གུ་གེ་རྒྱལ་རབས་ཀྱི་གནའ་ཤུལ་ཞིག་གསོ་བྱེད་པའི་བཟོ་སྐྲུན་ཟླ་འདིའི་ནང་ལས་འགོ་རྩོམ་རྒྱུ་ཡིན་པ།
ཚེ་རིང་སྒྲོལ་མ། མཚོ་སྔོན་བོད་སྐད་རླུང་འཕྲིན། 2011-05-06
ལོ་ལྔའི་འཆར་གཞི་བཅུ་གཅིག་པའི་སྐབས་སུ། རྒྱལ་ཁབ་ཀྱིས་མ་དངུལ་སྒོར་མོ་དུང་ཕྱུར་ལྔ་ལྷག་བཏང་ནས་བོད་རང་སྐྱོང་ལྗོངས་ཀྱི་རིག་དངོས་གཙོ་བོར་སྲུང་སྐྱོབ་བྱེད་པའི་བཟོ་སྐྲུན་ལག་བསྟར་བྱས་པ་དང་། བཟོ་སྐྲུན་དེའི་ནང་སྡོམ་པས་ལས་གཞི་ཆུང་བ་ཉེར་གཉིས་ཡོད་ལ། རིག་དངོས་གཙོ་བོ་སྲུང་སྐྱོབ་བྱེད་ས་བཅོ་ལྔ་དང་གསར་བརྗེ་རིག་དངོས་དང་ལོ་རྒྱུས་རིག་དངོས་སྲུང་སྐྱོབ་ལས་གཞི་བདུན་འདུས་ཡོད།
ཚེས་གཉིས་ཉིན་བོད་རང་སྐྱོང་ལྗོངས་རིག་དངོས་ཅུའུ་ཡི་འབྲེལ་ཡོད་ལག་རྩལ་མི་སྣས་མཚམས་སྦྱོར་བྱས་པའི་གནས་ཚུལ་ལྟར་ན། བོད་ལྗོངས་ཀྱི་ལོ་ལྔའི་འཆར་གཞི་བཅུ་གཅིག་པའི་བཟོ་སྐྲུན་བརྒྱ་དང་གྱ་བརྒྱད་ནང་གི་གཅིག་སྟེ་རིག་དངོས་གཙོ་བོའི་སྲུང་སྐྱོབ་སྒྲིག་ཆས་བཟོ་སྐྲུན་ཐད་ལ་སྡོམ་པས་མ་དངུལ་སྒོར་མོ་དུང་ཕྱུར་ལྔ་ལྷག་བཏང་བ་དང་། མ་དངུལ་དེ་དག་གིས་ལས་གཞི་ཉེར་གཉིས་ཞིག་གསོ་བྱེད་དགོས་ལ། དེའི་ནང་ལས་གཞི་བཅུ་གསུམ་ལས་ཚར་བ་དང་། ལས་གཞི་དགུ་ད་ལྟ་ཕྱོགས་ཡོངས་ནས་ལས་འགོ་བརྩམས་ཤིང་། ལས་གཞི་ཚང་མ་ད་ལོར་ལས་ཚར་དུ་འཇུག་རྒྱུ་རེད་ཟེར།
མཚན་སྙན་འཛམ་གླིང་ལ་གྲགས་པའི་གུ་གེ་རྒྱལ་རབས་ཀྱི་གནའ་ཤུལ་ཞིག་གསོ་བྱེད་པའི་བཟོ་སྐྲུན་དེ་ད་ལོའི་ཟླ་གསུམ་པ་ནས་ལས་འགོ་རྩོམ་པའི་གྲ་སྒྲིག་བྱས་ལ། ཚོད་དཔག་བྱས་ན་ཟླ་འདིའི་ཟླ་དཀྱིལ་ལ་ཕྱོགས་ཡོངས་ནས་ལས་འགོ་རྩོམ་རྒྱུ་རེད། མཚམས་སྦྱོར་བྱས་པ་ལྟར་ན། གུ་གེ་རྒྱལ་རབས་ཀྱི་གནའ་ཤུལ་ཞིག་གསོ་བྱེད་པའི་བཟོ་སྐྲུན་དེས་མཁར་གྱང་དང་སྲ་བརྟན་བྱ་བ་གཙོ་བོ་བྱས་ཏེ་ཞིག་གསོ་བྱེད་རྒྱུ་ཡིན་ལ། ལག་རྩལ་མི་སྣ་དང་། བཟོ་པ་སུམ་ཅུ་ཙམ་གྱིས་ཞིག་གསོ་བྱ་བ་བསྒྲུབ་རྒྱུ་རེད་ཟེར།