ཀྲུང་ཨུའི་ཙུང་ལིའི་དུས་བཀག་ཞལ་འཛོམས་ལམ་སྲོལ་དེ་1996ལོར་བཙུགས་པ་དེ་རྒྱལ་ཁབ་གཉིས་པོའི་ཁྱབ་ཁོངས་ཁག་དབར་དངོས་དོན་མཉམ་ལས་བྱ་རྒྱུར་མཛུབ་ཁྲིད་དང་མཐུན་སྦྱོར་བྱེད་པའི་སྟེགས་བུ་གལ་ཆེན་ཞིག་ཏུ་གྱུར་པ་དང་འབྲེལ་གཡུར་དུ་ཟ་བའི་གྲུབ་འབྲས་ཀྱང་ཐོབ་ནས་རྒྱལ་ཁབ་གཉིས་དབར་ཁྱིམ་མཚེས་མཛའ་གྲོགས་དང་གཉིས་ཕན་མཉམ་ལས་གཏིང་ཟབ་ཏུ་གཏོང་བ་དང་རྒྱལ་ཁབ་གཉིས་དབར་གྱི་འཐབ་ཇུས་མཉམ་ལས་རོགས་ཟླའི་འབྲེལ་བ་སྒོ་ཀུན་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་ནུས་པ་གལ་ཆེན་བཏོན་ཡོད།གནང་ཉེར་ཡོད་པའི་དུས་བཀག་ཞལ་འཛོམས་ཐེངས་བཅུ་དྲུག་པའི་ཐོག་ཙུང་ལིའི་དུས་བཀག་ཞལ་འཛོམས་ཐེངས་བཅོ་ལྔ་པ་ཚུན་དུ་རྒྱལ་ཁབ་གཉིས་པོའི་ཁྱབ་ཁོངས་ཁག་གི་མཉམ་ལས་ལ་ཐོབ་པའི་གྲུབ་འབྲས་སྒོ་ཀུན་ནས་ཕྱོགས་སྡོམ་དང་།ཀྲུའུ་ཞི་ཧུའུ་ཅིན་ཐའོ་ཡིས་ད་ལོའི་ཟླ་བ་6པར་ཨུ་རུ་སུར་འཚམས་འདྲི་གནང་རིང་རྒྱལ་ཁབ་གཉིས་ཀྱི་འགོ་ཁྲིད་པས་བཞག་པའི་ཐུན་མོང་གི་གཟིགས་སྟངས་དང་གྲོས་མཐུན་དོན་འཁྱོལ་བྱ་རྒྱུར་སྐུལ་མ་གཏོང་བ།དུས་མཚམས་རྗེས་མར་ཕྱོགས་གཉིས་པོའི་དབར་མཉམ་ལས་བྱ་རྒྱུར་འཆར་འགོད་དང་བཀོད་སྒྲིག་བྱེད་པ་བཅས་བྱས་ཏེ་ཀྲུང་ཨུའི་དབར་དཔལ་འབྱོར་ཚོང་དོན་དང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་སོགས་ཀྱི་ཁྱབ་ཁོངས་ཀྱི་དངོས་དོན་མཉམ་ལས་གཏིང་ཟབ་བྱ་རྒྱུར་སྐུལ་མ་གཏོང་རྒྱུ་ཡིན་པ་རེད།
    ད་ལོ་ནི《ཀྲུང་ཨུ་ཁྱིམ་མཚེས་རྒྱལ་ཁབ་དབར་གྱི་མཛའ་མཐུན་མཉམ་ལས་ཆིངས་ཡིག》བཞག་ནས་ལོ་10འཁོར་བ་དང་ཀྲུང་ཨུའི་འཐབ་ཇུས་མཉམ་སྒྲུབ་རོགས་ཟླའི་འབྲེལ་བ་གཏན་འཁེལ་བྱས་ནས་ལོ་15འཁོར་བའི་ལོ་ཞིག་ཡིན་པ་རེད།ཕྱོགས་གཉིས་པོས་ཐུན་མོང་ཐོག་འབད་བརྩོན་བྱས་པའི་འོག་མིག་སྔར་ཀྲུང་ཨུའི་འཐབ་ཇུས་རོགས་ཟླའི་འབྲེལ་བ་ཕྱོགས་ཡོངས་དང་།སྐྱོན་བྲལ།བརྟན་པོ།མགྱོ གས་མྱུར་བཅས་ཀྱི་སྒོ་ནས་འཕེལ་རྒྱས་འགྲོ་བ་དང་རྒྱལ་ཁབ་གཉིས་པོའི་འབྲེལ་བ་ལོ་རྒྱུས་ཀྱི་དུས་སྐབས་ཡག་ཤོས་སུ་སླེབས་ཡོད།ཀྲུང་ཨུའི་མཐོ་རིམ་དབར་ཕན་ཚུན་འཚམས་འདྲི་ཡང་ཡང་གནང་བ་དང་ཆབ་སྲིད་ཐད་ཕན་ཚུན་ཡིད་ཆེས་ལ་རྒྱུན་མི་ཆད་པར་ཤུགས་སྣོན་ཐེབས་ཡོད།ཀྲུང་ཨུའི་དུས་བཀག་གི་མཐོ་རིམ་ཞལ་འཛོམས་དང་དེ་བཞིན་རིམ་གྲས་གཞན་དག་དབར་གྱི་སྤེལ་རེས་གྲོས་མོལ་ལམ་སྲོལ་གྱི་ཚད་གཞི་མཐོ་བ་དང་།རྩ་འཛུགས་ཀྱི་གྲུབ་ཆ་འཐུས་སྒོ་ཚང་བ།ཁྱབ་ཁོངས་རྒྱ་ཆེ་བ་བཅས་ནི་ཀྲུང་གོའི་ཕྱི་ཕྱོགས་འབྲེལ་བའི་ནང་འབའ་ཞིག་ཡིན་པ་དང་རྒྱལ་ཁབ་ཆེན་པོའི་འབྲེལ་བའི་ཁྲོད་དུའང་ཧ་ཅང་མཐོང་དཀོན་པ་ཞིག་རེད།དེའི་ཕན་ནུས་ལྡན་པའི་འཁོར་སྐྱོད་ཀྱིས་ཀྲུང་ཨུའི་འབྲེལ་བ་སྐྱོན་བྲལ་ངང་འཕེལ་རྒྱས་གཏོང་ཆེད་བརྟན་ལྷིང་གི་ལམ་སྲོལ་དང་རྩ་འཛུགས་ཀྱི་འགན་སྲུང་བྱས་ཡོད་པ་རེད།
       ཀྲུང་ཨུའི་དབར་དངོས་དོན་མཉམ་ལས་བྱ་རྒྱུ་ཉིན་རེ་བཞིན་རྒྱ་ཆེར་འགྲོ་ཞིང་།ཕྱོགས་གཉིས་པོས་ནུས་ཁུངས་དང་།ཚན་རྩལ།དམག་དོན་ལག་རྩལ།ས་གནས་སོགས་གཙོ་གནད་ཁྱབ་ཁོངས་སུ་ལག་བསྟར་བྱས་པའི་མཉམ་ལས་རྣམ་གྲངས་ཆེ་གྲས་ཁག་གཅིག་གི་འཕེལ་རིམ་བདེ་བླག་ཡོད་པ་རེད།ཀྲུང་ཨུའི་ཚོང་དོན་གྱི་གྲུབ་ཆ་རྒྱུན་ཆད་མེད་པར་ལེགས་སུ་ཕྱིན་པ་དང་།ཕན་ཚུན་མ་འཇོག་དང་མཉམ་ལས་ཐོན་སྐྱེད་ལས་སྣོན་སོགས་ཐད་ཀྱི་མཉམ་ལས་ལ་འཕེལ་ཕྱོགས་བཟང་པོ་ཐོན་པ།མཐའ་མཚམས་དང་ས་གནས་མཉམ་ལས་འཕར་གནས་གསར་པ་ཞིག་ཏུ་གྱུར་པ་བཅས་རེད།རྒྱལ་ཁབ་གཉིས་པོའི་ཚོང་དོན་དངུལ་གྲངས་2010ལོར་ཨ་སྒོར་དུང་ཕྱུར་600ཙམ་ཟིན་ནས་2008ལོའི་དངུལ་རྩའི་ཉམས་ཉེན་གོང་གི་ཆུ་ཚད་དུ་སླར་གསོ་བྱུང་བ་དེ་2000ལོའི་ལྡབ་6ལྷག་ཙམ་ཡིན་པ་རེད།ད་ལོའི་ལོ་སྟོད་དུ་ཨ་་དུང་ཕྱུར་358.89ཟིན་པ་དེ་དུས་མཚུངས་ལས་39.6%འཕར་ཡོད་པ་རེད།ཀྲུང་གོ་འདི་ཉིད་ཨུ་རུ་སུའི་ཚོང་དོན་རོགས་ཟླ་ཆེ་ཤོས་སུ་གྱུར་ཡོད་པ་རེད།