ཤིན་ཧྭ་དྲ་བའི་བོད་ཡིག་འཕྲིན་ལམ་དུ་གནས་ཚུལ་འབྱོར་གསལ།ཉེ་བའི་ལོ་ཤས་ནང་བོད་རང་སྐྱོང་ལྗོངས་ཀྱིས་སྲིད་ཇུས་ཧུར་ཐག་བཏོན་པ་དང་མ་དངུལ་འབོར་ཆེན་བཏང་སྟེ་ཕུལ་བྱུང་རིག་གནས་གསར་རྩོམ་བྱ་རྒྱུར་སྐུལ་མ་བཏང་བས་བོད་ཀྱི་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་བར་སྐུལ་འདེད་ཤུགས་ཆེན་ཐེབས་པ་རེད།
2011ལོའི་ལོ་མཇུག་ཏུ་བོད་རང་སྐྱོང་ལྗོངས་ཏང་ཨུ་དྲིལ་བསྒྲགས་པུའུ་དང་བོད་རང་སྐྱོང་ལྗོངས་ནོར་སྲིད་ཐིང་གིས་《བོད་རང་སྐྱོང་ལྗོངས་ཀྱི་རིག་རྩལ་གསར་རྩོམ་ལ་རོགས་སྐྱོར་དང་བྱ་དགའ་སྤྲོད་པའི་གནས་སྐབས་ལག་བསྟར་བྱ་ཐབས》ཞིབ་འཇུག་བྱས་ཐོག་གཏན་འཁེལ་བྱས་ནས་རྩོམ་རིག་དང་།ཁྲང་ཞི།རླུང་འཕྲིན་དང་གློག་བརྙན་དང་བརྙན་འཕྲིན་འཁྲབ་ཚན།རོལ་དབྱངས།ཞབས་བྲོ།མཛེས་རིས།པར་རྒྱག་ཡིག་གཟུགས།གཞས་མ་གཏམ།རྩལ་རྩེད།དམངས་ཁྲོད་སྒྱུ་རྩལ་སོགས་སྒྱུ་རྩལ་སྣ་ཁར་རོགས་སྐྱོར་དང་བྱ་དགའ་སྤྲོད་རྒྱུ་ཡིན་པ་རེད།
ཤེས་རྟོགས་བྱུང་བར་གཞིགས་ན།རོགས་སྐྱོར་དང་བྱ་དགའ་སྤྲོད་ཡུལ་ནང་བོད་རང་སྐྱོང་ལྗོངས་ཀྱི་རིམ་ཁག་དང་རིགས་ཁག་གི་ཚན་པ་（ཚོགས་པ）དང་མི་སྒེར་གྱིས་གསར་རྩོམ་བརྩམས་ཆོས་བཏོན་པའམ་ཡང་ན་མ་དངུལ་བཏང་ནས་བཟོས་པའི་ཐོག་མའི་རིག་རྩལ་བརྩམས་ཆོས་རྩེར་སོན་དང་དངོས་ཡོད་ཀྱི་ནང་དོན་ལྡན་པའི་གསར་རྩོམ་གྱི་བརྩམས་ཆོས་རྩེར་སོན་དང་།ལྗོངས་ཕྱིའི་རིམ་ཁག་དང་རིགས་ཁག་གི་ཚན་པ་（ཚོགས་པ）དང་མི་སྒེར་གྱིས་གསར་རྩོམ་བྱས་པའི་བརྩམས་ཆོས་བཏོན་པའམ་ཡང་ན་མ་དངུལ་བཏང་ནས་བཟོས་པ་མ་ཟད།ད་དུང་བོད་ཀྱི་ནང་དོན་མཚོན་པར་བྱས་པའི་ཐོག་མའི་གསར་རྩོམ་གྱི་རིག་རྩལ་བརྩམས་ཆོས་རྩེར་སོན་དང་དངོས་ཡོད་ནང་དོན་གལ་ཆེན་ལྡན་པའི་གསར་རྩོམ་གྱི་བརྩམས་ཆོས་རྩེར་སོན།བོད་ཀྱི་ས་ཁོངས་ནས་ཡིན་པའམ་ཡང་ན་བོད་ཀྱི་ཚབ་བྱས་ཏེ་རྒྱལ་སྤྱིའི་རང་བཞིན་དང་རྒྱལ་ཡོངས་རང་བཞིན་གྱི་རིག་རྩལ་བྱེད་སྒོ་ཆེ་གྲས་ནང་ཞུགས་མཁན་ཚོགས་པ་དང་མི་སྒེར་བཅས་ཚུད་ཡོད་པ་རེད།
