ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ4པའི་ཚེས13འབྱོར་བའི་གློག་འཕྲིན།  རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཡིས་གཙོ་འགན་བཞེས་ནས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་འཚོགས་ཏེ་དུས་ཚིགས་དང་པོའི་དཔལ་འབྱོར་གནས་བབ་དབྱེ་ཞིབ་བྱས་ཤིང་།  ཕྱིན་ཆད་དུས་རིམ་གྱི་དཔལ་འབྱོར་ལས་ཀར་ཞིབ་འཇུག་དང་བཀོད་སྒྲིག་གནང་བ། 
      གྲོས་ཚོགས་ཐོག་ནན་གསུངས་གནང་དོན།  དེང་སྐབས་སུ་རྒྱལ་ཁབ་ཕྱི་ནང་གི་ཁོར་ཡུག་སྔར་བཞིན་རྙོག་འཛིང་ཡིན་པ་དང་།  བརྟན་བརླིང་མེད་པ་དང་གཏན་འཁེལ་བྱེད་མི་ཐུབ་པའི་རྒྱུ་རྐྱེན་ད་དུང་མང་པོ་གནས་པས།  སྤྱི་ཁོག་ཐོག་ནས་ཚོད་འཛིན་བྱེད་པའི་གནོན་ཤུགས་སྔར་བཞིན་ཆེ་ཙམ་ཡིན་པ།  དེར་བརྟེན།  དེང་སྐབས་སུ་སྤྱི་ཁོག་གི་དཔལ་འབྱོར་སྲིད་ཇུས་ཀྱི་རྒྱུན་མཐུད་རང་བཞིན་དང་བརྟན་བརླིང་རང་བཞིན་སྲུང་འཛིན་བྱེད་ཐུབ་པ་བྱ་རྒྱུ་དང་།  ད་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་དམིགས་ཡུལ་མངོན་འགྱུར་བྱེད་ཐུབ་པ་བྱ་རྒྱུར་གཤམ་གསལ་གྱི་ལས་ཀ་བདུན་ཡག་པོ་འཛིན་དགོས་པ་སྟེ།
     གཅིག་ནི་བརླིང་པོའི་དངུལ་ལོར་གྱི་སྲིད་ཇུས་ལག་བསྟར་ནན་པོ་བྱེད་དགོས།  སྔར་ལས་ལྷག་པར་མི་དམངས་ཤོག་སྒོར་གྱི་དངུལ་བརྗེས་འཛའ་ཐང་ཆགས་པའི་ནང་རྐྱེན་འཐུས་སྒོ་ཚང་དུ་གཏོང་དགོས།  སྤྱི་ཚོགས་ཀྱི་མ་དངུལ་སྡུད་རུབ་བྱེད་རྒྱ་དེ་ལུགས་མཐུན་གྱི་ཁྱབ་ཁོངས་ནང་ཚོད་འཛིན་བྱེད་དགོས་དང་།  མ་དངུལ་ཐད་ཀར་སྡུད་རུབ་བྱེད་ཚད་མཐོ་རུ་གཏོང་དགོས།  འདི་འདྲ་དངུལ་ལོར་འགྲེམ་ཐལ་ཤོར་བའི་དངུལ་ལོར་གྱི་ནང་རྐྱེན་མེད་པ་བཟོ་ཐུབ་ལ།  གདོས་བཅས་དཔལ་འབྱོར་གྱིས་དངུལ་རྩའི་སྐོར་གྱི་ལུགས་མཐུན་དགོས་མཁོའང་སྐོང་ཐུབ་པ་བྱ་རྒྱུ་རེད།
     གཉིས་ནི་ཐབས་བརྒྱ་ཇུས་སྟོང་གིས་ཟོག་གོང་གི་སྤྱིའི་ཆུ་ཚད་གཞི་རྩའི་ཐོག་བརྟན་བརླིང་ཡིན་པར་སྲུང་འཛིན་བྱེད་དགོས།  ཆད་ལུས་མེད་པར་རྒྱལ་སྲིད་སྤྱི་ཁྱབ་ཁང་གི་ཟོག་གོང་གི་སྤྱིའི་ཆུ་ཚད་བརྟན་བརླིང་བྱ་རྒྱུའི་སྐོར་གྱི་ཁྱོན་ཡོངས་བཀོད་སྒྲིག་དོན་འཁྱོལ་མཐའ་ཕྱིན་བྱེད་དགོས་དང་།  བྱེད་ཐབས་མང་པོ་བླངས་ཏེ་རྒྱལ་སྤྱི་དང་རྒྱལ་ནང་གི་ཟོག་གོང་ཡར་སྤར་བའི་གནོད་ཤུགས་ལ་ཁ་གཏད་དེ་ཟོག་གོང་གི་འཕར་ཚད་དེ་ཐེག་པའི་མཚམས་ཚད་ནང་ཚོད་འཛིན་བྱེད་དགོས། 
         གསུམ་ནི་ཁང་བདག་ཚོང་ར་ཚོད་འཛིན་བྱེད་པའི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་དགོས།  ཚོད་འཛིན་བྱེད་ཕྱོགས་གཡོ་འགུལ་མི་གཏོང་བ་དང་ཚོད་འཛིན་བྱེད་ཤུགས་ལྷོད་གཡེང་དུ་མི་གཏོང་བར་རྒྱུན་འཁྱོངས་བྱེད་དགོས།  སྐབས་འཚོལ་བའི་རང་བཞིན་དང་མ་དངུལ་གཏོང་འཇོག་གི་རང་བཞིན་ལྡན་པའི་སྒོས་སྡོད་ཁང་ཉོ་བར་ཚོད་འཛིན་ནན་པོ་བྱས་ཏེ་ཁང་རིན་དེ་ལུགས་མཐུན་གྱི་ཆུ་ཚད་ནང་ཚོད་འཛིན་བྱེད་དགོས།   དུས་མཚུངས་སུ།  འགན་སྲུང་རང་བཞིན་གྱི་སྡོད་ཁང་སྐྲུན་པར་ཏན་ཏིག་དང་ཡག་པོ་འཛིན་དགོས།