་དངོས་སུ་བཙུགས། 1999ལོ་ནས་བཟུང་བོད་རང་སྐྱོང་ལྗོངས་སྒྱུ་རྩལ་སློབ་གྲྭ་དང་། བོད་ལྗོངས་གསོ་རིག་ཆེད་ཚན་སློབ་གྲྭ། བོད་ལྗོངས་མི་རིགས་སློབ་གླིང་སྨན་བཅོས་ཚན་ཁག བོད་རང་སྐྱོང་ལྗོངས་ནོར་སྲིད་དཔལ་འབྱོར་སློབ་གྲྭ་བཅས་སྔ་གཞུག་ཏུ་བོད་ལྗོངས་སློབ་ཆེན་གྱི་ཁོངས་སུ་བསྡུས་ཤིང་། 2008ལོའི་ཟླ12བར་བོད་ལྗོངས་སློབ་ཆེན་རྒྱལ་ཁབ་ཀྱི“211ལས་གྲྭའི”འཛུགས་སྐྲུན་སློབ་ཆེན་གཙོ་བོའི་གྲས་སུ་བཞག་པ་རེད།