རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་བུའུ་པང་གོ་ཡིས་ཚེས12ཉིན་གྱི་ཕྱི་དྲོར་མི་དམངས་ཚོགས་ཁང་ཆེན་མོའི་ནང་བྷང་ག་ལ་རྒྱལ་ཁབ་ཀྱི་གྲོས་དཔོན་ཧ་མུས་ཏི་ལ་མཇལ་འཕྲད་གནང་།

བུའུ་པང་གོ་ཡིས་གསུངས་རྒྱུར། ཀྲུང་གོ་དང་བྷང་ག་ལ་གཉིས་ནི་མཛའ་མཐུན་ཁྱིམ་མཚེས་ཡིན་པ་དང་། ཕྱོགས་གཉིས་བར་འབྲེལ་བ་བཙུགས་ཏེ་ལོ་སོ་དྲུག་འགོར་བའི་རིང་ལ། རྒྱལ་ཁབ་གཉིས་ཀྱི་འབྲེལ་བ་བདེ་བླག་ངང་གོང་འཕེལ་དུ་སོང་། ཕྱོགས་གཉིས་ཀྱིས་ཆབ་སྲིད་ཐད་ནས་ཕན་ཚུན་ལ་བརྩི་བཀུར་དང་ཡིད་ཆེས་བྱས་པ་དང་། དཔལ་འབྱོར་ཐད་ནས་གཉིས་ཕན་མཉམ་ལས་བྱས་ཤིང་། ཁྱབ་ཁོངས་སོ་སོའི་བརྗེ་རེས་དང་མཉམ་ལས་ལ་ཕན་འབྲས་མངོན་གསལ་ཐོབ། ཀྲུང་གོས་བྷང་ག་ལ་དང་མཉམ་དུ་འབད་བརྩོན་བྱས་ཏེ། ཆབ་སྲིད་ཐད་ཀྱི་ཡིད་ཆེས་སྔར་ལས་ཇེ་ཆེར་གཏོང་བ་དང་། དངོས་གཉེར་མཉམ་ལས་ཇེ་ཟབ་ཏུ་གཏོང་བ། རིག་གནས་བརྗེ་རེས་ཕུན་སུམ་ཇེ་ཚོགས་སུ་གཏོང་བ་དང་། ཕྱོགས་མང་མཉམ་ལས་ལ་ཤུགས་བསྣན་ཏེ། ཀྲུང་གོ་དང་བྷང་ག་ལའི་ཕྱོགས་ཡོངས་ཀྱི་མཉམ་ལས་གྲོགས་པོའི་འབྲེལ་བ་ཆུ་ཚད་གསར་བ་ཞིག་ཏུ་གོང་འཕེལ་ལ་གཏོང་འདོད་ཡོད་ཟེར།

བུའུ་པང་གོ་ཡིས་ཀྲུང་གོའི་རྒྱལ་ཡོངས་དམངས་འཐུས་ཚོགས་ཆེན་དང་བྷང་ག་ལའི་རྒྱལ་དམངས་གྲོས་ཁང་གཉིས་ཀྱིས་རིམ་པ་མང་པོ་དང་ཕྱོགས་མང་པོ་ནས་བརྗེ་རེས་དང་མཉམ་ལས་བྱས་ཏེ། དམངས་གཙོའི་ཁྲིམས་ལུགས་འཛུགས་སྐྲུན་ལ་ཤུགས་སྣོན་པ་དང་། དཔལ་འབྱོར་འཕེལ་རྒྱས་ལ་ཡར་སྐུལ་བྱེད་པ། མང་ཚོགས་ཀྱི་འཚོ་བ་ལེགས་བཅོས་བྱེད་པ་སོགས་ཐད་ནས་ཕན་ཚུན་ལ་སློབ་སྦྱོང་བྱས་ནས། རྒྱལ་ཁབ་གཉིས་ཀྱི་འབྲེལ་བའི་ནང་དོན་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་དགོས་ཞེས་གསུངས། །