ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ9པའི་ཚེས16ཉིན་འབྱོར་བའི་གཏམ་གསར།ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ།རྒྱལ་སྲིད་སྤྱི་ཁྱབ་ཁང་གི་ཙུང་ལི་ལེ་ཁེ་ཆང་གིས་གཙོ་འགན་བཞེས་ཏེ་རྣམ་པ་གསར་པའི་གྲོང་རྡལ་ཅན་སྐྲུན་པའི་ཚོད་ལྟ་ལས་ཀའི་བཞུགས་མོལ་གྲོས་ཚོགས་འཚོགས་ནས་གལ་ཆེའི་གསུང་བཤད་གནང་བ་རེད།
    ལེ་ཁེ་ཆང་གིས་བསྟན་དོན། རང་རྒྱལ་གྱི་ས་གནས་ཁག་གི་གནས་ཚུལ་གྱི་ཧེ་བག་ཆེ་ཞིང་འཕེལ་རྒྱས་དོ་སྙོམས་མེད་པས། རྣམ་པ་གསར་པའི་གྲོང་རྡལ་ཅན་བསྐྲུན་པར་སྐུལ་འདེད་གཏོང་རྒྱུ་དེ་གནས་བབ་དང་བསྟུན་པ།རིགས་བགོས་ཏེ་ལག་བསྟར་དང་ཚོད་ལྟ་སྔོན་སྐྱོད་བྱེད་དགོས།རྒྱལ་ཁབ་ཀྱིས་རྣམ་པ་གསར་པའི་གྲོང་རྡལ་ཅན་སྐྲུན་པའི་ཕྱོགས་བསྡུས་ཚོད་ལྟ་བྱ་རྒྱུའི་འཆར་གཞི་ནང་ཞིང་ཆེན་དང་། གྲོང་ཁྱེར། རྫོང་། གྲོང་རྡལ་བཅས་རིམ་པ་མི་འདྲ་བ་དང་། ཤར་རྒྱུད་དང་དབུས་རྒྱུད།ནུབ་རྒྱུད་བཅས་ཀྱི་ས་ཁོངས་མི་འདྲ་བ་ཁྱོན་བསྡོམས62ཀྱི་ནང་ཚོད་ལྟ་ལས་ཀ་སྤེལ་རྒྱུ་ཡིན་པ་མ་ཚད། གྲོང་ཁྱེར་འབྲིང་ཆུང་དང་གྲོང་རྡལ་ཆུང་ཆུང་དུ་གཙོ་གནད་དུ་བཞག་དགོས།
    ལི་ཁེ་ཆང་གིས་གསུངས་དོན།རྣམ་པ་གསར་པའི་གྲོང་རྡལ་ཅན་སྐྲུན་པར་མི་དུང་ཕྱུག་གཅིག་ཅན་གསུམ་གྱི་གནད་དོན་ཐག་གཅོད་ཡག་པོ་བྱ་རྒྱུ་ནས་འགོ་འཛུགས་ས་བྱེད་དགོས།ཁྱད་པ་ཅན་གྱི་ཁྱིམ་གཞིས་ཆགས་པའི་སྲིད་ཇུས་ཁྱབ་བསྒྲགས་བྱས་ཏེ་ལག་ལེན་བྱེད་དགོས།བསྒྱུར་སྤྲོད་བྱ་རྒྱུ་དེ་ཞིང་ལས་ཀྱི་གནས་སྤོ་མི་གྲངས་གྲོང་རྡལ་ཡུལ་མིར་བསྒྱུར་རྒྱུ་དང་ཟུང་འབྲེལ་བྱེད་སྟངས་འཚོལ་ཞིབ་བྱེད་དགོས། ས་གནས་ཀྱིས་མ་རྐང་དབང་བའི་དངུལ་ལོ་སྡུད་རུབ་དང་། རྣམ་གྲངས་ཀྱི་དངུལ་ལོ་སྡུད་རུབ། དམིགས་བསལ་བདག་གཉེར་སོགས་ཀྱི་བྱེད་ཐབས་སྤྱོད་ནས་སྤྱི་ཚོགས་ཀྱི་མ་རྩ་གཏོང་འཇོག་ནང་འགུགས་བྱས་ཏེ་དངུལ་ལོ་སྡུད་རུབ་བྱེད་པའི་ཐབས་ལམ་རྒྱ་སྐྱེད་གཏོང་བ་དང་གྲོང་ཁྱེར་གྱི་རྨང་གཞི་སྒྲིག་ཆས་ཀྱི་ལྕོགས་ནུས་མཐོ་རུ་གཏོང་དགོས། གྲོང་ཁྱེར་དུ་འཇུག་