ཀྲུང་གོའི་བོད་ཀྱི་དྲ་བའི་འཕྲིན།  མཚོ་སྔོན་མི་རིགས་སློབ་ཆེན་ནི་མཚོ་སྔོན་ས་ཁུལ་དུ་བཙུགས་པའི་ཆེས་སྔ་བའི་མཐོ་རིམ་སློབ་ཆེན་དང་ཀྲུང་གོ་གསར་བ་དབུ་བརྙེས་ནས་འཛུགས་སྐྲུན་བྱས་པའི་ཆེས་སྔ་བའི་མི་རིགས་སློབ་གླིང་དང་།  རྒྱལ་ནང་དུ་མཚན་སྙན་ལྡན་པའི་མི་རིགས་ཕྱོགས་བསྡུས་རང་བཞིན་གྱི་སློབ་ཆེན་བཅས་ཡིན་པའི་ཆ་ནས།  ཉེ་བའི་ལོ་འགའི་རིང་གི་འཕེལ་རྒྱས་ཁྲོད།  སློབ་གྲྭའི་ཚོགས་ཁང་དང་སློབ་ཁང་། མལ་ཁང་བཅས་རྗེས་ལུས་ཡིན་པ་ནི་སློབ་གྲྭ་འཕེལ་རྒྱས་ཀྱི་བཀག་རྒྱ་ཞིག་ཏུ་གྱུར།  2010ལོའི་ཟླ9བར་ཞིང་ཆེན་ཡོངས་ཀྱི་སློབ་གསོ་ཚོགས་ཆེན་བསྡུས་པ་ནས་བཟུང་།  སློབ་གྲྭ་འདིར་སྔོན་བྱུང་མ་མྱོང་བའི་འཕེལ་རྒྱས་ཀྱི་སྐལ་བཟང་ཞིག་ལ་འཕྲད། 

ཉེ་ལམ།  མཚོ་སྔོན་ཞིང་ཆེན་ཏང་ཨུ་དང་སྲིད་གཞུང་།  ཟི་ལིང་གྲོང་ཁྱེར་ཏང་ཨུ་དང་སྲིད་གཞུང་།  ཟི་ལིང་གྲོང་ཁྱེར་མཁར་ཤར་ཁུལ་གྱིས་ཐུགས་ཁུར་དང་རྒྱབ་སྐྱོར་བྱས་འོག  སློབ་གྲྭའི་རྒྱས་སྐྲུན་ས་གཞི་མུའུ353གཏན་འབེབས་བྱས་ཤིང་།  སློབ་གྲྭ་འདིའི་ལོ་རྒྱུས་སྟེང་ཆེས་ཆེ་བའི་རྒྱས་སྐྲུན་བཟོ་འགོད་འཛུགས་སྐྲུན་ཕྱོགས་ཡོངས་སུ་སྤེལ་འགོ་བརྩམས། 

གཞན་ད་དུང་སློབ་གྲྭས་ད་ལྟའི་གནས་བབ་དང་མ་འོངས་འཕེལ་རྒྱས་ཀྱི་དགོས་མཁོ་ལྟར།  རིག་གནས་ཚན་ཁག་ཐོག་ཁང་དང་རྫས་འགྱུར་ཚན་ཁག་ཐོག་ཁང་།  བོད་རིག་པའི་ཞིབ་འཇུག་ལྟེ་གནས་སོགས་སློབ་མ་སྟོང8ལྷག་མཉམ་དུ་ཟ་མ་ཟ་ནུས་པའི་དེང་རབས་ཅན་གྱི་ཟ་ཁང་འཛུགས་སྐྲུན་བྱེད་རྒྱུ་རེད།  སློབ་གྲྭ་འདིའི་སློབ་གཙོ་གཞོན་པ།  སློབ་དཔོན་ཆེན་མོ་གཡང་ཧྥ་ཡེས་ཀྱིས་བཤད་རྒྱུར།  སློབ་གྲྭ་རྒྱས་སྐྲུན་བཟོ་འགོད་ལ་རྒྱལ་ཁབ་དང་ཞིང་ཆེན་ཏང་ཨུ།  ཞིང་ཆེན་སྲིད་གཞུང་།  ཞིང་ཆེན་སློབ་གསོ་ཐིན་བཅས་ཀྱིས་རྒྱབ་སྐྱོར་ཆེན་པོ་བྱས་པས།  སློབ་གྲྭའི་རྒྱས་སྐྲུན་བཟོ་འགོད་དང་ལུས་རྩལ་ར་བའི་སྒྲིག་ཆས་སྔར་ལས་འཐུས་ཚང་དུ་བཏང་ཞིང་།  སློབ་གྲྭའི་རྗེས་ཕྱོགས་ཀྱི་འཕེལ་རྒྱས་ལ་རྨང་གཞིའི་བརྟན་པོ་བཏིངས།  །