ཚེས་ཉེར་དགུ་ཉིན་མཚོ་སྔོན་ཞིང་ཆེན་ཏང་ཨུས་ཏང་ཕྱིའི་མི་སྣའི་བཞུགས་མོལ་ཚོགས་འདུ་བསྡུས་ཏེ། ཟི་ལིང་ས་ཁུལ་གྱི་དམངས་གཙོ་ཏང་ཁག་སོ་སོ་དང་། བཟོ་ཚོང་མཉམ་འབྲེལ་ལྷན་ཚོགས་དེ་མིན་སྤྱི་ལ་དབང་བའི་ལམ་ལུགས་མིན་པའི་དཔལ་འབྱོར་མི་སྣ། ཏང་ཁག་གང་ལའང་མི་གཏོགས་པའི་མི་སྣ། མི་རིགས་ཆོས་ལུགས་ལས་རིགས་ཀྱི་མི་སྣར་མཚོ་སྔོན་གྱིས་ཁྱད་ཆོས་དང་ཁྱད་སྟོབས་ཅན་གྱི་ཐོན་ལས་ཆེན་པོ་བཅུ་གསར་སྐྲུན་བྱས་པའི་གནས་ཚུལ་ཁྱབ་བསྒྲགས་བྱས།
 མཚོ་སྔོན་ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཧྲིན་ཀྲང་གཞོན་པ་ལོ་ཡུས་ལིན་གྱིས་བཞུགས་མོལ་ཚོགས་འདུར་མགོ་འཛིན་བྱས། མཚོ་སྔོན་ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ་མཱ་ཀྲི་བེ་དང་མཱ་ཁྲང་ཆིན། དེ་མིན་མཚོ་སྔོན་ཞིང་ཆེན་སྲིད་གཞུང་གཞུང་སྒྲུབ་ཐིན་དང་། མཚོ་སྔོན་ཞིང་ཆེན་དཔལ་འབྱོར་ཨུ་ཡོན་ལྷན་ཁང་། མཚོ་སྔོན་ཞིང་ཆེན་རྒྱལ་ཁབ་ས་ཁོངས་ཐོན་ཁུངས་ཨུ་ཡོན་ལྷན་ཁང་། མཚོ་སྔོན་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་བཅས་ཀྱི་འབྲེལ་ཡོད་མགོ་ཁྲིད་པ་བཞུགས་མོལ་ཚོགས་འདུར་ཞུགས།
 ཚོགས་འདུར་ཞུགས་པའི་ཏང་ཕྱིའི་མི་སྣས་གཏམ་བཤད་སྐབས། མཚོ་སྔོན་ཞིང་ཆེན་གྱིས་སྔར་ལས་ཁྱད་ཆོས་དང་ཁྱད་སྟོབས་ལྡན་པའི་ཐོན་ལས་གསར་སྐྲུན་བྱེད་པའི་ཐད་ལ་བསམ་འཆར་དང་གྲོས་གཞི་བཏོན། ཏང་ཕྱིའི་མི་སྣས་བལྟས་ན། ཉེ་བའི་ལོ་འགའི་རིང་ལ། མཚོ་སྔོན་ཞིང་ཆེན་ཏང་ཨུ་དང་མཚོ་སྔོན་ཞིང་ཆེན་སྲིད་གཞུང་གིས་ཤུགས་ཆེན་པོས་ཁྱད་ཆོས་དང་ཁྱད་སྟོབས་ལྡན་པའི་ཐོན་ལས་འཕེལ་རྒྱས་སུ་གཏོང་བར་ཡར་སྐུལ་བྱས་ནས། མཚོ་སྔོན་ཞིང་ཆེན་གྱི་འཕེལ་རྒྱས་ཀྱི་རྣམ་པ་བསྒྱུར་བ་དང་། ཐོན་ལས་གྲུབ་ཚུལ་ལེགས་སྒྲིག་དང་ཇེ་ལེགས་སུ་བཏང་བ་དང་། མཚོ་སྔོན་ཞིང་ཆེན་གྱི་བཟོ་ལས་དཔལ་འབྱོར་བཟང་ཞིང་མགྱོགས་པོའི་སྒོ་ནས་འཕེལ་རྒྱས་སུ་གཏོང་བར་གསོན་ཤུགས་གསར་བ་བསྣན་ཟེར།
 གྲོས་ཚོགས་སུ་ཞུགས་པའི་མི་སྣས་བཏོན་པའི་བསམ་འཆར་དང་གྲོས་གཞིར་ཉན་རྗེས། ལོ་ཡུས་ལིན་གྱིས་བཤད་རྒྱུར། མཚོ་སྔོན་ཞིང་ཆེན་གྱི་དམངས་གཙོ་ཏང་ཁག་སོ་སོ་དང་། བཟོ་ཚོང་མཉམ་འབྲེལ་ལྷན་ཚོགས། ཏང་ཁག་གང་ལའང་མི་གཏོགས་པའི་མི་སྣ། མི་རིགས་ཆོས་ལུགས་ལས་རིགས་ཀྱི་མི་སྣས་དམངས་གཙོ་ལྟ་རྟོག་དང་སྲིད་ཞུགས་སྲིད་གྲོས་ཀྱི་འགན་ནུས་འདོན་སྤེལ་བྱས་པ་དང་། ནན་ཏན་གྱིས་བསམ་གཞིགས་བཏང་ནས། ཞིབ་བཤེར་དང་ཞིབ་འཇུག་བྱ་བ་ནན་ཏན་གྱིས་སྤེལ་བ་དང་། བཏོན་པའི་བསམ་འཆར་དང་གྲོས་གཞི་དེ་མཚོ་སྔོན་གྱི་དོན་དངོས་དང་མཐུན་པས། འབྲེལ་ཡོད་སྡེ་ཁག་གིས་ཚང་མའི་བསམ་འཆར་དང་གྲོས་གཞི་ལེགས་སྒྲིག་བྱས་ནས། མཚོ་སྔོན་ཞིང་ཆེན་ཏང་ཨུ་དང་སྲིད་གཞུང་གིས་ཚན་རིག་ལྟར་ཇུས་ཐག་གཅོད་པར་དཔྱད་གཞི་འདོན་སྤྲོད་བྱེད་དགོས་པ་དང་། མཚོ་སྔོན་ཞིང་ཆེན་དཔལ་འབྱོར་ཨུ་ཡོན་ལྷན་ཁང་དང་དེ་མིན་འབྲེལ་ཡོད་སྡེ་ཁག་གིས་ནན་ཏན་གྱིས་ཚང་མའི་བསམ་འཆར་དང་གྲོས་གཞིར་ཞིབ་འཇུག་བྱས་ནས། དེང་ཕྱིན་གྱི་ཁྱད་ཆོས་ལྡན་པའི་དཔལ་འབྱོར་འཕེལ་རྒྱས་སུ་གཏོང་བའི་ཁྲོད་དུ་དངོས་འབེབས་བྱེད་དགོས་པ་དང་། མཚོ་སྔོན་ཞིང་ཆེན་གྱི་འཕེལ་རྒྱས་བཞིར་ཡར་སྐུལ་བྱེད་པ་དང་འབྱོར་ཕྱུག་དང་དཔལ་ཡོན། འཆམ་མཐུན་བཅས་ཀྱི་མཚོ་སྔོན་གསར་བ་འཛུགས་སྐྲུན་བྱེད་པར་ནུས་པ་གལ་ཆེན་འདོན་དགོས་ཟེར།