མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་བུན་གྱིས་ཚེས་གཉིས་ཉིན་ཉིག་ཡོ་གྲོང་ཁྱེར་དུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་གཏམ་བཤད་སྤེལ་ཏེ། པིན་ལཱ་ཏན་བསད་པ་ནི་འཛམ་གླིང་ཡོངས་ཀྱི་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་དཀྱོགས་མཚམས་གལ་ཆེན་ཞིག་ཡིན་པ་དང་། མཉམ་འབྲེལ་རྒྱལ་ཚོགས་ཀྱིས་མུ་མཐུད་དུ་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་བྱ་འགུལ་སྤེལ་རྒྱུ་ཡིན་ཟེར།
 ཕན་ཅི་བུན་གྱིས་བཤད་རྒྱུར། ཨ་མེ་རི་ཁའི་ཙུང་ཐུང་ཨོ་པཱ་མཱ་ཡིས་ཚེས་གཅིག་ཉིན་གྱི་དགོང་མོར་པིན་ལཱ་ཏན་བསད་པ་ཁྱབ་སྒྲོག་བྱས། དེ་ནི་འཛམ་གླིང་ཡོངས་ཀྱི་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་དཀྱོགས་མཚམས་གལ་ཆེན་ཞིག་ཡིན་ཞིང་། རྟེན་གཞི་རྩ་འཛུགས་ཀྱི་ནག་ཉེས་བྱ་སྤྱོད་དེས་འཛམ་གླིང་ཡོངས་ལ་གནོད་པ་ཐེབས་བཞིན་ཡོད་ལ། ཚེ་སྲོག་དང་རྒྱུ་ནོར་གྱི་གྱོང་གུད་ཆེན་པོ་བཟོ་བཞིན་ཡོད། ཁོས་ས་ཆ་གང་ནས་དམིགས་ཡུལ་ཅིའི་ཕྱིར་བྱུང་བ་ཡིན་ཡང་མཉམ་འབྲེལ་རྒྱལ་ཚོགས་ཀྱིས་རྣམ་པ་གང་རུང་གི་འཇིགས་སྐུལ་རིང་ལུགས་ལ་ངོ་རྒོལ་བྱེད་བཞིན་ཡོད་པ་ནན་བཤད་བྱས།
 ཕན་ཅི་བུན་གྱིས་བལྟས་ན། ཚེས་གཅིག་ཉིན་ནི་ཨ་མེ་རི་ཁ་དང་འཛམ་གླིང་ཡོངས་ཀྱི་ས་ཆ་གཞན་པའི་འཇིགས་སྐུལ་རིང་ལུགས་ཀྱི་གནོད་པ་ཐེབས་མཁན་དང་དེ་དག་གི་ཁྱིམ་མིས་ཡིད་ལ་དམ་པོར་འཛིན་དགོས་པའི་ཉིན་ཞིག་ཡིན་པར་འདོད།