ཞིན་ཧྭ་གསར་འགྱུར་ཁང་ཟི་ལིང་ནས་ཟླ་བ3པའི་ཚེས12ཉིན་འབྱོར་བའི་གཏམ་གསར།མཚོ་སྔོན་ཞིང་ཆེན་སློབ་གསོ་ཐིང་གི་ཐིང་ཀྲང་གཞོན་པ་ཀྲའོ་ཧའེ་ཕིང་གིས་ངོ་སྤྲོད་བྱས་པར་ལྟར་ན།མཚོ་སྔོན་ཞིང་ཆེན་ས་གནས་ཁག་དང་ལྷག་པར་དུ་འབྲོག་ཁུལ་གྱི་ཞག་སྡོད་སློབ་མའི་མི་གྲངས་ཇེ་མང་དུ་སོང་བའི་དངོས་ཡོད་གནས་ཚུལ་ལ་གཞིགས་ནས།མཚོ་སྔོན་ཞིང་ཆེན་གྱིས་ད་ལོའི་དཔྱིད་དུས་སློབ་འགོ་ཚུགས་པ་ནས་བཟུང་སློབ་གསོའི་ཆགས་ཚུལ་ལེགས་སྒྲིག་བྱས་རྗེས་འཕར་སྣོན་བྱུང་བའི་ཞིང་འབྲོག་ཁུལ་གྱི་ཞག་སྡོད་སློབ་མ་ཁྲི6.6འཚོ་བའི་གསབ་དངུལ་སྤྲད་རྒྱུའི་ཁྱབ་ཁོངས་སུ་འཇུག་པ་མ་ཚད་ཞག་སྡོད་སློབ་མའི་འཚོ་བའི་གསབ་དངུལ་གྱི་ཚད་གཞི་མཐོ་འདེགས་ཆེན་པོ་གཏོང་བའི་ཐག་བཅད་བྱས་པ་རེད།དེའི་ནང་དུ་གྲངས་ཉུང་མི་རིགས་རང་སྐྱོང་ཁུལ6གི་སློབ་གྲྭ་འབྲིང་ཆུང་གི་སློབ་མ་རེར་ལོ་རེར་སྒོར200དང་།ཟི་ལིང་དང་ཧེ་ཏུང་ས་ཁུལ་གྱི་སློབ་ཆུང་སློབ་མ་རེར་ལོ་རེར་སྒོར200སློབ་འབྲིང་སློབ་མ་རེར་ལོ་རེར་སྒོར250བཅས་ཡར་སྤར་བ་དང་།རང་སྐྱོང་བོད་ཁུལ6ལ་དུས་མཚུངས་སུ་རྨ་འབྲི་རྫ་གསུམ་འབྱུང་ཡུལ་གྱི་སྐྱེ་ཁམས་སྐྱིན་གསབ་ནང་རྐྱེན་ལག་ལེན་བཏང་ནས་སློབ་མ་རེར་ལོ་རེར་འཚོ་བའི་གསབ་དངུལ་སྒོར100འཕར་སྣོན་གཏོང་རྒྱུ་རེད།
གུང་ཧའོ་རྫོང་གི་མི་རིགས་ཞག་སྡོད་ལམ་ལུགས་སློབ་ཆུང་དང་པོའི་སློབ་གཙོ་གཞོན་པ་ཚེ་རིང་དོན་འགྲུབ་ཀྱིས་ངོ་སྤྲོད་བྱེད་པར་ལྟར་ན།མཐོ་འདེགས་གཏོང་བའི་འཚོ་དངུལ་གཙོ་བོ་སློབ་མའི་ཟ་རྒྱུ་དང་སྡོད་ཁང་གི་ཆ་རྐྱེན་ལེགས་བཅོས་བྱེད་ཡས་སུ་བེད་སྤྱོད་བྱ་རྒྱུ་རེད།ཤེས་རྟོགས་བྱུང་བར་གཞིགས་ན།མཚོ་སྔོན་གྱིས་ད་དུང་ཀྲུང་དབྱང་དང་ཞིང་ཆེན་རིམ་པའི་ནོར་སྲིད་མ་དངུལ་གཅིག་གྱུར་འཆར་འགོད་བྱས་ཏེ་ཞིང་ཆེན་ཡོངས་ཀྱི་ས་གནས་སོ་སོའི་འཚོ་བའི་ཆུ་ཚད་དང་།ཟོང་གོང་འགྱུར་ལྡོགཞིང་འབྲོག་དུད་ཚང་གི་ཡོང་སྒོ་བཅས་ཀྱི་དངོས་ཡོད་གནས་ཚུལ་ལ་བརྟེན་ནས་རིམ་པར་ཞག་སྡོད་སློབ་མའི་འཚོ་དངུལ་ཐད་ཀྱི་འབྲེལ་ཡོད་འགན་སྲུང་བྱེད་ཐབས་གསལ་པོར་བཟོས་ནས་ཞག་སྡོད་སློབ་མ་བདེ་ཐང་ངང་འཚར་ལོངས་འབྱུང་བར་ཁག་ཐེག་བྱ་རྒྱུ་རེད།