ཉིས་སྟོང་བཅུ་གཅིག་ལོར། མགོ་ལོག་བོད་རིགས་རང་སྐྱོང་ཁུལ་པདྨ་རྫོང་གིས་དམངས་ཀྱི་འཚོ་བ་ལེགས་བཅོས་བྱེད་པ་དེ་མ་དངུལ་གཏོང་ཡུལ་གཙོ་བོར་བརྩིས་ནས། མ་དངུལ་སྒོར་མོ་དུང་ཕྱུར་གཉིས་ལྷག་བཏང་ནས་རྨང་གཞི་སྒྲིག་ཆས་འཛུགས་སྐྲུན་དང་ལམ་དང་འགྲིམ་འགྲུལ་ཆུ་བེད། སྐྱེ་ཁམས་ཁོར་ཡུག་སྲུང་སྐྱོབ་བྱེད་པ། དམངས་ཀྱི་འཚོ་བ་ལེགས་བཅོས་བྱེད་པ། རིག་གནས་རྒྱང་སྒྲོག་དང་རོང་འབྲོག་པའི་ལག་རྩལ་བཀོལ་སྤྱོད་བྱེད་པའི་གསོ་སྦྱོང་འཛིན་གྲྭ་བསྒྲུབས་པ་སོགས་ཕྱོགས་ནས་དམངས་ཕན་ལས་གཞི་བཅུ་བདུན་གཏན་ལ་ཕབ་སྟེ། ཕྱོགས་ཡོངས་ནས་དཔལ་ཡོན་ལྡན་པའི་པདྨ་འཛུགས་སྐྲུན་བྱེད་པའི་བྱ་འགུལ་སྤེལ།
  ད་ལོར། པདྨ་རྫོང་གིས་རྨང་གཞི་སྒྲིག་ཆས་འཛུགས་སྐྲུན་བྱེད་པའི་ཐད་ནས་མཁར་གྲོང་ཅན་འཛུགས་སྐྲུན་བྱེད་པར་དམ་པོར་དམིགས་སྟེ། སྔར་ལས་ལྷག་པའི་སྒོ་ནས་རྨང་གཞི་སྒྲིག་ཆས་འཛུགས་སྐྲུན་བྱས་ཏེ། མཁར་གྲོང་གི་ཞབས་ཞུའི་ནུས་པ་ཇེ་བཟང་དུ་བཏང་། མ་དངུལ་སྒོར་མོ་བྱེ་བ་གསུམ་དང་འབུམ་གཉིས་ཁྲི་དགུ་བཏང་སྟེ། རྫོང་སྲིད་གཞུང་གི་ཕྱོགས་བསྡུས་ཞབས་ཞུའི་གཞུང་སྒྲུབ་ཁང་དང་སྤྱི་བདེ། ཁྲིམས་འཛིན་ལས་དོན་གྱིས་བཀོལ་སྤྱོད་བྱེད་པའི་ཁང་བ་འཛུགས་སྐྲུན་བྱས་པ་དང་། མ་དངུལ་སྒོར་མོ་ས་ཡ་བཞི་དང་འབུམ་ལྔ་བཏང་ནས་པདྨ་རྫོང་ཕན་བདེ་ལྟེ་གནས་འཛུགས་སྐྲུན་བྱས་ལ། ལས་བྱེད་པའི་སྡོད་ཁང་དང་སློབ་མའི་བདེ་འཇགས་ཁང་པ་སོགས་ཀྱི་གནད་དོན་ལ་དམིགས་ཏེ། མ་དངུལ་སྒོར་མོ་བྱེ་བ་གཅིག་དང་ས་ཡ་བདུན་འབུམ་བརྒྱད་བཏང་ནས། རྫོང་མཁར་གྱི་ཕྱོགས་བསྡུས་བཟོ་སྐྲུན་དེ་དག་ལག་བསྟར་བྱས། དེ་མིན་ལམ་དང་འགྲིམ་འགྲུལ་ཆུ་བེད་སོགས་ཀྱི་ཐད་མ་དངུལ་སྒོར་མོ་བྱེ་བ་གཅིག་དང་ས་ཡ་གཅིག་འབུམ་གསུམ་ཁྲི་བདུན་ལྷག་བཏང་ནས། སྤྱིའི་རིང་ཚད་ལ་སྤྱི་ལེ་སོ་དགུ་ཡོད་པའི་ཨར་འདམ་གྱི་ལམ་ལྔའི་བཟོ་སྐྲུན་ལེགས་གྲུབ་བྱས་པ་དང་། མང་ཚོགས་རྣམས་ཆུར་བརྒལ་དཀའ་བའི་གནད་དོན་ལ་དམིགས་ནས་མ་དངུལ་སྒོར་མོ་ས་ཡ་བདུན་དང་འབུམ་དྲུག་བཏང་ནས་ཟམ་པ་འབྲིང་ཆུང་བདུན་བཅས་ལས་ཏེ་དམངས་ཀྱི་འཚོ་བའི་གནད་དོན་ཐག་གཅོད་བཟང་བོ་བྱས།