ལྷ་ས་གྲོང་ཁྱེར་གྱི་མང་ཚོགས་ཀྱི་རིག་གནས་ལུས་རྩལ་ལྟེ་གནས་ལས་གཞིའི་གན་རྒྱ་འཇོག་པའི་མཛད་སྒོ་ཟླ་བཅུ་བའི་ཚེས་བཅུ་ཉིན་པེ་ཅིན་གསར་འགྱུར་ཐོག་ཁང་ཆེན་མོའི་ནང་ཚོགས་པ་དང་།པེ་ཅིན་གྲོང་ཁྱེར་གྱི་བོད་སྐྱོར་བཀོད་འདོམས་པུའུ་དང་ཀྲུང་གོའི་མཁའ་སྐྱོད་འཛུགས་སྐྲུན་ཇུས་འགོད་ཞིབ་འཇུག་གླིང་།པེ་ཅིན་ཅིན་ལུང་བཟོ་སྐྲུན་ལས་གཞི་དོ་དམ་ཀུང་ཟི།པེ་ཅིན་གྲོང་ཁྱེར་བཟོ་སྐྲུན་བློ་འདྲི་ཀུང་ཟི་སོགས་ལས་ཁུངས་བདུན་གྱིས་མཉམ་དུ་གན་རྒྱ་བརྒྱད་བཀོད་པ་དང་།པེ་ཅིན་གྲོང་ཁྱེར་གྱི་ཁ་གཏད་རོགས་སྐྱོར་དང་དཔལ་འབྱོར་མཉམ་ལས་མགོ་ཁྲིད་ཚན་ཆུང་གི་འབྲེལ་ཡོད་འགན་འཁུར་བ་གན་རྒྱ་འགོད་པའི་མཛད་སྒོར་ཞུགས།པེ་ཅིན་གྲོང་ཁྱེར་གྱི་དཔལ་འབྱོར་སྤྱི་ཚོགས་མགྱོགས་པོའི་སྒོ་ནས་འཕེལ་རྒྱས་སུ་སོང་བ་དང་བསྟུན་ནས།བོད་ལྗོངས་ལྷ་སར་ཁ་གཏད་རོགས་སྐྱོར་བྱེད་པའི་བྱ་བའི་ཤུགས་ཚད་མུ་མཐུད་དུ་ཇེ་ཆེར་བཏང་བ་དང་།ལྷ་ས་གྲོང་ཁྱེར་ཏང་ཨུ་དང་སྲིད་གཞུང་གིས་མཉམ་དུ་ཞིབ་འཇུག་བྱས་པ་བརྒྱུད།པེ་ཅིན་གྱིས་ལྷ་ས་ནས་ཕྱོགས་བསྡུས་རང་བཞིན་གྱི་དེང་རབས་རིག་གནས་ལུས་རྩལ་ལྟེ་གནས་ཤིག་ལས་པར་རོགས་རམ་བྱེད་རྒྱུ་རེད།ལས་གཞི་དེ་ནི་ལྷ་ས་གྲོང་ཁྱེར་གྱི་ལྷོ་ཕྱོགས་སུ་ཡོད་པ་དང་།དེའི་ཐད་ལ་བསྡོམ་པས་མ་དངུལ་སྒོར་མོ་དུང་ཕྱུར་ལྔ་དང་བྱེ་བ་བརྒྱད་གཏོང་རྒྱུ་རེད།ལས་གཞི་དེ་བོད་ལྗོངས་ཀྱི་ས་གནས་དཔལ་འབྱོར་འཕེལ་རྒྱས་སུ་གཏོང་བ་དང་།མང་ཚོགས་ཀྱི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བར་དོན་སྙིང་གལ་ཆེན་ལྡན་པར་མ་ཟད།ལྷ་ས་གྲོང་ཁྱེར་གྱི་ལུས་རྩལ་སྒྲིག་ཆས་རྗེས་ལུས་ཡིན་པའི་རྣམ་པར་ལེགས་བཅོས་བྱས་ཏེ།རྒྱ་ཆེའི་མང་ཚོགས་ཀྱི་ལུས་རྩལ་སྦྱོང་བརྡར་གྱི་དགོས་མཁོ་བསྐོང་ཐུབ་རྒྱུ་ཡིན་ལ།བོད་མི་རིགས་ཀྱི་རིག་གནས་འཛིན་སྐྱོང་སྤེལ་གསུམ་བྱེད་པའི་ཐད་ལའང་ནུས་པ་བཟང་བོ་འདོན་སྤེལ་བྱེད་ཐུབ་རྒྱུ་རེད།