ཟླ6པའི་ཚེས3ཉིན་གྱི་སྔ་དྲོ། བོད་ཀྱི་རི་མོ་བ་གསེར་བྲག་དོན་གྲུབ་ཚེ་བརྟན་ལགས་ཀྱི་འབོད་སྐུལ་དང་མཚོ་སྔོན་བོད་རིགས་ཞིབ་འཇུག་ཚོགས་པས་གཙོ་སྒྲུབ་གནང་པའི་བོད་ཀྱི་ལྷ་རིས་སྒྱུ་རྩལ་པ་ཆེན་མོ་ཨ་མདོ་བྱམས་པ་མཆོག་སྐུ་གཤེགས་ནས་ལོ་འཁོར་བཅུ་འདས་པའི་རྗེས་དྲན་མཛད་སྒོ་གནའ་མཁར་ཟི་ལིང་དུ་གཟབ་རྒྱས་ངང་ཚོགས། ཐེངས་འདིའི་རྗེས་དྲན་མཛད་སྒོའི་སྟེང་དུ་མཚོ་སྔོན་ཞིང་ཆེན་གྱི་འབྲེལ་ཡོད་འགོ་ཁྲིད་དང་བོད་རིགས་ཆེད་ལས་མཁས་པ། བོད་ཀྱི་རི་མོ་སྒྱུ་རྩལ་ལ་མོས་འདུན་ཆེ་ཞིང་ལྷ་རིས་སྒྱུ་རྩལ་གྱི་ལས་ལ་འབད་བཞིན་པའི་ལས་རིགས་སོ་སོའི་མི་སྣ་བཅས་ཞུགས་ཡོད་ཅིང་། དེ་མིན། མཚོ་སྔོན་རྒྱང་སྒྲོག་བརྙན་འཕྲིན་ཁང་དང་མཚོ་སྔོན་ཉིན་རེའི་ཚགས་པར་ཁང་། ཀྲུང་གོ་བོད་ཀྱི་དྲ་བ་སོགས་གཙོ་བྱས་པའི་གསར་འགྱུར་སྨྱན་བྱད་ཁག་ཀྱང་ཞུགས་ཡོད།

  རྗེས་དྲན་ཚོགས་འདུའི་བྱེད་སྒོ་དེ་ཟླ་འདིའི་ཚེས11ཉིན་བར་དུ། སློབ་རའི་མུ་འབྲེལ་གཏམ་བཤད་དང་། བོད་ཀྱི་རི་མོ་འགྲེམ་སྟོན། ལྡེབས་རིས་ལྟ་སྐོར། རྗེས་དྲན་དུས་དེབ་སོགས་རྣམ་པ་གང་མང་གི་སྒོ་ནས་སྤེལ་རྒྱུ་ཡིན་ལ། བྱ་འགུལ་འདི་སྤེལ་བ་བརྒྱུད་དེ། བོད་ཀྱི་རི་མོ་སྒྱུ་རྩལ་ལོ་རྒྱུས་ཀྱི་དུས་རབས་གསར་དུ་བསྐྲུན་པའི་དམ་པ་ཁོང་ལ་རྗེས་དྲན་དང་། ཁོང་ཉིད་ཀྱི་གསར་རྩོམ་རིག་སྟོབས་དང་གསོན་ཤུགས་མ་ཉམས་གོང་སྤེལ་ཡོང་ཞིང་། བོད་ཀྱི་རི་མོའི་མཚོན་སྟངས་དང་པུར་རྩལ་ཇེ་ལེགས་བཏང་སྟེ། བོད་མི་རིགས་ཀྱི་དེང་རབས་རི་མོའི་སྒྱུ་རྩལ་འཕྲིན་ལས་དར་འཕེལ་ཡོང་བ་བཅས་ཀྱི་ཐད་ཕན་འབྲས་ཆེན་པོ་ཐོན་ཐུབ་ངེས་རེད།

བོད་ཀྱི་ལྷ་རིས་སྒྱུ་རྩལ་པ་ཆེན་མོ་ཨ་མདོ་བྱམས་པ།

བོད་ཀྱི་རི་མོ་སྒྱུ་རྩལ་པ་ཆེན་མོ་ཨ་མདོ་བྱམས་པ་ནི་སྤྱི་ལོ1914ལོར་མདོ་སྨད་གཅན་ཚར་འཁྲུངས། ཆུང་དུས་སུ་ངང་རུང་དགོན་པར་ཞུགས་ནས་རབ་ཏུ་བྱུང༌། སྐབས་དེ་ནས་བཟུང་དགོན་པའི་ལྡེབས་རིས་དང་ལྷ་སྐུ་དག་ལ་བརྟེན་ཏེ་བོད་ཀྱི་སྲོལ་རྒྱུན་རི་མོ་རང་སྦྱོང་བྱས། སྔ་རྗེས་སུལ་མོ་བདེ་ཆེན་དང་། བླ་བྲང་བཀྲ་ཤིས་འཁྱིལ་དང་འབྲས་སྤུངས་དགོན་པའི་ཆོས་གྲྭར་ཞུགས། 1955ལོ་ནས་ཕོ་བྲང་པོ་ཏ་ལར་རི་མོ་བའི་འགན་བཞེས། 1956ལོར་ནོར་བུ་གླིང་གའི་མི་འགྱུར་རྟག་བརྟན་ཕོ་བྲང་ནང་ལྡེབས་རིས་བཞེངས། སྟོན་པས་ཆོས་འཁོར་བསྐོར་བ་དང་། ཁམས་གསུམ་ཟིལ་མནོན་སོགས་ཕྱག་བྲིས་གནང༌། 1981ལོར་རིག་རྫས་དོ་དམ་ཨུ་ཡོན་ལྷན་ཁང་དུ་ཕྱག་ལས་གནང་ཞིང༌། བོད་རང་སྐྱོང་ལྗོངས་མཛེས་རྩལ་ལྷན་ཚོགས་ཀྱི་ཀྲུའུ་ཞི་སྐབས་དང་པོའི་འགན་བཞེས། རྗེས་སུ་མཚན་འཛིན་ཀྲུའུ་ཞི་གནང་། 1981ལོར་རྒྱ་གར་ནས《བོད་ཀྱི་བཙན་པོ་རྣམ་གསུམ》ཞེས་པའི་རི་མོ་ཕྱག་བྲིས་གནང1999ལོར་ལྷ་སའི་ཨ་མདོ་བྱམས་པའི་སྒེར་བཙུགས་མཛེས་རྩལ་སློབ་གྲྭ་གསར་དུ་བཙུགས་པ་དང༌། 2002ལོའི་ཟླ3པའི་ཚེས28ཉིན་སྐུ་གཤེགས།

ཁོང་གི་རི་མོ་དག་ལས་བོད་ཀྱི་ཆོས་ལུགས། ཁོར་ཡུག མི་སྣའི་ལས་དབང་བཅས་མངོན་སུམ་དུ་ཚོར་ཐུབ་ཅིང་། བོད་ཀྱི་པིས་ཅའ་སའོ་ཞེས་པའི་མཚན་སྙན་ལྡན།