མཚོ་སྔོན་ཞིང་ཆེན་སྲིད་གྲོས་ཀྱི་ཀྲུའུ་ཞི་པདྨ་ཀྲུའུ་ཞི་གཞོན་པ་ཁྲིན་ཙི་ཆོན་དང་པའོ་ཡུས་ཀྲི མཚོ་སྔོན་ཞིང་ཆེན་སྲིད་གྲོས་འབྲེལ་ཡོད་སྡེ་ཁག་གི་འགན་ཁུར་བ་དང་མཉམ་དུ་ཟླ་ལྔ་བའི་ཚེས་སོ་གཅིག་ཉིན། ཟི་ལིང་གྲོང་ཁྱེར་གྱི་བྱིས་པའི་ཕན་བདེ་གླིང་དང་ཟི་ལིང་གྲོང་ཁྱེར་འོན་ལྐུགས་སློབ་གྲྭ། ཟི་ལིང་གྲོང་ཁྱེར་ཧུའུ་ཐེ་སློབ་ཆུང་བཅས་ལ་སོང་ནས་ན་ཆུང་བྱིས་པ་དང་དགེ་རྒན། ལས་བཟོ་བ་བཅས་ལ་ལྟ་སྐོར་བྱས་ཏེ་བྱིས་པ་རྣམས་ལ་རྒྱལ་སྤྱིའི་བྱིས་པའི་དུས་ཆེན་གྱིས་རྟེན་འབྲེལ་ཞུས་པར་མ་ཟད་འཚམས་འདྲིའི་སྒོར་མོ་བྱིན།
  ཟི་ལིང་གྲོང་ཁྱེར་བྱིས་པའི་ཕན་བདེ་གླིང་དུ་པདྨ་འཁོར་དང་བཅས་བ་སྔ་གཞུག་ཏུ་བྱ་འགུལ་ཁང་དང་རིགས་མང་བའི་ཁྱད་པར་ཅན་གྱི་སློབ་ཁང་སོགས་ལ་སོང་ནས། ད་ཕྲུག་དང་དབང་བོ་སྐྱོན་ཅན་ལ་ལྟ་སྐོར་བྱས་ཏེ་བདག་གཉེར་བ་རྣམས་ལ་བྱིས་པ་ཚོའི་ལུས་ཕུང་དང་སློབ་སྦྱོང་གི་གནས་ཚུལ་ཞིབ་ཏུ་དྲིས་པ་དང་། ཁྱད་པར་ཅན་གྱི་སློབ་ཁང་དུ་ད་ཕྲུག་དང་དབང་བོ་སྐྱོན་ཅན་རྣམས་ཀྱིས་མགྲོན་པོར་འཚམས་འདྲི་དང་རིག་རྩལ་ལེ་ཚན་འཁྲབ་སྟོན་བྱས། ཟི་ལིང་གྲོང་ཁྱེར་འོན་ལྐུགས་སློབ་གྲྭ་ནས་ན་ཆུང་བྱིས་པ་རྣམས་ཀྱིས་མེས་རྒྱལ་ལགས། ང་ཁྱེད་ལ་དགའ་ཞེས་པའི་ལག་བརྡ་དང་བཅས་སྟེ་མགྲོན་པོར་བརྩེ་སེམས་མཚོན་པར་བྱས་པ་དང་། པདྨ་འཁོར་དང་བཅས་བས་བྱིས་པ་ཚོ་དང་མཉམ་དུ་པར་བླངས་ནས་དྲན་རྟེན་དུ་བཞག
  ཟི་ལིང་གྲོང་ཁྱེར་ཧུའུ་ཐེ་སློབ་ཆུང་ནས་པདྨ་འཁོར་དང་བཅས་པས་བྱིས་པ་རྣམས་ལ་དུས་ཆེན་གྱི་འཚམས་འདྲི་བྱས་པ་དང་། སྤྲོ་སེམས་ཀྱིས་ཁེངས་པའི་སློབ་མ་རྣམས་ཀྱིས་མགྲོན་པོ་རྣམས་ཀྱི་སྐེ་ལ་སྐེ་དཀྲིས་དམར་པོ་བཏགས་པ་དང་། སློབ་གྲྭའི་གྲོས་ཚོགས་ཁང་ནས་པདྨ་འཁོར་དང་བཅས་པར་ཧུའུ་ཐེ་སློབ་ཆུང་གི་འགན་ཁུར་བས་སློབ་གྲྭའི་འཛུགས་སྐྲུན་སོགས་ཀྱི་གནས་ཚུལ་ཡར་ཞུ་བྱས་པ་དང་། པདྨས་ཧུའུ་ཐེ་སློབ་ཆུང་ཡར་རྒྱས་གོང་འཕེལ་ཡོང་བའི་སྨོན་འདུན་ཞུས།