ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་གིས་ཞང་དང་གྲོང་རྡལ་གྱི་རིག་གནས་ས་ཚིགས་ལྔ་ལས་རྒྱུ་ཡིན་པ།
ཚེ་རིང་སྒྲོལ་མ། མཚོ་སྔོན་བོད་སྐད་རླུང་འཕྲིན། 2011-05-04
ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་རིག་གནས་གནས་སྐོར་ཅུའུ་ཡིས་བསྒྲགས་པའི་གནས་ཚུལ་ལྟར་ན། ཀླུ་ཆུ་རྫོང་གིས་ཀན་སུའུ་ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གི་འབྲེལ་ཡོད་ཡིག་ཆའི་དགོངས་དོན་ལྟར། ཤིས་ཚང་དང་། གྭ་ཞུར། ཟས་ཚ་སོགས་ཞང་དང་གྲོང་རྡལ་ནས་རིག་གནས་ས་ཚིགས་ལྔ་ལས་ཏེ། ས་དེའི་རིགས་སོ་སོའི་མང་ཚོགས་ཀྱི་རིག་གནས་དགོས་མཁོ་སྣ་ཚོགས་བསྐང་རྒྱུ་རེད་ཟེར།
ཤེས་པའི་གནས་ཚུལ་ལྟར་ན། ཞང་དང་གྲོང་རྡལ་ལྔའི་རིག་གནས་ས་ཚིགས་ལས་པའི་ཐད་ལ་སྡོམ་པས་མ་དངུལ་སྒོར་མོ་ས་ཡ་གཅིག་དང་འབུམ་གཉིས་བཏང་བ་དང་། རིག་གནས་ས་ཚིགས་རེ་རེའི་འཛུགས་སྐྲུན་རྒྱ་ཁྱོན་ལ་མུས་གྲུ་བཞི་མ་སུམ་བརྒྱ་རེ་ཡོད་པ་དང་། ལས་གཞི་དེ་ད་ལོའི་ཟླ་བཞི་བའི་ཟླ་མགོར་ལས་འགོ་བརྩམས་ལ། ཚོད་དཔག་བྱས་ན་ཟླ་བདུན་པའི་ཟླ་མཇུག་བར་དུ་ཕྱོགས་ཡོངས་ནས་ལས་ཚར་རྒྱུ་རེད། ལས་གཞི་དེ་ལས་ནས་གྲུབ་རྗེས་རྒྱ་ཆེའི་རོང་འབྲོག་མང་ཚོགས་ཀྱི་རིག་གནས་བྱ་འགུལ་སྤེལ་ས་ཞིག་ཏུ་གྱུར་ཏེ། རོང་འབྲོག་སྡེའི་དཔལ་འབྱོར་འཕེལ་རྒྱས་འགྲོ་བ་དང་མང་ཚོགས་ཀྱི་རིག་གནས་སྤུས་ཚད་ཇེ་མཐོར་གཏོང་བར་ནུས་པ་གལ་ཆེན་ཐོན་ཐུབ།