ཟླ7པའི་ཚེས27ཉིན། ཀྲུང་གོའི་བོད་སྐད་སྨྱན་བྱད་གྲོས་ཚོགས་ཐེངས་བཅུ་གཉིས་པའི་འཐུས་ཚབ་ཚོགས་པའི་མི30ལྷག་ཆེད་དུ་མཚོ་ལྷོར་ལྟ་ཞིབ་བྱེད་པར་ཡོང་། ཟླ7པའི་ཚེས28ཉིན། མཚོ་ལྷོ་ཁུལ་ཨུའི་དྲིལ་སྒྲོག་པུའུ་དང་མཉམ་དུ་མཚོ་ལྷོ་ཁུལ་གྱི་སློབ་གསོའི་ཕྱོགས་བསྡུས་བཅོས་སྒྱུར་བྱ་བ་དང་། མི་རིགས་ཀྱི་སྐད་དང་ཡི་གེའི་བྱ་བ། གྲོང་ཁྱེར་གྱི་འགན་སྲུང་རང་བཞིན་གྱི་སྡོད་ཁང་གི་བཟོ་སྐྲུན། སྐྱེ་ཁམས་ཕྱུགས་ལས་འཛུགས་སྐྲུན་སོགས་ཀྱི་གནས་ཚུལ་ལ་ཡུལ་དངོས་སུ་ལྟ་ཞིབ་རྒྱུས་ལོན་བྱས་པ་རེད།

སློབ་གསོའི་ཕྱོགས་བསྡུས་བཅོས་སྒྱུར་ཐད་ཀྱི་གྲུབ་འབྲས་མངོན་པར་གསལ་བ།

2007ལོ་ནས་བཟུང་མཚོ་ལྷོ་ཁུལ་གྱིས་སློབ་གསོའི་འཕེལ་རྒྱས་ཀྱི་ད་ལྟའི་གནས་བབས་གཞིར་བྱས་ཏེ། སློབ་གསོ་འདྲ་མཉམ་ཡོང་བར་སྐུལ་སྤེལ་སྒོས་སློབ་གཉེར་ཆ་རྐྱེན་ཇེ་ལེགས་དང་གྲོང་སྡེའི་སློབ་གསོར་གཅིག་གྱུར་འཆར་འགོད་ཀྱི་ཚོད་ལྟའི་བྱ་བ་ཁྱོན་ཡོངས་ནས་སྤེལ་ཏེ་ཁུལ་ཡོངས་ཀྱི་མི་རིགས་སོ་སོར་སྤྱི་བའི་སློབ་གསོའི་ཞབས་འདེགས་ལེགས་པོ་འདོན་སྤྲོད་བྱས་པས། སློབ་གཉེར་གྱི་ཆ་རྐྱེན་དང་སྐད་གཉིས་སློབ་གསོ་སོགས་ཀྱི་ཐད་ལ་གྲུབ་འབྲས་གཟེངས་སུ་ཐོན།

མི་རིགས་སྐད་ཡིག་བྱ་བའི་ཐད་ཀྱི་གྲུབ་འབྲས་གཡུར་དུ་ཟ་བ།

མཚོ་ལྷོ་ཁུལ་གྱིས་མར་ལེ་རིང་ལུགས་ཀྱི་སྐད་དང་ཡི་གེ་འདྲ་མཉམ་གྱི་རྩ་དོན་རྒྱུན་འཁྱོངས་དང་། ཏང་གི་མི་རིགས་ཀྱི་སྐད་ཡིག་སྲིད་ཇུས་ལག་བསྟར། བོད་སྐད་ཡིག་གི་ལོ་ཙཱ་དང་པར་སྐྲུན་སོགས་ཀྱི་བྱ་གཞག་ལེགས་སྤེལ། མི་རིགས་སྐད་ཡིག་གི་དྲ་རྒྱའི་ཆ་འཕྲིན་འཛུགས་སྐྲུན་གོང་སྤེལ་བྱེད་པ་བཅས་ཀྱི་སྒོ་ནས། བོད་ཀྱི་སྐད་དང་ཡི་གེའི་བྱ་བས་ཁུལ་ཡོངས་ཀྱི་རིགས་སོ་སོའི་བྱ་གཞག་འཕེལ་རྒྱས་ཁྲོད་དུ་ནུས་པ་གལ་ཆེན་འདོན་པ་སོགས་གྲུབ་འབྲས་ལེགས་པོ་བླངས་འདུག

