ཤིན་ཧྭ་གསར་འགྱུར་ཁང་ཟི་ལིང་ནས་འབྱོར་བའི་གློག་འཕྲིན། མཚོ་སྔོན་ཞིང་ཆེན་དབུལ་སྐྱོར་གསར་སྦོལ་ཅུས་ནས་ཤེས་རྟོགས་བྱུང་གསལ། མིག་སྔར་མཚོ་སྔོན་ཞིང་ཆེན་གྱིས་ཡུལ་ཤུལ་གནོད་སྐྱོན་ཐེབས་རྗེས་ཀྱི་བསྐྱར་འཛུགས་དང་རོགས་འཛུགས་སོགས་དབུལ་སྐྱོར་གསར་སྦོལ་ཀྱི་རྣམ་གྲངས་ལག་བསྟར་བྱེད་པར་མ་དངུལ་སྒོར་དུང་ཕྱུར4ཙམ་དོན་འཁྱོལ་བྱས་པ་རེད།
      མཚོ་སྔོན་ཞིང་ཆེན་དབུལ་སྐྱོར་གསར་སྦོལ་ཅུས་ཀྱི་ཅུས་ཀྲང་གཞོན་པ་ཀྲུང་ཧའེ་ཡུའེ་ཡིས་བཤད་རྒྱུར། ཡུལ་ཤུལ་གནོད་སྐྱོན་ཐེབས་རྗེས་ཀྱི་བསྐྱར་འཛུགས་ནང་། ཀྲུང་གོ་དབུལ་སྐྱོར་ཐེབས་རྩའི་ལྷན་ཚོགས་ཀྱིས་མ་དངུལ་སྒོར་ཁྲི9000བཏང་ནས་ཐོན་ལས་བསྐྱར་འཛུགས་རྣམ་གྲངས་ལག་བསྟར་བྱས་ཏེ་ཟམ་མི་ཆད་པར་དབུལ་ཕུངས་མང་ཚོགས་ཀྱིས་ཐོན་ལས་འཕེལ་རྒྱས་བཏང་ནས་ཕྱུག་འགྱུར་ཡོང་བའི་བསམ་བློ་བསྒྱུར་བཀོད་བྱས་ཤིང་།  རྣམ་གྲངས་ཀྱི་འཁོར་སྐྱོད་ནང་རྐྱེན་འཐུས་ཚང་དུ་བཏང་བ་རེད། མིག་སྔར་ཡུལ་ཤུལ་ཁུལ་རྡོ་རྫོང་ལ་པུའུ་གྲོང་རྡལ་བདེ་དར་གྲོང་གསེབ་ཀྱི་འོ་ལས་རྟེན་གཞི་འཛུགས་འགོ་བཙུགས་ཟིན་པ་དང་།  རྒྱས་གོ་གྲོང་རྡལ་གྱིག་འགྱིག་ཤོག་དྲོད་ཁང་རྟེན་གཞིའི་སྔོ་ཚལ་སྐྱེ་ཚུལ་དགའ་འོས་པ། ཀན་དར་གྲོང་གསེབ་སྐྱེལ་འདྲེན་ཚོགས་པས་ཟླ་བ4ལྷག་ལ་འཁོར་སྐྱོད་ཚོང་གཉེར་བྱས་པས་ཡོང་འབབ་ཁེ་ཕན་སྒོར་ཁྲི90ཙམ་མངོན་གྱུར་བྱུང་།
       ཤེས་རྟོགས་བྱུང་བ་གཞིགས་ན། 《ཡུལ་ཤུལ་ས་འགུལ་གནོད་སྐྱོན་ཐེབས་རྗེས་ཀྱི་བསྐྱར་འཛུགས་སྤྱིའི་འཆར་འགོད》དུ་དབུལ་སྐྱོར་གསར་སྦོལ་དེ་གལ་ཆེ་བའི་ནང་དོན་དུ་བརྩིས་ནས་འཆར་འགོད་དེ་དབུལ་སྐྱོར་གྲོང་གསེབ་ཀྱི་ཐོན་ལས་རོགས་སྐྱོབ་དང་། གཞན་ཡུལ་དབུལ་སྐྱོར་སྤོ་སྒྱུར། དབུལ་སྐྱོར་གྲོང་གསེབ་ཕན་ཚུན་རོགས་དངུལ་སྦྱིན་པའི་ཚོད་ལྟ་ལས་ཀ་སོགས་ཀྱི་ཐད་ལ་དབུལ་སྐྱོར་བསྐྱར་འཛུགས་རྣམ་གྲངས་ལག་བསྟར་བྱེད་ཡས་ཀྱི་མ་དངུལ་སྒོར་དུང་ཕྱུར1བརྒལ་བ་བཀོད་སྒྲིག་བྱས་པ་དང་མཉམ་དུ་གནོད་སྐྱོན་ཐེབས་པའི་དབུལ་ཕུངས་དུད་ཁྱིམ་གྱི་སྡོད་ཁང་བསྐྱར་འཛུགས་ལ་ཁ་གསབ་རོགས་དངུལ་སྤྲད་པ་རེད།