ཀྲུང་གུང་ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པོ་ཡིས་ཚེས20ཉིན་ཀྲུང་ནན་ཧེ་ཙི་ཀུང་ཀི་ནས་ལའོ་ཝོ་མི་དམངས་གསར་བརྗེ་ཏང་ཀྲུང་དབྱང་གི་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཀྲུའུ་མ་ལི་ལ་མཇལ་འཕྲད་གནང་། ཝུན་ཅ་པོ་ཡིས་གསུང་རྒྱུར། ལོ་རྒྱུས་ཀྱི་ཉམས་མྱོང་ལས་ང་ཚོར་བདེན་དཔང་བྱས་ཡོད་པ་ནི་ཀྲུང་གོ་དང་ལའོ་ཝོ་གཉིས་ཀྱིས་ཞི་བདེ་མཉམ་གནས་ཀྱི་རྩ་དོན་ལྔའི་རྨང་གཞིའི་སྟེང་ནས་ཁྱིམ་མཚེས་མཛའ་མཐུན་འབྲེལ་བར་ཤུགས་སྣོན་དང་གཉིས་ཕན་མཉམ་རྒྱལ་གྱི་མཉམ་ལས་རྒྱ་བསྐྱེད་པ་བཅས་བྱས་ཏེ། ཕན་ནུས་ལྡན་པའི་སྒོ་ནས་རང་རང་རྒྱལ་ཁབ་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ལ་སྐུལ་འདེད་བཏང་ནས་ས་ཁུལ་གྱི་ཞི་བདེ་དང་གཏན་འཇགས་ལ་སྲུང་སྐྱོབ་བྱས། ཕྱོགས་གཉིས་ཀྱིས་འཛམ་གླིང་དང་ཨེ་ཤ་ཡའི་ཁྱབ་ཁོངས་སོ་སོའི་འགྱུར་ལྡོག་ལས་བསྩལ་ཡོང་བའི་གོ་སྐབས་གསར་བ་དམ་འཛིན་བྱེད་པ་དང་འགྲན་རྩོད་ལ་མཉམ་དུ་ཁ་གཏད་འཇལ་ནས་ཀྲུང་གོ་དང་ལའོ་ཝོ་རྒྱལ་ཁབ་གཉིས་ཀྱི་ཕྱོགས་ཡོངས་ཀྱི་འཐབ་ཇུས་མཉམ་ལས་གྲོགས་པོའི་འབྲེལ་བ་སྔར་ལས་གོང་འཕེལ་དུ་འགྲོ་བར་ཡར་སྐུལ་གཏོང་དགོས་ཟེར། ཝུན་ཅ་པོ་ཡིས་བསྟན་དོན། ཀྲུང་གོ་ཕྱོགས་ཀྱིས་ལའོ་ཝོ་ཕྱོགས་དང་མཉམ་དུ་རང་རང་རྒྱལ་ཁབ་ཀྱི་འཕེལ་རྒྱས་འཐབ་ཇུས་དང་འབྲེལ་ཏེ། ཕྱོགས་གཉིས་བར་གྱི་དཔལ་འབྱོར་མཉམ་ལས་འཆར་འགོད་དང་མཐུན་སྦྱོར་བྱེད་པར་ཤུགས་བསྣན་ནས་རྨང་གཞིའི་སྒྲིག་ཆས་ཀྱི་ལས་གཞི་ཆེན་པོའི་འཛུགས་སྐྲུན་ཐད་ནས་ཕན་ཚུན་ལ་མཉམ་ལས་དང་ཀྲུང་གོ་སྲིད་གཞུང་གིས་ལའོ་ཝོ་མི་དམངས་ཀྱི་དབུལ་ཐར་དང་མི་དམངས་ཀྱི་འཚོ་བ་ལེགས་བཅོས་བྱེད་པའི་ཐད་ལ་མུ་མཐུད་དུ་རོགས་སྐྱོར་བྱེད་འདོད་ཡོད་ཟེར། ཀྲུའུ་མཱ་ལི་ཡིས་བཤད་རྒྱུར། ལའོ་ཝོ་ཕྱོགས་ཀྱིས་ཐེངས་འདིའི་འཚམས་འདྲི་ལ་ཕུན་སུམ་ཚོགས་པའི་གྲུབ་འབྲས་ཐོབ་པར་གདེང་འཇོག་ཚད་མཐོན་པོ་བྱེད་བཞིན་ཡོད་པ་དང་ཐེངས་འདིའི་འཚམས་འདྲི་བརྒྱུད་ནས་ཁྱབ་ཁོངས་སོ་སོའི་མཉམ་ལས་རྨང་གཞི་ཇེ་བརྟན་དུ་གཏོང་བར་ཤུགས་བསྣན་ཟེར། ཁོས་བསྟན་དོན། རྒྱལ་སྤྱིའི་སྤྱི་ཚོགས་ལ་འགྱུར་ལྡོག་ཇི་འདྲ་བྱུང་ཡང་ང་ཚོས་རྒྱལ་སྤྱིའི་ལས་དོན་ཁྲོད་ནས་འགྱུར་བ་མེད་པའི་སྒོ་ནས་ཀྲུང་གོ་ཕྱོགས་ཀྱི་ལངས་ཕྱོགས་རྒྱུན་འཁྱོངས་བྱས་ཏེ། ཨེ་ཤ་ཡ་ཤར་ལྷོའི་མནའ་འབྲེལ་དང་ཀྲུང་གོའི་གཉིས་ཕན་མཉམ་ལས་ཀྱི་འབྲེལ་བར་མུ་མཐུད་དུ་སྐུལ་འདེད་གཏོང་འདོད་ཡོད་ཟེར། །