ཀྲུང་གོའི་བོད་ཀྱི་དྲ་བའི་འཕྲིན།སྤྱི་ཚེས7ཉིན་བོད་རང་སྐྱོང་ལྗོངས་དགེ་རྒན་ལས་དོན་ཚོགས་འདུ་ནས་ཤེས་རྟོགས་བྱས་པར་གཞིགས་ན།ད་ལོ་ནས་བཟུང་བོད་ལྗོངས་ཀྱིས་ཤང་གྲོང་དགེ་རྒན་གྱི་འཚོ་བའི་ཁ་གསབ་རོགས་དངུལ་གྱི་ཚད་གཞི་མཐོ་རུ་གཏོང་རྒྱུ་ཡིན་པ་དང་།སྤྱི་ལོ2016ལོར་ཁ་གསབ་རོགས་དངུལ་གྱི་ཚད་གཞི་ཟླ་བ་རེར་ཆ་སྙོམས་མི་རེར་སྒོར1000ཟིན་པ་བྱ་རྒྱུ་ཡིན་པ་རེད།
ཚོགས་འདུའི་ཐོག་བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ།བོད་རང་སྐྱོང་ལྗོངས་སྲིད་གཞུང་གི་ཀྲུའུ་ཞི་བློ་བཟང་རྒྱན་མཚན་གྱིས་ཕྱིན་ཆད་ཀྱི་ལོ་གཉིས་ནང་བོད་ལྗོངས་ཀྱི་ཤང་གྲོང་དགེ་རྒན་གྱི་འཚོ་བའི་ཁ་གསབ་རོགས་དངུལ་ཚད་གཞི་རིམ་པ་གཉིས་པའི་ས་ཁུལ་དུ་ལོ་ལྟར་མི་རེར་ཟླ་རེ་ལ་སྒོར100དང་།རིམ་པའི་གསུམ་པའི་ས་ཁུལ་དུ་སྒོར200 རིམ་པ་བཞི་པའི་ས་ཁུལ་དུ་སྒོར300བཅས་མཐོ་རུ་གཏོང་རྒྱུ་དང་།སྤྱི་ལོ2016ལོར་ཁ་གསབ་རོགས་དངུལ་ཚད་གཞི་ཟླ་རེར་མི་རེར་ཆ་སྙོམས་སྒོར1000ཟིན་པ་བྱ་རྒྱུ་ཡིན་པ་དང་།དེའི་ཁྲོད་རིམ་པའི་གཉིས་པའི་ས་ཁུལ་དུ་མི་རེར་ཟླ་རེ་ལ་སྒོར500དང་།རིམ་པ་གསུམ་པའི་ས་ཁུལ་དུ་མི་རེར་ཟླ་རེ་ལ་སྒོར1000རིམ་པ་བཞི་པའི་ས་ཁུལ་དུ་མི་རེར་ཟླ་རེ་ལ་སྒོར1500བཅས་མཐོ་རུ་གཏོང་རྒྱུ་ཡིན།
བོད་ལྗོངས་མཐའ་མཚམས་ཁུལ་གྱི་དགེ་རྒན་ལས་ཀའི་ཧུར་བརྩོན་རང་བཞིན་འགྱུར་ལྡོག་གཏོང་ཆེད།བོད་ལྗོངས་ས་ཁུལ་ཁག་གི་དགེ་རྒན་གྱི་ཐོབ་ཆ་ཁག་ལག་བསྟར་དོན་འཁྱོལ་ཐུབ་པའི་རྨང་གཞིའི་ཐོག་ཡུལ་འབབ་དང་བསྟུན་ནས་སྲིད་ཇུས་རབ་རིམ་གཏན་འཁེལ་བྱས་ཏེ་དགེ་རྒན་གྱི་གླ་ཕོགས་མཐོ་རུ་བཏང་བ་དང་།དགེ་རྒན་གྱི་འཚོ་བའི་ཆུ་ཚད་འཐུས་སྒོ་ཚང་དུ་བཏང་ཡོད་པ་རེད།བོད་ལྗོངས་ཉིང་ཁྲི་ས་ཁུལ་དུ་སྤྱི་ལོ2013ལོ་ནས་བཟུང་དཀའ་ཚེགས་ཆེ་བའི་ས་ཁུལ་དུ་ལས་ཀ་བྱེད་མཁན་གྱི་དགེ་རྒན་གླ་ཕོགས་མཐོ་རུ་བཏང་ཡོད་པ་དང་།གླ་ཕོགས་ཟླ་རེར་སྒོར200ནས800བར་མཐོ་རུ་བཏང་ཡོད་པ་རེད།བོད་ལྗོངས་ལྷོ་ཁ་ས་ཁུལ་གྱི་ས་འབབ་མཐོ་བའི་ཁུལ་གྱི་སློབ་གྲྭའི་ཆ་རྐྱེན་དང་དགེ་རྒན་གྱི་འཚོ་བའི་ཁོར་ཡུག་ལེགས་བཅོས་གཏོང་ཆེད་འབྲེལ་ཡོད་ལས་གྲྭ་ཁག་ལག་བསྟར་བྱས་ཡོད་པ་དང་དེ་བཞིན་ནག་ཆུའི་ས་ཁུལ་ཁག་ལ་ཡང་ཁ་གསབ་རོགས་དངུལ་ཁག་དོན་འཁྱོལ་ལེགས་པོ་བྱས་ཡོད་པ་རེད།
ཤེས་རྟོགས་བྱས་པར་གཞིགས་ན།བོད་ལྗོངས་ཀྱིས་སྤྱི་ལོ2014ལོའི་ཟླ་བ་དང་པོའི་ཚེས1ཉིན་ནས་བཟུང་བོད་ལྗོངས་ཡོངས་ཀྱི་ཤང་གྲོང་གི་དགེ་རྒན་ལས་བཟོ་བར་འཚོ་བའི་ཁ་གསབ་རོགས་དངུལ་སྤྲད་ཡོད་པ་དང་།དེའི་ཁྲོད་བོད་སྐྱོར་དགེ་རྒན་དང་གན་བཞག་ལམ་ལུགས་ཀྱི་དགེ་རྒན་ལས་བཟོ་བ་བཅས་ཚུད་ཡོད།ཁ་གསབ་རོགས་དངུལ་རིམ་པ་གཉིས་པའི་ས་ཁུལ་དང་།རིམ་པ་གསུམ་པའི་ས་ཁུལ།རིམ་པ་བཞི་པའི་ས་ཁུལ་དེ་བཞིན་མཐའ་མཚམས་ཀྱི་རྫོང་ཁག་སོགས་མི་རེར་ཟླ་རེ་ལ་ཁག་སོ་སོར་སྒོར300དང་།སྒོར600།སྒོར900བཅས་ཀྱི་ཚད་གཞི་ལྟར་སྤྲད་ཡོད་པ་རེད།མིག་སྔར།མི་རེར་ཆ་སྙོམས་སྒོར600ཟིན་གྱི་ཡོད་པ་དང་།བོད་ལྗོངས་ཀྱི་ཤང་གྲོང་དགེ་རྒན་ཁྲི༡ཙམ་ལ་ཕན་པ་ཐོབ་ཡོད་པ་རེད།  །