ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིས་ཁི་ཆང་གིས་ཉེ་ལམ་ཨན་ཧོས་ཞིང་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ལ་རྟོག་ཞིབ་མཛད། ཁོང་གིས་ང་ཚོས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི་ཀྲུང་གོ་གུང་ཁྲན་ཏང་དབུ་བརྙེས་ཏེ་ལོ90འཁོར་བའི་རྟེན་འབྲེལ་ཚོགས་ཆེན་སྟེང་གི་གསུང་བཤད་ལ་ནན་ཏན་གྱིས་སློབ་སྦྱོང་དང་། དེ་ལ་གོ་བ་ཟབ་མོ་ཟབ་མོ་ལེན་དགོས་པར་མ་ཟད། དགོངས་དོན་དེ་བྱ་བ་སྣ་ཚོགས་ཀྱི་ཁྲོད་དུ་དངོས་འབེབས་དང་དོན་ཐོག་ཏུ་འཁྱོལ་བར་བྱེད་པ་དང་། ཚན་རིག་ལྟར་འཕེལ་རྒྱས་སུ་གཏོང་བ་རྒྱུན་འཁྱོངས་དང་། དཔལ་འབྱོར་འཕར་སྟངས་མྱུར་དུ་བསྒྱུར་བ། གྲུབ་ཚུལ་ལེགས་སྒྲིག་བྱེད་པའི་ཁྲོད་དུ་འཕེལ་སྟངས་ཇེ་བརྟན་དུ་བཏང་ནས། ལོ་ལྔའི་འཆར་གཞི12པ་མངོན་དུ་འགྱུར་བར་མགོ་བཟང་བོ་ཞིག་རྩོམ་དགོས་ཞེས་ནན་གྱིས་གསུངས། རྟོག་ཞིབ་མཛད་སྐབས། ལིས་ཁི་ཆང་གིས་ཉེ་བའི་ལོ་འགར་ཨན་ཧོས་ཞིང་ཆེན་གྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ནས་བླངས་པའི་གྲུབ་འབྲས་ཁས་ལེན་གང་ལེགས་མཛད་པ་དང་། ཨན་ཧོས་ཞིང་ཆེན་གྱིས་མུ་མཐུད་དུ་ཁྱད་སྟོབས་འདོན་སྤེལ་དང་། ཞིང་ཆེན་ཡོངས་ཀྱི་འཕེལ་རྒྱས་ལ་གཅིག་གྱུར་གྱིས་འཆར་འགོད་དང་། གསར་སྐྲུན་དང་འཕེལ་སྟངས་བསྒྱུར་བར་ཡར་སྐུལ་བཏང་ནས། དབུས་རྒྱུད་དར་རྒྱས་སུ་གཏོང་བའི་ཁྲོད་དུ་མཆོང་སྐྱོད་གསར་བ་མངོན་འགྱུར་བྱེད་དགོས་པའི་ཐུགས་རེ་བཏོན།