ས་གནས་སོ་སོ་ནས་ཡོང་བའི་སློབ་གྲྭ་ཆུང་འབྲིང་གི་བོད་ཡིག་དགེ་རྒན་རྣམས་ཟབ་སྦྱོང་ལ་ཞུགས་པ།
ཟླ2པའི་ཚེས7ནས་ཚེས26ཉིན་བར་དུ།མཚོ་སྔོན་ཞིང་ཆེན་སློབ་གསོ་ཐིན་གྱིས་ཞིང་ཆེན་སྐད་གཉིས་དགེ་རྒན་ཟབ་སྦྱོང་གཞི་གནས་ལ་མངགས་བཅོལ་བྱས་པ་ལྟར་མཚོ་སྔོན་མི་རིགས་སློབ་གྲྭ་ཆེན་མོས་ཞིང་ཆེན་ཡོངས་ཀྱི་མི་རིགས་སློབ་གྲྭ་ཆུང་འབྲིང་གི་བོད་ཡིག་དགེ་རྒན་གྱི་ཟབ་སྦྱོང་འཛིན་གྲྭ་བསྡུས་པ་རེད། ཞིང་ཆེན་ཡོངས་ཀྱི་མི་རིགས་སློབ་གྲྭ་ཆུང་འབྲིང་གི་བོད་ཡིག་དགེ་རྒན་གྱི་སློབ་ཁྲིད་ཆུ་ཚད་དང་ནུས་པ་མཐོར་འདེགས་བྱེད་པ་དང་།དགེ་རྒན་རྣམས་ཀྱི་བོད་ཀྱི་རིག་གནས་ཀྱི་མཁྱེན་རྒྱ་ཇེ་ཡངས་སུ་བཏང་ནས་བོད་ཀྱི་རིག་གནས་ལ་སྤྲོ་སེམས་བསྐྱེད་པར་མ་ཟད།རྒྱལ་ཁབ་ཀྱིས་བོད་ཀྱི་རིག་གནས་ཀྱི་འཛིན་སྐྱོང་སྤེལ་གསུམ་ལ་དོ་སྣང་བྱེད་པ་མངོན་པར་མཚོན་པ་བཅས་སུ་དམིགས་ནས་བསྡུས་པ་རེད།ཐེངས་འདིའི་ཟབ་སྦྱོང་ཁྲོད་སློབ་ཆུང་དང་སློབ་འབྲིང་འཛིན་གྲྭ་གཉིས་སུ་དགར་ནས་ཁྱོན་བསྡོམས་སློབ་མ200ལ་སློབ་ཁྲིད་བྱས་པ་རེད།བོད་རིག་པའི་སློབ་གླིང་གིས་སློབ་གྲྭ་ཆེན་མོའི་དགེ་རྒན18དང་གཞི་རིམ་སློབ་གྲྭ་ཆུང་འབྲིང་གི་ཕུལ་དུ་བྱུང་བའི་དགེ་རྒན9མངགས་ནས་རྒྱུན་ལྡན་རང་བཞིན་གྱི་སློབ་ཁྲིད་དང་།རིག་གཞུང་འཆད་ཁྲིད།ལྟ་སྦྱོང་སློབ་ཁྲིད།སློབ་མཇུག་སྒྲིལ་བའི་རྒྱུགས་གཞི།མྱོང་ཚོར་འབྲི་བ།ཚན་ཆུང་དགར་ནས་སློབ་གྲྭ་ཆུང་འབྲིང་གི་བོད་ཡིག་རྒྱུགས་གཞིའི་མཛོད་བསྐྲུན་པ།དགེ་སློབ་འབྲེལ་འདྲིས།བཞུགས་མོལ་ཚོགས་འདུ་སོགས་ཀྱི་རྣམ་པ་མང་པོ་བརྒྱུད་ནས་ཟབ་སྦྱོང་བྱས་ཤིང་།ཐེངས་འདིའི་ཟབ་སྦྱོང་ལ་སློབ་མ་རྣམས་ཀྱི་གདེང་འཇོག་མཐོན་པོ་ཐོབ་པར་མ་ཟད།སྤྱི་ཚོགས་སྟེང་ཤུགས་རྐྱེན་ངེས་ཅན་ཞིག་ཐེབས་པ་རེད།ཟབ་སྦྱོང་ཁྲོད་ཞུགས་པའི་སློབ་མ་རྣམས་ཀྱིས་བཤད་རྒྱུར།ཐེངས་འདིའི་ཟབ་སྦྱོང་བརྒྱུད་ནས་ཁོང་ཚོའི་མཐོང་རྒྱ་ཇེ་ཡངས་དང་ཤེས་བྱ་གང་མང་ཞིག་རྟོགས་པར་བརྒྱུད་རང་མི་རིགས་ཀྱི་རིག་གནས་ལ་སྔར་ལས་ལྷག་པར་ཤེས་རྟོགས་ཐུབ་པར་མ་ཟད།དགེ་རྒན་རྣམས་ཀྱི་སློབ་ཁྲིད་དཔེ་སྟོན་བྱས་པར་བརྒྱུད་མ་འོངས་པར་བོད་ཡིག་སློབ་ཁྲིད་ཀྱི་ཁ་ཕྱོགས་ངེས་གསལ་ཐུབ་པས་ཁོང་ཚོར་ཚན་རིག་དང་མཐུན་པའི་སློབ་སྟོན་དང་དགེ་མཚན་ལྡན་པའི་དཔེ་གཞི་ཞིག་འདོན་སྤྲོད་བྱས་ལ།ཐེངས་འདིའི་ཟབ་སྦྱོང་ནི་ཁེབས་རྒྱ་ཡངས་ཤིང་རྣམ་པ་མང་བ་དང་།དམིགས་འབེན་བརྟན་ཞིང་སློབ་ཐུན་གྱི་བཀོད་སྒྲིག་ཚན་རིག་དང་མཐུན་པ།དགེ་རྒན་རྣམས་ཀྱི་འགན་འཁྲིའི་འདུ་ཤེས་ཤུགས་ཆེ་ཞིང་ཟབ་སྦྱོང་གི་གོ་རིམ་ཚགས་དམ་པ་སོགས་སྔ་ན་མེད་པའི་ཟབ་སྦྱོང་ཞིག་ཡིན་ཞེས་བརྗོད་པ་རེད།