རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིས་ཁི་ཆང་གིས་གྲོས་ཚོགས་ལ་མགོ་འཛིན་མཛད། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་ཏི་ཅང་དང་བང་ཆི་ཧྲན་གཉིས་གྲོས་ཚོགས་ལ་ཞུགས། རྒྱལ་སྲིད་ཨུ་ཡོན་གྱི་ཞོར་དུ་རྒྱལ་སྲིད་སྤྱི་ཁྱབ་ཁང་གི་དྲུང་ཡིག་ཆེན་མོའི་འགན་འཁུར་མཁན་མཱ་ཁའེ་ཡིས་ཚོགས་ཐོག་ནས་རྒྱལ་སྲིད་སྤྱི་ཁྱབ་ཁང་གིས་ལོ་ལྔའི་འཆར་གཞི་བཅུ་གཅིག་པའི་སྐབས་ཀྱི་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་བྱ་བའི་གྲུབ་འབྲས་འབུར་དུ་ཐོན་པའི་ཞིང་ཆེན་རིམ་པའི་མི་དམངས་སྲིད་གཞུང་ལ་གཟེངས་བསྟོད་བྱེད་པའི་སྐོར་གྱི་སྒྲོག་ཡིག་བཏོན།

ཝུན་ཅ་པའོ་ཡིས་བསྟན་དོན། ལོ་ལྔའི་འཆར་གཞི་བཅུ་གཅིག་པའི་སྐབས་སུ། རང་རྒྱལ་གྱིས་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་ཐད་ནས་ཕན་འབྲས་མངོན་གསལ་བླངས་པ་དང་། ནུས་ཁུངས་གྲོན་ཆུང་དང་བཙོག་རྫས་ཉུང་འདོན་བྱ་བས་ཐོན་ལས་ཀྱི་གྲུབ་ཚུལ་ལེགས་སྒྲིག་དང་ལག་རྩལ་གོང་འཕེལ་ལ་ཡར་སྐུལ་ཆེན་པོ་བྱས་ཏེ། འཛམ་གླིང་ཡོངས་ཀྱིས་ནམ་ཟླའི་འགྱུར་ལྡོག་ལ་ཁ་གཏད་འཇལ་བར་བྱས་རྗེས་གལ་ཆེན་བཞག དེང་སྐབས་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་གནས་བབ་ད་དུང་ཧ་ཅང་ཚབས་ཆེ་བས། ངེས་པར་དུ་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་གལ་ཆེན་རང་བཞིན་ལ་ངོས་འཛིན་གང་ལེགས་བྱེད་པ་དང་། ཉེན་ཁའི་འདུ་ཤེས་དང་འགན་འཁྲིའི་འདུ་ཤེས་ཇེ་དྲག་ཏུ་བཏང་སྟེ། ཚན་རིག་གི་འཕེལ་རྒྱས་ལྟ་བ་མཛུབ་སྟོན་དུ་འཛིན་པ་དང་། ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་བསམ་བློ་རྒྱུན་འཁྱོངས་ལྷོད་མེད་བྱེད་པ། བྱ་བ་ལྷོད་གཡེང་དུ་མི་གཏོང་བ། ཤུགས་ཚད་ཇེ་ཆུང་དུ་མི་གཏོང་བ། གོམ་སྟབས་ཇེ་དལ་དུ་མི་གཏོང་བ་བཅས་བྱས་ཏེ། ལོ་ལྔའི་འཆར་གཞི་བཅུ་གཉིས་པའི་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་ཕྱོགས་བསྡུས་རང་བཞིན་གྱི་བྱ་བའི་ཇུས་གཞི་ཕྱོགས་ཡོངས་ནས་དངོས་འབེབས་བྱས་ཏེ། སྔོན་དཔག་གི་དམིགས་འབེན་དུ་བསླེབ་པར་བྱེད་དགོས་ཟེར།

ཝུན་ཅ་པའོ་ཡིས་ཐུགས་རེ་ལྔ་བཏོན། གཅིག ཐོན་ལས་ཀྱི་གྲུབ་ཚུལ་ཧུར་ཐག་གིས་ལེགས་སྒྲིག་བྱས་ཏེ་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་ལ་ཡར་སྐུལ་བྱེད་དགོས། གཉིས། ཚན་རྩལ་གསར་སྐྲུན་དང་ལག་རྩལ་གོང་འཕེལ་ལ་བརྟེན་ནས་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་ལ་སྐུལ་འདེད་གཏོང་དགོས། གསུམ། ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་ཡུན་རིང་ཕན་པའི་སྒྲིག་སྲོལ་འཐུས་ཚང་དུ་གཏོང་དགོས། བཞི། ནུས་ཁུངས་གྲོན་ཆུང་དང་བཙོག་རྫས་ཉུང་འདོན་གྱི་ནུས་པ་ཇེ་ཆེར་གཏོང་དགོས། ལྔ། ཁྱབ་ཁོངས་གཙོ་བོའི་ནུས་ཁུངས་གྲོན་ཆུང་དང་བཙོག་རྫས་ཉུང་འདོན་བྱ་བ་བཟང་པོར་བསྒྲུབ་དགོས་ཟེར། །