ཀྲུང་གོ་བོད་ཀྱི་དྲ་བའི་འཕྲིན།དུས་ཡུན་ཉིན5རིང་གི་མཚོ་སྔོན་ཞིང་ཆེན་སྐབས་བཅུ་བའི་བོད་རིགས་ལ་གཞས་འགྲན་བསྡུར་ཆེན་མོ་ཉེ་སྔོན་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གུང་ཧི་རྫོང་བདེ་སྐྱིད་རྩྭ་ཐང་ནས་བདེ་བླག་ངང་མཇུག་སྒྲིལ་བ་དང་།དམངས་ཁྲོད་ཀྱི་གླུ་བ་གླུ་མ47ཐེངས་འདིའི་འགྲན་བསྡུར་ལ་ཞུགས་པ་དང་།འགྲན་ཞུགས་པ39ལ་རིགས་སོ་སོའི་བྱ་དགའ་ཐོབ་ཡོད།བོད་རིགས་ཀྱི་ལ་གཞས་ནི་མཛེས་སྡུག་གི་འཚོ་བར་བསྟོད་གླུ་འབུལ་བ་དང་།བརྩེ་དུང་དང་སེམས་པ་བརྗེ་རེས་བྱེད་པའི་དམངས་ཁྲོད་ཀྱི་སྒྱུ་རྩལ་རྣམ་པ་ཞིག་ཡིན་ལ།ལ་གཞས་ལེན་པ་ནི་རྒྱ་ཆེའི་བོད་རིགས་མང་ཚོགས་ཀྱིས་དགའ་བསུ་ཆེན་པོ་བྱེད་ལ།ཁྱབ་རྒྱའང་ཤིན་ཏུ་ཆེ།མཚོ་ལྷོ་བོད་རིགས་རང་སྐྱོང་ཁུལ་གྱིས་གཙོ་སྒྲུབ་བྱས་པའི་ཐེངས་འདིའི་ལ་གཞས་འགྲན་བསྡུར་གྱིས་སྔར་ལས་ལྷག་པའི་སྒོ་ནས་རྒྱལ་ཁབ་རིམ་པའི་གཟུགས་འདས་ཤུལ་བཞག་རིག་གནས་ལ་སྲུང་སྐྱོབ་དང་།མི་རིགས་ཀྱི་དམངས་ཁྲོད་རོལ་དབྱངས་སྒྱུ་རྩལ་རྣམ་པ་དར་སྤེལ་དང་འགྲེམ་སྟོན་བྱེད་པ་དམིགས་ཡུལ་དུ་བཟུང་སྟེ། ས་གནས་དཔལ་འབྱོར་འཕེལ་རྒྱས་ལ་སྐུལ་འདེད་དང་མང་ཚོགས་ཀྱི་ལས་ཞོར་རིག་གནས་འཚོ་བ་ཕུན་སུམ་ཚོགས་པོར་བསྒྱུར་ནས།རྒྱ་ཆེའི་དམངས་ཁྲོད་གླུ་བ་གླུ་མར་རང་ཉིད་ཀྱི་འཇོན་ཐང་མངོན་སའི་སྟེགས་བུ་ཞིག་བསྐྲུན་ཡོད།འགྲན་བསྡུར་ལ་མཚོ་བྱང་དང་མཚོ་ནུབ།རྨ་ལྷོ་དང་མཚོ་ལྷོ་བཅས་ཀྱི་མིང་དུ་གྲགས་པའི་ས་གནས་གླུ་བ་གླུ་མ་ཞུགས་ཡོད།མཇུག་མཐར་མཚོ་བྱང་ཁུལ་རྐང་ཚ་རྫོང་གི་འགྲན་ཞུགས་གླུ་བ་རྡོ་རེ་ལ་བྱ་དགའ་ཐོབ།