པའི་ཞིང་པ་རྣམས་གྲོང་རྡལ་གྱི་སྡོད་ཁང་དང་སྤྱི་ཚོགས་འགན་ལེན་གྱི་མ་ལག་ཏུ་འཇུག་བཅུག་སྟེ་ཞིང་ལས་ཀྱི་གནས་སྤོ་མི་གྲངས་དུང་ཕྱུར1ཉེ་བ་གྲོང་རྡལ་ཅན་དུ་ཁྱིམ་གཞིས་ཆགས་པར་སྐུལ་འདེད་བཏང་སྟེ་ཁོ་ཚོ་ཟུར་དུ་ལྷག་བཅུག་མི་ཉན། ཚན་རིག་དང་མཐུན་པ་འཆར་འགོད་བྱས་ཐོག་འགན་ལེན་རང་བཞིན་གྱི་སྡོད་ཁང་ལ་མ་དངུལ་གཏོང་འཇོག་དང་སྡུད་རུབ་བྱེད་པའི་ནང་རྐྱེན་དང་ས་ཞིང་བེད་སྤྱོད་ཀྱི་སྲིད་ཇུས་གསར་སྐྲུན་བྱེད་དགོས།སྤྱི་ཚོགས་ཀྱི་མ་དངུལ་དེ་བས་མང་པོ་ནང་འགུགས་བྱས་ནས་སྤྱི་པའི་སྒྲིག་སྦྱོར་སྒྲིག་ཆས་སྐྲུན་པར་ཤུགས་སྣོན་བརྒྱབ་སྟེ་མི་དུང་ཕྱུར1ཉེ་བས་བསྡད་པའི་རིགས་སོ་སོའི་སྤྱིལ་ཁང་དང་གྲོང་ཁྱེར་ནང་གི་གྲོང་སྡེ་ལེགས་བཅོས་ཇེ་མགྱོགས་སུ་གཏོང་བར་སྐུལ་འདེད་བཏང་སྟེ་དཀའ་ངལ་ཡོད་པའི་མང་ཚོགས་སྔ་སྣུར་ཙམ་སྤྱིལ་ཁང་ནས་སྡོད་ཁང་དུ་གནས་སྤོ་བྱེད་དུ་བཅུག་ནས་ཁོ་ཚོར་བདེ་སྡོད་ལས་བརྩོན་བྱེད་དུ་འཇུག་དགོས། རྨང་གཞི་སྒྲིག་ཆས་འཛུགས་སྐྲུན་མགྱོ གས་པོ་བྱས་ཏེ་ལོ་ལྔའི་འཆར་གཞི་བཅུ་གསུམ་པའི་དུས་སུ་གཙོ་གནད་དུ་དབུས་རྒྱུད་དང་ནུབ་རྒྱུད་ལ་གཟིགས་སྐྱོང་བྱས་ཏེ་མི་དུང་ཕྱུར1ཉེ་བས་དབུས་རྒྱུད་དང་ནུབ་རྒྱུད་ཀྱི་ཐག་ཉེ་སར་གྲོང་རྡལ་ཅན་དུ་འགྱུར་བར་སྐུལ་དེད་བཏང་སྟེ་གཞི་ཁྱོན་ཆེ་བའི་མི་གྲངས་གནས་སྤོ་བྱེད་ཚུལ་ཉུང་དུ་གཏོང་དགོས།
    ལི་ཁེ་ཆང་གིས་ནན་གསུང་གནང་དོན།རྣམ་པ་གསར་པའི་གྲོང་རྡལ་ཅན་ནི་དེང་རབས་ཅན་གྱི་ཁྱོན་ཡོངས་དང་འབྲེལ་བ་ཡོད་པའི་ཐབས་ཇུས་ཆེན་པོ་ཞིག་ཡིན་ལ། ཆེས་ཆེ་བའི་ཆགས་ཚུལ་ལེགས་སྒྲིག་བྱེད་པ་དང་། མི་དུང་ཕྱུར་ཁ་ཤས་ཀྱི་འཚོ་བ་ལེགས་བཅོས་བྱ་རྒྱུ་དང་ཡང་འབྲེལ་བ་ཡོད་པ་རེད།ས་གནས་ཁག་དང་འབྲེལ་ཡོད་སྡེ་ཁག་གིས་དོན་འཁྱོལ་ཡག་པོ་བྱས་ཏེ་བཅོས་བསྒྱུར་གསར་སྐྲུན་གྱི་གོ་སྐབས་དང་བསྟུན་ནས་ཤུགས་ཆེན་པོས་རྣམ་པ་གསར་པའི་གྲོང་རྡལ་ཅན་སྐྲུན་པའི་སྤུད་ཚད་དང་ཆུ་ཚད་མཐོ་རུ་བཏང་ནས་རྒྱ་ཆེ་བའི་གྲོང་ཁྱེར་དང་གྲོང་གསེབ་ཀྱི་མང་ཚོགས་ལ་བདེ་སྐྱིད་སྐྲུན་དགོས།