འགན་སྲུང་རང་བཞིན་གྱི་སྡོད་ཁང་བཟོ་སྐྲུན་གྱིས་མང་ཚོགས་ལ་གཞིས་ཁྱིམ་སྐྱིད་པོ་སྐྲུན་པ།

མཚོ་ལྷོ་ཁུལ་ཨུ་དང་སྲིད་གཞུང་གིས་འགན་སྲུང་རང་བཞིན་གྱི་གཞིས་ཁང་བཟོ་སྐྲུན་འཛུགས་སྐྲུན་བྱེད་པ་དེ་མ་དངུལ་གཏོང་བའི་སྒྲིག་གཞི་ལེགས་སྒྱུར་བྱེད་པ་དང་། གྲོང་སྡེ་འཕེལ་རྒྱས་ཀྱི་འཆར་གཞི་གཅིག་གྱུར་དུ་གཏོང་བ། དམངས་འཚོ་ལེགས་སྐྱོང་གི་བྱ་གཞག་རླབས་ཆེན་ཞིག་ཏུ་བཟུང་ནས། “བརྒྱ་ཆའི་བརྒྱ་ཅན་གསུམ”གྱི་དམིགས་འབེན་དང་བླང་བྱ་མངོན་འགྱུར་བྱས། 2011ལོར་ཁུལ་ཡོངས་སུ་གླ་བདེ་ཁང་བ24350དང་། སྤྱི་བའི་བོགས་གཏོང་ཁང་བ9000དང་། གྲོང་ཁྱེར་གྱི་ཁང་བ་ཐབས་ཆག་ཞིག་གསོ་བྱེད་པའི་དུད་ཚང2800དང་། རྒྱལ་ཁབ་ལ་དབང་བའི་བཟོ་གཏེར་ཁུལ་གྱི་ཁང་བ་ཐབས་ཆག་ཞིག་གསོ་བྱེད་པ་དུད་ཚང4800དང་། རྒྱལ་ཁབ་ལ་དབང་བའི་གསར་སྦོལ་ས་ཁུལ་དང་ནགས་རའི་ཉེན་ཁང་ཞིག་གསོ་བྱེད་པའི་དུད་ཚང1916བཅས་གསར་འཛུགས་བྱེད་གྲབས་ཡོད།

སྐྱེ་ཁམས་ཕྱུགས་ལས་ཐད་ལ་རྒྱལ་ཁབ་ཀྱི་རྒྱུན་སྐྱོང་ཐུབ་པའི་འཕེལ་རྒྱས་དང་མཐུན་པའི་བགྲོད་ལམ་འཚོལ་སྙེག་བྱེད་བཞིན་པ།

མཚོ་ལྷོ་ཁུལ་གྱིས་གསེར་ཆེན་རྫོང་དང་། འབའ་རྫོང་། མང་རྫོང་བཅས་པའི་རྫོང་གསུམ་དང་སྡེ་བ་གསུམ་དུ་སྐྱེ་ཁམས་ཕྱུགས་ལས་སྤེལ་བའི་ཚོད་ལྟའི་གནས་བཙུགས་ཏེ་རྩྭ་ས་ལེགས་བསྡུས་ཞིབ་གཉེར་བྱེད་པ་དང་། རྩྭ་འདེབས་ཕྱུགས་སྐྱོང་། ཕྱུགས་ལྷས་སུ་ཕྱུགས་སྐྱོང་བ་བཅས་ཀྱི་སྐྱེ་ཁམས་ཕྱུགས་ལས་ཀྱི་འཕེལ་ཚུལ་ཆགས་གྲུབ་བྱུང་བར་བརྟེན། རྒྱལ་ཁབ་ཀྱི་རྒྱུན་སྐྱོང་ཐུབ་པའི་འཕེལ་རྒྱས་དང་མཐུན་པའི་སྐྱེ་ཁམས་ཕྱུགས་ལས་ཀྱི་ཚོད་ལྟ་བྱེད་ཁུལ་འཚོལ་སྙེག་བྱེད་བཞིན་མཆིས།