ད་ལོའི་རྒྱལ་སྟོན་དུས་ཆེན་སྐབས་སུ། བོད་ལྗོངས་ཀྱི་གནས་སྐོར་བྱ་བ་བསྟུད་མར་འཕེལ་རྒྱས་མགྱོགས་པོ་བྱུང་སྟེ། ལོ་རྒྱུས་སྟེང་ཆེས་བཟང་བའི་ཆུ་ཚད་དུ་བསླེབས། སྡོམ་རྩིས་བྱས་པ་ལྟར་ན། ཟླ་བཅུ་བའི་ཚེས་གཅིག་ཉིན་ནས་ཚེས་བདུན་ཉིན་བར། བོད་རང་སྐྱོང་ལྗོངས་ཀྱིས་གནས་སྐོར་བ་འབུམ་བཞི་དང་ཁྲི་གསུམ་ལྷག་སྣེ་ལེན་བྱས་པ་དང་། དེ་ན་ནིང་གི་དུས་མཉམ་ལས་བརྒྱ་ཆའི་ཉེར་དྲུག་གྲངས་ཆུང་ལྔ་འཕར་སྣོན་བྱུང་། གནས་སྐོར་ཡོང་སྒོ་སྒོར་མོ་དུང་ཕྱུར་གཅིག་དང་བྱེ་བ་བདུན་ལྷག་ལ་བསླེབས་པ་དང་། ན་ནིང་གི་དུས་མཉམ་ལས་བརྒྱ་ཆའི་སོ་གཅིག་ལྷག་འཕར།

མཚམས་སྦྱོར་བྱས་པ་ལྟར་ན། ད་ལོའི་རྒྱལ་སྟོན་དུས་ཆེན་སྐབས་ཀྱི་གནས་སྐོར་བྱ་བར་གཤམ་གྱི་ཁྱད་ཆོས་འགའ་ལྡན་ཏེ། བོད་ལྗོངས་ཀྱི་འབྲེལ་ཡོད་སྡེ་ཁག་གིས་སྔ་མོ་ནས་བཀོད་སྒྲིག་དང་སྔ་མོ་ནས་གྲ་སྒྲིག་བྱས་ཏེ། རྒྱལ་སྟོན་དུས་ཆེན་སྐབས་ཀྱི་གནས་སྐོར་བྱ་བ་བདེ་འཇགས་ཡིན་པ་དང་། རྒྱུ་སྤུས་བཟང་བ། ཕན་འབྲས་ལྡན་པ་བཅས་ཀྱི་དམིགས་འབེན་ཏུ་བསླེབས་པར་ཁག་ཐེག་བྱས་པ་དང་། གཉིས་ནས་བོད་ལྗོངས་ཀྱིས་གནས་སྐོར་བ་སྣེ་ལེན་བྱས་པའི་རྒྱུ་སྤུས་ཅུང་བཟང་། གསུམ་ནས་པོ་ཏ་ལ་དང་། ལྷ་ལྡན་གཙུག་ལག་ཁང་། བཀྲ་ཤིས་ལྷུན་པོ་དགོན་པ། ཇོ་མོ་གླང་མ། གནམ་མཚོ། ཉིང་ཁྲིའི་བྲག་རོང་ཆེན་མོ་སོགས་སུ་གནས་སྐོར་དུ་ཡོང་མཁན་ཇེ་མང་དུ་སོང་། བཞི་ནས་གནས་སྐོར་རུ་ཁག་ཆེ་ཆུང་མང་པོ་བོད་ལྗོངས་སུ་གནས་སྐོར་ལ་ཡོང་བ་དང་། ལྔ་ནས་གནས་སྐོར་བའི་འཛད་སྤྱོད་བསམ་ཕྱོགས་སྔར་ལས་ཇེ་བཟང་དུ་སོང་བ་བཅས་རེད་ཟེར།