ཟླ་བརྒྱད་པའི་ཚེས་བཅུ་ཉིན་གསར་འགོད་པས་མཚོ་སྔོན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིན་ནས་ཤེས་པའི་གནས་ཚུལ་ལྟར་ན། བོད་ཁུལ་གྱི་མཐོ་རིམ་སློབ་གྲྭའི་མཐར་ཕྱིན་སློབ་མའི་ལས་ཞུགས་ནུས་པ་ཇེ་ཆེར་གཏོང་ཆེད། རང་ཞིང་གིས་འབྲེལ་ཡོད་འཆར་གཞི་ལག་བསྟར་བྱས་ཏེ་ད་ལོར་སྔ་གཞུག་ཏུ་མི་དྲུག་བརྒྱ་ལྷག་ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་དུ་མངགས་ནས་གསོ་སྦྱོང་བྱེད་རྒྱུ་རེད།

ཤེས་པའི་གནས་ཚུལ་ལྟར་ན། མཚོ་སྔོན་བོད་ཁུལ་གྱི་མཐོ་རིམ་སློབ་གྲྭའི་མཐར་ཕྱིན་སློབ་མའི་ལས་ཞུགས་ནུས་པ་ཇེ་ཆེར་གཏོང་བའི་འཆར་གཞི་དེ་གཙོ་བོ་མཚོ་སྔོན་གྱི་བྱ་བ་མེད་པའི་མཐོ་རིམ་སློབ་གྲྭའི་མཐར་ཕྱིན་སློབ་མ་དང་མཐོ་འབྲིང་མཐར་ཕྱིན་རྗེས་སློབ་གྲྭ་ཆེན་མོ་མ་འགྲིམས་པའི་སློབ་མར་ཁ་ཕྱོགས་པ་དང་། ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་གྱི་ལས་ཞུགས་ཚོང་ར་དང་སྤུས་ལེགས་སློབ་གསོའི་ཐོན་ཁུངས་ལ་བརྟེན་ཏེ་གསོ་སྦྱོང་བྱས་ནས་ལས་ཞུགས་ནུས་པ་ཇེ་ཆེར་གཏོང་རྒྱུ་ཡིན་པར་མ་ཟད་ལས་ཞུགས་ཐབས་ལམ་རྒྱ་བསྐྱེད་རྒྱུ་རེད།