གསར་འགོད་པས་རང་སྐྱོང་ལྗོངས་ནོར་སྲིད་ཐིང་ནས་ཤེས་རྟོགས་བྱས་པར་གཞིགས་ན།འདི་ལོ་རང་སྐྱོང་ལྗོངས་ནོར་སྲིད་ཀྱིས་འཕེལ་ཕྱོགས་གཙོ་བོའི་རིག་གནས་གསར་རྩོམ་གྱི་ཆེད་དངུལ་སྒོར་ཁྲི1000བཀོད་སྒྲིག་བྱ་རྒྱུའི་ནང་རོགས་སྐྱོར་གྱི་ཚད་གཞི་མཐོ་ཤོས་ནི་རྩོམ་རིག་གི་བརྩམས་ཆོས་ཡིན་པར་སྒོར་ཁྲི10དང་།ཁྲང་ཞི་དང་རླུང་འཕྲིན་ལེ་ཚན་ལ་སྒོར་ཁྲི20གློག་བརྙན་དང་བརྙན་འཕྲིན་འཁྲབ་ཚན（འགུལ་བརྙན）ལ་སྒོར་ཁྲི་150སྤྱི་ཚོགས་ཐོག་ཤུགས་རྐྱེན་ཆེན་པོ་ཐེབས་རེ་ཡོད་པའམ་ཡང་ན་ཁྲོམ་རའི་མངོན་མིན་སྟོབས་ཤུགས་ཆེ་ཙམ་ལྡན་པའི་རོལ་དབྱངས་དང་།ཞབས་བྲོ།གཏམ་བརྗོད་ཟློས་གར་བཅས་ཆེ་གྲས་ལ་སྒོར་ཁྲི30གཏོང་རྒྱུ་དང་།
ཁྲང་ཞི་དང་རླུང་འཕྲིན་ལེ་ཚན་དེ་དག་ཀྲུང་དབྱང་བརྙན་འཕྲིན་ལས་ཁུངས་དང་ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་ནས་སྟོན་པར་རོགས་སྐྱོར་མ་དངུལ་སྒོར་ཁྲི6མང་དུ་གཏོང་རྒྱུ་དང་།བོད་ལྗོངས་བརྙན་འཕྲིན་ལས་ཁུངས་དང་བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ནས་སྟོན་པར་རོགས་སྐྱོར་མ་དངུལ་སྒོར་ཁྲི3མང་དུ་གཏོང་རྒྱུ།གློག་བརྙན་དང་བརྙན་འཕྲིན་འཁྲབ་ཚན་ཀྲུང་དབྱང་བརྙན་འཕྲིན་ལས་ཁུངས་ནས་སྟོན་པར་རོགས་སྐྱོར་མ་དངུལ་སྒོར་ཁྲི30མང་དུ་གཏོང་རྒྱུ་དང་བོད་ལྗོངས་བརྙན་འཕྲིན་ལས་ཁུངས་ནས་སྟོན་པར་རོགས་སྐྱོར་མ་དངུལ་སྒོར་ཁྲི10མང་དུ་གཏོང་རྒྱུ་བཅས་ཡིན་པ་རེད།
 རྒྱལ་ཡོངས་རང་བཞིན་གྱི་རྒྱུན་བཙུགས་རིག་རྩལ་བྱ་དགའ་ཐོབ་པའི་བརྩམས་ཆོས་ལ་བྱ་དགའི་དངུལ་ཐོབ་གྲངས་ལྟར་བྱ་དགའ་ལྡབ་གསུམ་སྤྲོད་རྒྱུ་དང་།རྩོམ་རིག་བརྩམས་ཆོས་རྒྱལ་ཡོངས་ཀྱི་རིགས་གཅིག་མཚུངས་ཀྱི་དཔེ་དེབ་ཕྱིར་ཚོང་གི་རིམ་ཐོའི་མདུན་གྱི་བཅུ་པར་སླེབས་མཁན་ལ་བྱ་དགའ་སྒོར་ཁྲི5སྤྲོད་རྒྱུ།རང་སྐྱོང་ལྗོངས་ཀྱི་བསམ་པའི་དཔལ་ཡོན་སྲོལ་གཏོད་ཀྱི་“གཅིག་རེ་ལྔའི་ལས་གཞིའི”བྱ་དགའ་ཐོབ་པའི་གློག་བརྙན་དང་བརྙན་འཕྲིན་འཁྲབ་ཚན་ལ་བྱ་དགའ་སྒོར་ཁྲི་50སྤྲོད་རྒྱུ།ཁྲང་ཞིར་བྱ་དགའ་སྒོར་ཁྲི30སྤྲོད་རྒྱུ།བརྙན་འཕྲིན་ཆེད་དོན་འཁྲབ་ཚན་ལ་བྱ་དགའ་སྒོར་ཁྲི20སྤྲོད་རྒྱུ།རླུང་འཕྲིན་ལེ་ཚན་དང་རྩོམ་རིག་རིགས་ཀྱི་དཔེ་དེབ་ལ་བྱ་དགའ་སྒོར་ཁྲི10སྤྲོད་རྒྱུ།གླུ་གཞས་དང་།འཁྲབ་ཚན་ཐུང་ངུ་།ཞབས་བྲོ་བཅས་ལ་བྱ་དགའ་ཁྲི་5སྤྲོད་རྒྱུ།“ཇོ་རིའི་རྩོམ་རིག་སྒྱུ་རྩལ་བྱ་དགའ་”དང་།“ཚེ་བརྟན་སྒྲོལ་མའི་སྒྱུ་རྩལ་ཐེབས་རྩའི་བྱ་དགའ་”ཐོབ་པའི་བརྩམས་ཆོས་ལ་བྱ་དགའ་སྒོར་ཁྲི་3སྤྲོད་རྒྱུ་བཅས་ཡིན་པ་རེད།