ཟླ9པའི་ཚེས18ཉིན་གྱི་ཆུ་ཚོད20དང་སྐར་མ40སྟེང་རྒྱ་གར་བྱང་ཕྱོགས་ཀྱི་འབྲས་ལྗོངས་སུ་ཚད་རིམ6．8ཅན་གྱི་ས་ཡོམ་བྱུང་ཞིང་།དེས་བོད་ལྗོངས་གཞིས་ཀ་རྩེ་ས་ཁུལ་གྱི་གྲོ་མོ་སོགས་རྫོང་ཁག་ལ་ཤུགས་རྐྱེན་ཐེབས། མིག་སྔར་གྱི་སྡོམ་རྩིས་ལྟར་ན། ད་ཐེངས་ཀྱི་ཡོམ་འགུལ་ཤུགས་རྐྱེན་ཁྲོད་གྲོ་མོ་རྫོང་གི་མི7ཤི་བ་དང་།མི23ལ་གནོད་པ་ཐེབས།དེའི་ནང་དུ་གནོད་པ་ཚབས་ཆེན་ཐེབས་པའི་མི2ཡོད་པ་དང་།ཁང་བ་གང་མང་ཞིག་མར་རྡིབ་ཞིང་རལ་སྐྱོན་བྱུང་།དེ་མིན་གྲོ་མོ་རྫོང་མཁར་ཡོངས་ཀྱི་བརྡ་འཕྲིན་སྐུད་ལམ་ཆད་པ་དང་།བགྲོད་ལམ་ལ་གཏོར་བརླག་བཏང་ནས་འགྲོ་ལམ་ཆད།གཏིང་སྐྱེས་རྫོང་གཟར་ཤང་གི་མང་ཚོགས་ཀྱི་སྡོད་ཁང40མར་རྡིབ་པ་དང་།ཁང་པ་གཞན་དག་ལའང་ཚད་མི་འདྲ་བའི་གས་སྲུབས་ཆེན་པོ་ཤོར་ཡོད་པ་རེད།དིང་རི་རྫོང་གི་ཤང་གཉིས་ཀྱི་མང་ཚོགས་ཀྱི་ཁང་པ7མར་རྡིབ། གཞན་པའི་ཁང་པ་ཁག་ལ་ཚད་མི་འདྲ་བའི་གས་སྲུབས་ཤོར། གམ་པ་རྫོང་གི་མང་ཚོགས་ཀྱི་ཁང་པ་ཧ་ལམ500ལ་ཚད་རིམ་མི་འདྲ་བའི་གཏོར་སྐྱོན་བྱུང་།སྐྱིད་ལུང་གྲོང་རྡལ་གྱི་ཁྱིམ་ཚང་གི་ཁང་བ21མར་རྡིབ་ཤིང་།ཁྱིམ་ཚང11གི་ཁང་བར་རྡིབ་སྐྱོན་ཚབས་ཆེན་བྱུང་བ་དང་།ཁྱིམ་ཚང133གྱི་ཁང་པར་གས་སྲུབས་ཤོར་ཡོད་པ་རེད།

ཚེས19ཉིན་གྱི་སྔ་དྲོར་བོད་རང་སྐྱོང་ལྗོངས་ཏང་ཨུའི་ཧྲུའུ་ཅི་ཁྲེན་ཆུན་ཀོ་ཡིས་ལྗོངས་ཏང་ཨུའི་བྲེལ་འཚབ་གྲོས་ཚོགས་ལ་གཙོ་སྐྱོང་གནང་ནས་གྲོ་མོ་སོགས་ས་ཡོམ་གྱིས་ཤུགས་རྐྱེན་ཐེབས་པའི་རྫོང་ཁག་ཏུ་མྱུར་སྐྱོབ་བྱེད་པའི་བྱ་བ་བཀོད་སྒྲིག་གནང་།རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་བཀོད་འདོམས་པ་བྱས་པའི་ཡོམ་འགོག་མྱུར་སྐྱོབ་བཀོད་འདོམས་པུའུ་དང་།སྲིད་གཞུང་།དམག་ཁུལ།དྲག་ཆས་ཉེན་རྟོགསྤྱི་བདེ་མཐའ་སྲུང་། མེ་འགོག་མེ་གསོད་བཅས་འབྲེལ་ཡོད་འགན་ཁུར་བ་རྣམས་ཀྱིས་མཉམ་འབྲེལ་གྱིས་སྟོབས་ཤུགས་གཅིག་ཏུ་སྦྲེལ་ནས་ཕྱོགས་ཡོངས་ནས་འཚོལ་བཤེར་དང་རྩད་ཞིབ་མྱུར་སྐྱོབ།གནོད་པ་ཐེབས་པར་སྨན་བཅོས་མྱུར་སྐྱོབ་བཅས་བྱེད་པའི་ལས་ཀ་བསྒྲུབས།གནོད་ཐེབས་མང་ཚོགས་ཀྱི་འཚོ་བར་ཁག་ཐེག་བྱ་ཆེད།བོད་རང་སྐྱོང་ལྗོངས་ཀྱིས་ལམ་སང་ཆེད་སྤྱོད་མ་དངུལ་སྒོར་ཁྲི1000བཏང་སྟེ། གནོད་ཐེབས་ས་ཁུལ་གྱི་དངོས་ཟོག་གི་དགོས་མཁོ་དང་།མང་ཚོགས་ཀྱི་འགྲོ་འདུག་སྤྱོད་གསུམ་ལ་སོགས་པར་ཁག་ཐེག་བྱེད་བཞིན་ཡོད།  །