མཚོ་སྔོན་ཞིང་ཆེན་ན་གཞོན་མཉམ་འབྲེལ་ལྷན་ཚོགས་ཀྱིས་ཚེས་དགུ་ཉིན་ཟི་ལིང་ནས་ལྕགས་ཕག་ལོའི་གསར་བརྗེ་བྱུང་ནས་ལོ་འཁོར་བརྒྱ་ལོན་པར་དྲན་གསོ་ཞུ་བའི་བཞུགས་མོལ་ཚོགས་འདུ་བསྡུས། ཚོགས་ཐོག་ནས་སྐུ་ཞབས་སུན་ཀྲུང་ཧྲན་སོགས་དམངས་གཙོ་གསར་བརྗེའི་སྔོན་བྱོན་པ་རྣམས་ཀྱི་འོད་སྟོང་འབར་བའི་གྲུབ་འབྲས་ཕྱིར་དྲན་བྱས་ནས། མཚོ་སྔོན་ཞིང་ཆེན་གྱི་རིགས་སོ་སོ་དང་ལས་རིགས་སོ་སོའི་ན་གཞོན་དང་ལྷག་པར་དུ་ན་གཞོན་མཉམ་འབྲེལ་ལྷན་ཚོགས་ཀྱི་ཨུ་ཡོན་རྣམས་ཀྱིས་ལྕགས་ཕག་ལོའི་གསར་བརྗེ་ཡི་སྔོན་བྱོན་པ་རྣམས་ལ་རྗེས་དྲན་དང་བླ་ན་མེད་པའི་གུས་འདུད་ཞུས་པ་མཚོན་པར་བྱས།

བཞུགས་མོལ་ཚོགས་འདུའི་སྟེང་ལས་རིགས་སོ་སོའི་ན་གཞོན་འཐུས་མིས་གཏམ་བཤད་སྐབས་བཤད་རྒྱུར། ལྕགས་ཕག་ལོའི་གསར་བརྗེ་བྱུང་ནས་ལོ་འཁོར་བརྒྱ་ལོན་པར་དྲན་གསོ་ཞུ་བ་གོ་སྐབས་སུ་བཟུང་སྟེ་ལྕགས་ཕག་ལོའི་གསར་བརྗེ་ཡི་རླབས་ཆེན་ལོ་རྒྱུས་ལས་དོན་ལ་ཕྱོགས་ཡོངས་ནས་ཕྱིར་དྲན་དང་རྒྱུས་ལོན་ཟབ་མོ་བྱས་ཏེ། ལོ་རྒྱུས་ལས་བློ་གྲོས་དང་སྟོབས་ཤུགས་བསྡུ་ལེན་བྱེད་པ་དང་ལྕགས་ཕག་ལོའི་གསར་བརྗེ་ཡི་སྔོན་བྱོན་པ་རྣམས་ཀྱི་གཟི་བརྗིད་ལྡན་པའི་སྲོལ་རྒྱུན་དང་རྒྱལ་གཅེས་སྙིང་སྟོབས་རྒྱུན་འཛིན་དང་དར་སྤེལ་བྱེད་དགོས་ལ། ན་གཞོན་མཉམ་འབྲེལ་ལྷན་ཚོགས་ཀྱི་ཨུ་ཡོན་དང་ཞིང་ཆེན་ཡོངས་ཀྱི་རིགས་སོ་སོ་དང་ལས་རིགས་སོ་སོའི་ན་གཞོན་རྣམས་ཀྱི་བསམ་བློ་དང་བྱ་སྤྱོད་དེ་མཚོ་སྔོན་གྱི་བཅོས་སྒྱུར་འཕེལ་རྒྱས་དང་དེང་རབས་ཅན་གྱི་འཛུགས་སྐྲུན་ལས་དོན་དང་གཅིག་གྱུར་བྱས་ནས། ཧུར་ཐག་སྒོས་ཞིང་ཆེན་ཡོངས་ཀྱི་མི་དམངས་ལ་ཕན་པའི་འབྱོར་འབྲིང་སྤྱི་ཚོགས་འཛུགས་སྐྲུན་བྱེད་པའི་འབད་འཐབ་དམིགས་འབེན་མངོན་འགྱུར་བྱེད་དགོས་ཟེར།