གསར་འགོད་པས་སི་ཁྲོན་ཞིང་ཆེན་ནོར་སྲིད་ཐིན་ནས་རྒྱུས་ལོན་བྱུང་བའི་གནས་ཚུལ་ལྟར་ན། ད་ལོའི་སྟོན་ཁའི་སློབ་མགོ་རྩོམ་སྐབས། སི་ཁྲོན་ཞིང་ཆེན་བོད་ཁུལ་གྱི་སློབ་གྲྭ་འབྲིང་ཆུང་གི་བཅའ་སྡོད་སློབ་གྲྭའི་སློབ་མའི་འཚོ་བའི་ཁ་གསབ་ཚད་གཞི་གཅིག་གྱུར་སྒོས་ཇེ་མཐོར་བཏང་སྟེ་སློབ་སྐབས་རེར་སློབ་མ་རེར་སྒོར་མོ་སྟོང་གཅིག་དང་བཞི་བརྒྱ་ལྔ་བཅུ་སྟེར་རྒྱུ་ཡིན་པ་དང་། མ་དངུལ་དེ་དག་སི་ཁྲོན་ཞིང་ཆེན་ནོར་སྲིད་ཐིན་གྱིས་བཀོད་སྒྲིག་བྱེད་རྒྱུ་རེད་ཟེར།
 སྔར་ལས་ལྷག་པའི་སྒོ་ནས་བོད་ཁུལ་གྱི་བཅའ་སྡོད་ལུགས་ཀྱི་སློབ་གྲྭའི་སློབ་མར་རོགས་སྐྱོར་བྱེད་པའི་ཤུགས་ཚད་ཇེ་ཆེར་གཏོང་བ་དང་། རོང་འབྲོག་ཁྱིམ་ཚང་གི་དཔལ་འབྱོར་ཁུར་བོ་ཇེ་ཡང་དུ་གཏོང་བ། བོད་ཁུལ་གྱི་འཆམ་མཐུན་བརྟན་འཇགས་ལ་ཡར་སྐུལ་གཏོང་ཆེད། སི་ཁྲོན་ཞིང་ཆེན་སྲིད་གཞུང་གིས་ཆོག་མཆན་བཀོད་པ་བརྒྱུད། སི་ཁྲོན་ཞིང་ཆེན་ནོར་སྲིད་ཐིན་དང་། ཞིང་ཆེན་སློབ་གསོ་ཐིན་གཉིས་ཀྱིས་སི་ཁྲོན་བོད་ཁུལ་གྱི་སློབ་གྲྭ་འབྲིང་ཆུང་གི་བཅའ་སྡོད་ལུགས་ཀྱི་སློབ་གྲྭའི་སློབ་མའི་འཚོ་བའི་གྲོན་དངུལ་ཁ་གསབ་ཚད་གཞི་ཇེ་མཐོར་གཏོང་རྒྱུའི་ཐག་བཅད།
 ཁ་གསབ་ཚད་གཞི་གསར་བ་དུས་ལྟར་ལག་བསྟར་བྱེད་པར་ཁག་ཐེག་བྱེད་ཆེད། ཉེ་ལམ། སི་ཁྲོན་ཞིང་ཆེན་ནོར་སྲིད་ཐིན་གྱིས་ད་ལོའི་སྟོན་ཁའི་སློབ་སྐབས་ཀྱི་ཁ་གསབ་མ་དངུལ་སྒོར་མོ་བྱེ་བ་གཉིས་དང་ས་ཡ་བཞི་འབུམ་ལྔ་ཁྲི་བདུན་བཏང་།