གསར་འགོད་པས་ཚེས་སོ་གཅིག་ཉིན་དམངས་སྲིད་པུའུ་རྒུད་སྐྱོབ་ཟི་ནས་ཤེས་པའི་གནས་ཚུལ་ལྟར་ན། ཟླ་བདུན་པའི་ཚེས་གཅིག་ཉིན་ནས་བཟུང་སེར་བ་བབས་པ་དང་རླུང་ཆེན་གཡུགས་པ། དྲག་ཆར་བབས་པ་སོགས་གནོད་འཚེ་ཆེ་བའི་ནམ་ཟླའི་འགྱུར་ལྡོག་གི་དབང་གིས་རྒྱལ་ཡོངས་ཀྱི་ཞིང་ཆེན་མང་ཆེ་བར་ཚད་མི་འདྲ་བའི་སྒོ་ནས་མི་ལ་ཤི་རྨས་དང་རྒྱུ་ནོར་ལ་གྱོང་གུད་ཐེབས་ཟེར། རྒྱལ་ཁབ་གནོད་སེལ་ཨུ་ཡོན་ལྷན་ཁང་གཞུང་སྒྲུབ་ཁང་གིས་བསྡོམས་རྩིས་བྱས་པ་ལྟར་ན། ཟླ་བདུན་པའི་ཚེས་སོ་གཅིག་ཉིན་བར་པེ་ཅིན་དང་ཧི་པེ། ཧྲན་ཞི། ནང་སོག ལེའོ་ཉིན། ཅི་ལིན། ཧེ་ལུང་ཅང་། ཧྲང་ཧེ། ཅང་སུའུ། ཧྲན་ཏུང་། ཧི་པེ། ཧུའུ་པེ། ཧུའུ་ནན། ཀོང་ཞི། ཀོང་ཏུང་། ཁྲུང་ཆིན། སི་ཁྲོན། ཀོས་ཀྲིག ཡུན་ནན། བོད་ལྗོངས། ཧྲན་ཞི། ཀན་སུའུ། མཚོ་སྔོན། ཉིན་ཞ། ཞིན་ཅང་བཅས་ཞིང་ཆེན་དང་རང་སྐྱོང་ལྗོངས་ཉེར་བདུན་དང་གྲོང་ཁྱེར་དང་ཁུལ་བརྒྱ་དང་དོན་དགུ། རྫོང་དང་གྲོང་བརྡལ། ཞིན་ཅང་འཛུགས་སྐྲུན་དམག་དཔུང་བཅས་ས་གནས་དྲུག་བརྒྱ་དང་བརྒྱད་ཅུ་ལྷག་གི་མི་བྱེ་བ་གཉིས་དང་འབུམ་གཅིག་ཁྲི་དྲུག་སྟོང་ལྔ་ལ་གནོད་འཚེ་ཐེབས་ཏེ། མི་གོ་བདུན་རྐྱེན་ལམ་དུ་ཤོར་བ་དང་དེའི་ནང་གི་མི་དྲུག་ཅུ་ཐོག་གིས་བརྒྱབ་ནས་བསད་པ་རེད། ཁང་བ་གྱན་ཁྲི་གཅིག་དང་སྟོང་དྲུག་བརྡིབས་པ་དང་གྱན་འབུམ་གཅིག་དང་ཁྲི་ལྔ་སྟོང་བརྒྱད་ལ་གནོད་པ་ཐེབས་པར་མ་ཟད། ཐད་ཀར་དུ་སྒོར་མོ་དུང་ཕྱུར་བརྒྱ་དང་སོ་གཉིས་དང་བྱེ་བ་བརྒྱད་ལྷག་གི་དཔལ་འབྱོར་གྱོང་གུད་ཐེབས་པ་དང་། དེའི་ནང་ཅང་སུའུ་དང་ཧུའུ་པེ། ཧྲན་ཞི། ཀན་སུའུ་སོགས་ཞིང་ཆེན་དུ་གནོད་པ་ཚབས་ཆེན་ཐེབས།