མཚོ་སྔོན་རྒྱང་སྒྲོག་བརྙན་འཕྲིན་ཁང་གི་ཉིས་སྟོང་བཅུ་གཉིས་ལོའི་བོད་ཆུ་ཕོ་འབྲུག་ལོའི་ན་ཆུང་བྱིས་པའི་ལོ་སར་རིག་རྩལ་དགོང་ཚོགས«རྨ་ཆེན་གངས་རིའི་གཟི་བྱིན»ཞེས་པ་དེ་སྤྱི་ཟླ་བཅུ་པའི་ཚེས་སུམ་ཅུའི་ཉིན་མགོ་ལོག་བོད་རིགས་རང་སྐྱོང་ཁུལ་གྱི་རྨ་ཆེན་རྫོང་ནས་ཕབ་སྐྲུན་ལེགས་འགྲུབ་བྱུང་།
ཐེངས་འདིའི་དགོང་ཚོགས་ནི་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་མི་དམངས་སྲིད་གཞུང་དང་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་འཁོར་སྐར་འཕྲིན་ལམ་གཉིས་ཀྱིས་མཉམ་སྒྲུབ་སྒོས་སྒྲུབ་པ་ཞིག་ཡིན།རྨ་ཆེན་རྫོང་གི་རིམ་པ་སོ་སོའི་སློབ་གྲྭ་བཅུ་བདུན་གྱི་སློབ་མ་བཞི་བརྒྱ་ལྔ་བཅུ་དགོང་ཚོགས་སྟེང་ཞུགས་ནས་སྒྱུ་རྩལ་གྱི་འཇོན་ཐང་མངོན།ཐེངས་འདིའི་དགོང་ཚོགས་སུ་ད་དུང་ལོ་འདི་དག་གི་རིང་ལ་རིག་རྩལ་གར་སྟེགས་སྟེང་འབྲས་བུ་བླངས་ཡོད་པ་དང་སྒྱུ་རྩལ་གྱི་སྟེགས་བུའི་སྟེང་རང་ཉིད་ཀྱི་འཇོན་ཐང་མངོན་མེད་པའི་ཞིང་ཆེན་ཕྱི་ནང་གི་བོད་རིགས་ཀྱི་གླུ་བ་སྐད་གྲགས་ཅན་ཆུང་ཆུང་ཁ་ཤས་དགོང་ཚོགས་སུ་ཞུགས་ཡོད་པ་རེད།དགོང་ཚོགས་ལེ་ཚན་གྱི་རྣམ་པའི་སྣ་ཚོགས་སུ་གྲུབ་པ་དང་།ནང་དོན་ཕུན་སུམ་ཚོགས་ལ།བོད་རིགས་དམངས་ཁྲོད་ཀྱི་དམངས་གླུ་ཕྱོགས་བསྡུས་བྱས་ཡོད་པ་ལས་གཞན།དེང་རབས་ཀྱི་གཞས་དང་།བོད་རིགས་ཀྱི་ཞབས་བྲོ།བཞད་གར།གར་ཆུང་།གེ་སར་རྣམ་ཐར།རྡུང་ལེན།དམངས་ཁྲོད་བྱིས་པའི་རོལ་རྩེད་སོགས་ལེ་ཚན་སོ་གསུམ་ཡོད་པ་དང་།རིང་ཐུང་ལ་ཆུ་ཚོད་གསུམ་ཡོད།དགོང་ཚོགས་ཀྱིས་འཆམ་མཐུན་མགོ་ལོག་བརྗོད་བྱ་རུ་བཟུང་བ་དང་།ཕུན་སུམ་ཚོགས་པའི་སྒོ་ནས་མེས་རྒྱལ་སྟོབས་འབྱོར་མངའ་ཐང་རྒྱས་པ་དང་།མི་རིགས་མཐུན་སྒྲིལ་ཡར་རྒྱས།མི་རིགས་སློབ་གསོའི་ལས་དོན་ཡར་རྒྱས་སུ་འགྲོ་བའི་རྒྱབ་ལྗོངས་འོག་དེང་སྐབས་ཀྱི་བོད་རིགས་ལོ་ཆུང་བྱིས་པ་བདེ་ཐང་ངང་འཚར་ལོངས་བྱུང་བ་དང་།མཐུན་སྒྲིལ་ཡར་ཐོན་གྱི་བསམ་བློའི་མངོན་པ་དང་།དུས་མཚུངས་སུ་རྨང་གཞི་གཉིས་ཀྱི་བྱ་བའི་སྒྲུབ་རིམ་ཁྲོད་རང་ཞིང་གི་སློབ་གསོའི་ལས་གནས་སུ་བླངས་པའི་གཡུར་དུ་ཟ་བའི་གྲུབ་འབྲས་ཀྱང་མངོན་པ་རེད།དགོང་ཚོགས་ཀྱི་ལེ་ཚན་ཧྲིལ་བོར་འཁྲུགས་ཆ་དོད་པོ་དང་ལྡན་པ་དང་།ཡུལ་དངོས་ཀྱི་ལྟད་མོ་བ་ཚོས་དགའ་བསུ་ཆེན་པོ་ཐོབ།མགོ་ལོག་ཁུལ་དང་།རྨ་ཆེན་རྫོང་གི་ཏང་སྲིད་མགོ་ཁྲིད།ལས་བྱེད་མི་སྣ།སློབ་གྲྭའི་དགེ་སློབ་དང་ཁྱིམ་བདག་སོགས་མི་ཉིས་སྟོང་ལྷག་གིས་དགོས་ཚོགས་ལ་བལྟས།
ཐེངས་འདིའི་དགོང་ཚོགས་ལེགས་པོ་ཞིག་ཕབ་སྐྲུན་བྱེད་ཆེད།བོད་སྐད་ལྟེ་གནས་ཀྱི་མགོ་ཁྲིད་དང་སྒྲིག་ཁྲིད་པ་སྔ་གཞུག་ཏུ་ཐེངས་བཞིར་མགོ་ལོག་ཏུ་སོང་ནས་ལེ་ཚན་ལེགས་འདེམས་བྱེད་པ།ཕྱོགས་བསྡུས་ནང་སྦྱོང་དང་སྟ་གོན་བྱེད་པ།ཕབ་སྐྲུན་གྱི་བྱ་བ་སོགས་ཀྱི་བྱ་བའི་སྒྲིག་གཞི་འཆར་འགོད་བྱས་ལ།དགོང་ཚོགས་ཧྲིལ་བོས་སྔོན་མའི་འཆར་འགོད་ནས་མཇུག་གི་ཕབ་སྐྲུན་ལེགས་འགྲུབ་བྱུང་བར་ཁྱོན་བསྡོམས་ཉིན་ལྔ་བཅུ་འགོར།ཐེངས་འདིའི་དགོང་ཚོགས་བདེ་ལེགས་ངང་བསྒྲུབས་པ་དེས་རང་ཞིང་གི་རོང་འབྲོག་ཁུལ་གྱི་བྱིས་པའི་རིག་རྩལ་བྱ་འགུལ་ཕུན་སུམ་ཇེ་ཚོགས་སུ་གཏོང་བ་དང་།ན་ཆུང་བྱིས་པའི་རིག་རྩལ་གྱི་འཇོན་ཐང་མི་སྣ་གསོ་སྤེལ་བྱེད་པ།ན་ཆུང་བྱིས་པའི་བདེ་ཐང་ལ་དོ་འཁུར་བྱེད་པ།བྱིས་པ་ཚོར་བརྙན་ཡོལ་སྟེང་ནས་འཇོན་ཐང་ངོམས་པའི་གོ་སྐབས་ཤིག་བྱིན་ནས་ན་ཆུང་བྱིས་པ་ཚོར་ཕན་ཚུན་བརྗེ་རེས་དང་སློབ་སྦྱོང་བྱེད་པའི་སྒྱུ་རྩལ་གྱི་སྟེགས་བུ་ཞིག་བསྐྲུན་པར་ཕན་ནུས་ཆེན་པོ་ཐོབ་ཡོད།
ཐེངས་འདིའི་དགོང་ཚོགས་དེ་སྐབས་སྔོན་མ་དག་དང་བསྡུར་ན་གཞི་ཁྱོན་ཆེ་བ་དང་།ནང་དོན་མང་བ།ལེ་ཚན་གསར་བ་ཡིན་པ།འཁྲབ་སྟོན་མི་སྣ་མང་བ་སོགས་ཀྱི་ཁྱད་ཆོས་ལྡན།ཐེངས་འདིའི་དགོང་ཚོགས་རྒྱ་ལོའི་ལོ་གསར་དང་བོད་ལོའི་ལོ་གསར་སྐབས་སུ་མཚོ་སྔོན་བོད་སྐད་འཕྲིན་ལམ་ནས་གཏོང་རྒྱུ་ཡིན།