ཟླ་4པའི་ཚེས་8ཉིན། ཀྲུང་གོ་དང་འཇར་པན་ཧན་ཀོ་གསུམ་གྱི་ཕྱི་འབྲེལ་པུའུ་ཀྲང་གི་གྲོས་ཚོགས་ཀྲེ་ཅང་ཉིན་པོ་ནས་ཚོགས། ཀྲུང་འཇར་ཧན་གསུམ་གྱི་ཕྱི་འབྲེལ་པུའུ་ཀྲང་གིས་རྒྱལ་ཁབ་གསུམ་གྱི་མཉམ་ལས་འཕེལ་རིམ་དང་མ་འོངས་པའི་ཁ་ཕྱོགས། ཀྲུང་འཇར་ཧན་གསུམ་གྱི་མགོ་ཁྲིད་པའི་གྲོས་ཚོགས་ཐེངས་ལྔ་བའི་གྲ་སྒྲིག་དང་དེ་མིན་མཉམ་དུ་སེམས་ཁུར་བྱེད་པའི་ས་ཁུལ་དང་རྒྱལ་སྤྱིའི་གནད་དོན་ཐད་ལ་བསམ་འཆར་བརྗེ་རེད་བྱས།
ཕྱོགས་གསུམ་གྱིས་རྒྱལ་ཁབ་གསུམ་གྱི་མཉམ་ལས་བྱེད་པའི་སྐོར་ལ་གྲོས་མོལ་བྱས་ཏེ་དཔལ་འབྱོར་ཉོ་ཚོང་དང་དངུལ་རྩ། ནུས་ཁུངས་གྲོན་ཆུང་། ཁོར་ཡུག་སྲུང་སྐྱོང་། གནམ་གཤིས། གནོད་འགོག་རྒུད་སྐྱོབ་སོགས་ཁྱབ་ཁོངས་སུ་མཉམ་ལས་བྱེད་པར་ཤུགས་བསྣན་ནས་ཀྲུང་འཇར་ཧན་གསུམ་གྱི་དངུལ་གཏོང་གྲོས་མོལ་ལ་གང་མགྱོགས་ཀྱིས་མིང་རྟགས་འགོད་པ་དང་རང་དབང་ཉོ་ཚོང་ཁུལ་གྲོས་མོལ་སྔ་མོ་ནས་མགོ་བརྩོམ་རྒྱུ་དང་ཀྲུང་འཇར་ཧན་གསུམ་གྱི་འཁོར་བསྐྱོད་དཔལ་འབྱོར་དཔེ་སྟོན་རྟེན་གཞི་འཛུགས་སྐྲུན་ཇེ་མགྱོགས་སུ་གཏོང་བ་དང་བརྗེ་རེས་དང་ཕྱི་འབྲེལ་བྱ་འགུལ་ཧུར་ཐག་སྤེལ་འདོད་ཡོད་ཟེར།
ཀྲུང་གོའི་ཕྱི་འབྲེལ་པུའུ་ཀྲང་ཡང་ཅེ་ཁྲི་ཡིས་བཤད་རྒྱུར། ང་ཚོས་ཕན་ཡོད་ཀྱི་བྱེད་ཐབས་སྔར་ལས་མང་པོ་སྤྱད་དེ་ཆབ་སྲིད་ཐད་ནས་ཕན་ཚུན་ཡིད་ཆེས་སྔར་ལས་ཇེ་ཟབ་བཏང་ནས་མཉམ་ལས་ཟབ་སྤེལ་དང་སྤྱི་ཚོགས་དང་རིག་གནས་སྤེལ་རེས་རྒྱ་བསྐྱེད་དེ་རྒྱལ་ཁབ་གསུམ་གྱིས་མ་འོངས་པར་ཁ་ཕྱོགས་པའི་ཕྱོགས་ཡོངས་ནས་མཉམ་ལས་བྱེད་པའི་གྲོགས་པོའི་འབྲེལ་བ་ཇེ་ཟབ་ཏུ་གཏོང་བར་འཐད་པ་ཡིན་ཟེར།
རྒྱལ་ཁབ་གསུམ་གྱི་ཕྱི་འབྲེལ་པུའུ་ཀྲང་གིས་བསྟན་དོན། སྟོབས་ཤུགས་ཡོད་ཚད་བཏོན་ནས་མཉམ་འབྲེལ་བྱས་ཏེ་ད་ལོར་ཀྲུང་གོ་ནས་བསྡུ་བའི་ཀྲུང་འཇར་ཧན་གསུམ་གྱི་མགོ་ཁྲིད་པའི་གྲོས་ཚོགས་ཐེངས་ལྔ་པར་གྲུབ་འབྲས་ཕུན་སུམ་ཚོགས་པ་ཞིག་ལོན་པར་སྐུལ་འདེད་བྱེད་རྒྱུ་ཡིན་ཞེས་བསྟན།
གཞན་ད་རུང་ཨེ་ཤ་ཡའི་བྱང་ཤར་གནས་བབ་དང་ཨེ་ཤ་ཡ་ཤར་མའི་མཉམ་ལས། གནས་གཤིས་འགྱུར་ལྡོག ཉིང་རྡུལ་བདེ་འཇགས། དེ་མིན་རྒྱལ་སྤྱིའི་དཔལ་འབྱོར་གནས་བབ་སོགས་མཉམ་དུ་སེམས་ཁུར་བྱེད་པའི་ས་ཁུལ་དང་རྒྱལ་སྤྱིའི་གནད་དོན་ཐད་ལ་རྒྱལ་ཁབ་གསུམ་གྱི་ཕྱི་འབྲེལ་པུའུ་ཀྲང་གིས་ལྟ་ཚུལ་བརྗེ་རེས་བྱས།