ཤིན་ཧྭ་གསར་འགྱུར་ཁང་ཁྲེང་ཏུའུ་ནས་ཟླ་8ཚེས་22ཉིན་གློག་འཕྲིན་འབྱོར་གསལ།ཉེ་དུས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་།ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི།རྒྱལ་ཁབ་ཀྱི་ཀྲུའུ་ཞི་གཞོན་པ་བཅས་ཡིན་པའི་ཞིས་ཅིན་ཕིང་སི་ཁྲོན་དུ་བརྟག་ཞིབ་གནང་སྐབས་སི་ཁྲོན་གྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པ་ཚོས་བློ་མཐུན་ཧུའུ་ཅིན་ཐའོ་ཡིབདུན་གཅིག་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་ཡོམ་འགོག་གེགས་སེལ་གྱི་རླབས་ཆེའི་སྙིང་སྟོབས་དར་སྤེལ་བཏང་ནས་དཔལ་འབྱོར་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བ་དང་སྤྱི་ཚོགས་དོ་དམ་ལ་ཤུགས་སྣོན་རྒྱག་པ་དང་གསར་གཏོད་བྱས་ཏེ་སི་ཁྲོན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་དེ་ལོ་ལྔ་ཚན་བཅུ་གཉིས་པའི་རིང་མཆོང་སྐྱོད་གསར་པ་ཡོང་རྒྱུར་སྐུལ་འདེད་གཏོང་དགོས་ཞེས་ནན་བཤད་གནང་བ་རེད། 
      ཟླ8ཚེས19ནས22ཉིན་བར་ཞི་ཅིན་ཕིང་གིས་ཚ་གདུག་ཆེན་པོར་མི་འཛེམས་པར་མན་དབྱང་གྲོང་ཁྱེར་དང་།  ཏེ་དབྱང་གྲོང་ཁྱེར།  ཁྲེང་ཏུའུ་གྲོང་ཁྱེར་བཅས་ཀྱི་གྲོང་གསེབ་དང་།  ཁེ་ལས།  སྡེ་ཁུལ་དང་ཚན་ཞིབ་སྒྲིག་གཞི་བཅས་སུ་ཕེབས་ནས་སི་ཁྲོན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་གེགས་བར་རྗེས་ཀྱི་བསྐྱར་སྐྲུན་དང་ཏང་འཛུགས་སྐྱོང་གི་གནས་ཚུལ་ཐད་བརྟག་ཞིབ་གནང་བ་རེད།        ལོ་གསུམ་གོང་ཞིས་ཅིན་ཕིང་གིས་ཆེད་མངགས་སི་ཁྲོན་ས་ཡོམ་གེགས་ཁུལ་གྱི་གེགས་བར་བྱུང་བའི་མང་ཚོགས་ལ་འཚམས་འདྲི་དང་གེགས་སེལ་མི་སྣར་གཟིགས་པར་ཕེབས་མྱོང་ཡོད།ད་ཐེངས་ཁོང་གནམ་གྲུ་ནས་བབས་མ་ཐག་དང་ཐོག་རླངས་འཁོར་ནང་ཞུགས་ཏེ་སྐབས་དེ་དུས་གེགས་བར་ཚབས་ཆེ་ཤོས་བྱུང་བའི་པེ་ཁྲོན་རྫོང་དུ་ཕེབས།ལམ་བར་དུ་གྲོང་རྡལ་དང་གྲོང་སྡེ་གསར་པ་མང་པོ་ཞིག་དང་གེགས་ཁུལ་དུ་འགྱུར་ལྡོག་ཆེན་པོ་བྱུང་བ་གཟིགས་སྐབས་ཞིས་ཅིན་ཕིང་བློ་ཡིད་ཧ་ཅང་ཚིམ་པོ་བྱུང་ཞིང་།  པེ་ཁྲོན་རྫོང་ལེ་ཀུའུ་གྲོང་རྡལ་སྐྱིད་ནག་ཆའང་རིགས་གྲོང་སྡེའི་གེགས་བར་རྗེས་གསར་དུ་བསྐྲུན་པའི་ཆའང་རིགས་ཀྱི་གྲོང་སྡེའི་ནང་ཞིས་ཅིན་ཕིང་གིས་གྲོང་མི་དང་ཡུལ་སྐོར་སྤྲོ་འཆམ་བྱེད་མཁན་ཚོ་དང་བྱམས་བརྩེའི་ངང་གླེང་མོལ་གནང་བ་དང་ཡུལ་མི་ཚོ་དང་ལྷན་དུ་ཅི་འཕྲོས་མོལ་འཕྲོས་གནང་ནས་མང་ཚོགས་ཀྱི་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་།  ད་དུང་དཀའ་ངལ་གང་ཞིག་ཡོད་མེད་བརྩེ་བ་ཆེན་པོས་བཀའ་འདྲི་གནང་ནས་ཚང་མར་དཀའ་སྤྱད་འབད་འབུངས་དང་རང་སོ་སོར་བརྟེན་ནས་ཁྱིམ་གཞིས་འདི་ཉིད་དེ་བས་མཛེས་སྡུག་ལྡན་པ་དང་དེ་བས་འབྱོར་ཕྱུག་ལྡན་པ་ཞིག་ཏུ་བསྐྲུན་དགོས་པའི་སྐུལ་མ་བཏང་གནང་བ་རེད།  པེ་ཁྲོན་གྲོང་ཁྱེར་གྱི་རྫོང་གྲོང་གསར་པའི་ནང་ཞིས་ཅིན་ཕིང་གིས་ཡུས་ལུང་སྡེ་ཁུལ་དང་གྲོང་མིའི་ཁྱིམ་དུ་ཕེབས་ནས་གེགས་བར་རྗེས་ཀྱི་བསྐྱར་སྐྲུན་དང་།  སྡེ་ཁུལ་འཛུགས་སྐྲུན།གྲོང་མི་བཀོད་སྒྲིག་སོགས་ཀྱི་གནས་ཚུལ་མཁྱེན་རྟོགས་གནང་།ས་ཡོམ་གྱི་ཞིག་རོའི་སྟེང་གསར་དུ་བསྐྲུན་པའི་རྫོང་གྲོང་གི་སྲང་ལམ་གོ་རིམ་ལྡན་པ་དང་།མང་ཚོགས་བདེ་སྡོད་ལས་བརྩོན།སྐྱེ་སྟོབས་ཀྱི་དཔལ་འབར་བ་བཅས་ཀྱི་རྣམ་པ་གཟིགས་སྐབས་ཁོང་ཐུགས་ཧ་ཅང་མཉེས་པོ་བྱུང་ཞིང་།  ཤར་ཕྱོགས་རླངས་སྒུལ་འཕྲུལ་འཁོར་ཚད་ཡོད་ཀུང་སིར་ཕེབས་སྐབས་ས་ཡོམ་ཁྲོད་གནོད་འཚེ་ཚབས་ཆེན་ཕོག་པའི་ཤར་ཕྱོགས་རླངས་སྒུལ་འཕྲུལ་འཁོར་ཚད་ཡོད་ཀུང་སི་དེ་གེགས་བར་རྗེས་སླར་གསོ་དང་འཕེལ་རྒྱས་མགྱོགས་མྱུར་བྱུང་ནས་ཐོན་སྐྱེད་ནུས་པ་དེ་ས་ཡོམ་མ་བརྒྱབ་གོང་གི་ཆུ་ཚད་ལས་བརྒལ་བ་མཁྱེན་རྗེས་ཞིས་ཅིན་ཕིང་གིས་ཁོང་ཚོའི་བློ་བརྟན་འགྱུར་མེད་དང་དཀའ་སེལ་འགག་སྒྲོལ་གྱི་ཞུམ་མེད་སྙིང་སྟོབས་ལ་ཚད་མཐོའི་གདེང་འཇོག་གནང་ཞིང་།  ཞི་ཅིན་ཕིང་གིས་གེགས་ཁུལ་དུ་འགྱུར་ལྡོག་ཆེན་པོ་བྱུང་བ་ལས་ཀྲུང་ཧྭ་མི་རིགས་ནི་དཀའ་ངལ་མཐའ་དག་ལས་རྣམ་པར་རྒྱལ་ཐུབ་པའི་རླབས་ཆེན་གྱི་མི་རིགས་ཤིག་དང་སྤྱི་ཚོགས་རིང་ལུགས་ལམ་ལུགས་ཀྱིས་སྟོབས་ཤུགས་གཅིག་ཏུ་སྒྲིལ་ནས་དོན་ཆེན་བསྒྲུབ་ཐུབ་པའི་ཁྱད་འཕགས་རང་བཞིན་ར་སྤྲོད་གང་ལེགས་བྱས་ཡོད་ཅེས་མཛུབ་སྟོན་གནང་བ་རེད།