འབྲོག་ཁུལ་ཡག་ཅིང་མགྱོགས་པོ་འཕེལ་རྒྱས་ཡོང་བར་སྐུལ་འདེད་གཏོང་བའི་སྲིད་ཇུས་བྱེད་ཐབས་ཞིབ་འཇུག་དང་བཀོད་སྒྲིག་གནང་བ།
     ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ4པའི་ཚེས6ཉིན་འབྱོར་བའི་གློག་འཕྲིན།རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཡིས་གོང་ཚེས་ཉིན་གཙོ་འགན་བཞེས་ནས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་འཚོགས་ཏེ་འབྲོག་ཁུལ་ཡག་ཅིང་མགྱོགས་པོ་འཕེལ་རྒྱས་ཡོང་བར་སྐུལ་འདེད་གཏོང་བའི་སྲིད་ཇུས་བྱེད་ཐབས་ཞིབ་འཇུག་དང་བཀོད་སྒྲིག་གནང་བ།
     གྲོས་ཚོགས་ཐོག་བསྟན་དོན།རང་རྒྱལ་གྱི་འབྲོག་ཁུལ་ལ་ཞིང་ཆེན་དང་ས་ཁུལ12ཀྱི་འབྲོག་ཁུལ་དང་རོང་མ་འབྲོག264གཏོགས་ཏེ་རྒྱལ་ཡོངས་རྒྱལ་ས་རྒྱ་ཁྱོན་གྱི་བརྒྱ་ཆ40ཟིན་ཡོད།རང་རྒྱལ་གྱི་གཙང་པོའི་འབྱུང་གནས་དང་ཆུ་འགོའི་སྲུང་འཁྱོངས་ས་ཁུལ་ཡིན་པས།རྒྱལ་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཁྱོན་ཡོངས་ནང་གལ་འགངས་ཆེ་བའི་འཐབ་ཇུས་གོ་གནས་བཟུང་ཡོད།བཅོས་བསྒྱུར་སྒོ་འབྱེད་དང་ཁྱད་པར་ནི་ནུབ་རྒྱུད་གསར་སྦོལ་ཆེན་པོ་བྱེད་པའི་ཐབས་ཇུས་ལག་བསྟར་བྱས་པ་ནས་བཟུང་།འབྲོག་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བར་གྲུབ་འབྲས་གལ་ཆེན་ཐོབ་ཡོད་ཅིང་།དཔལ་འབྱོར་བསྡོམས་འབོར་འཕར་སྣོན་མགྱོགས་པོ་བྱུང་ཡོད།རྨང་གཞི་སྒྲིག་ཆས་ཀྱི་ཆ་རྐྱེན་རིམ་བཞིན་ལེགས་བཅོས་བྱུང་བ།རྩྭ་ཐང་གི་སྐྱེ་ཁམས་འཛུགས་སྐྲུན་བྱེད་པའི་གོམ་སྟབས་མགྱོགས་པོ་བཏང་ཡོད།འབྲོག་པའི་ཆུ་ཚད་མཐོ་རུ་མངོན་གསལ་དོད་པོ་བཅས་ཕྱིན་ཡོད་མོད།འོན་ཀྱང་ང་ཚོས་ད་རུང་མཐོང་ཐུབ་དགོས་པ་ནི་རྩྭ་ཐང་སྐྱེ་ཁམས་ཀྱི་སྤྱི་ཁོག་ཞན་དུ་གྱུར་ཚུལ་གཞི་རྩའི་ཐོག་བཀག་འགོག་བྱེད་ཐུབ་མེད་དང་།འབྲོག་དམངས་ཀྱི་ཡོང་འབབ་ཆུ་ཚོད་སྤྱི་ཁོག་ཐོག་བཤད་ན་ཉུང་ཙམ་ཡིན་པ།འབྲོག་ཁུལ་འཕེལ་རྒྱས་གཏོང་བར་སྔར་བཞིན་དམིགས་བསལ་གྱི་དཀའ་གནད་དང་གནད་དོན་མི་ཉུང་བ་གནས་པ།དེར་བརྟེན།ངེས་པར་དུ་དེ་བས་ནུས་ལྡན་གྱི་སྲིད་ཇུས་བྱེད་ཐབས་བླངས་ཏེ་འབྲོག་ཁུལ་འཕེལ་རྒྱས་མགྱོགས་པོ་བཏང་ནས་རྒྱལ་ཁབ་ཀྱི་སྐྱེ་ཁམས་ཉེན་མེད་བདེ་འཇགས་ཡོང་བར་འགན་སྲུང་བྱེད་དགོས།
     གྲོས་ཚོགས་ཐོག་བསྟན་དོན།2020ལོར་སླེབས་དུས།གཟན་རྩྭ་དང་ཕྱུགས་ཟོག་བར་དོ་སྙོམས་ཡོང་ཐུབ་པ་དང་།འབྲོག་ཁུལ་གྱི་དཔལ་འབྱོར་ཆགས་ཚུལ་སྔར་ལས་ལྷག་པར་བཟང་སྒྲུག།འབྲོག་དམངས་ཀྱི་ཐོན་སྐྱེད་དང་འཚོ་བའི་ཆ་རྐྱེན་སྒོ་ཀུན་ནས་ལེགས་བཅོས།འབྲོག་ཁུལ་ཡག་ཅིང་མགྱོགས་པོ་འཕེལ་རྒྱས་གཏོང་ཐུབ་པ་བཅས་བྱེད་ཆེད།གཤམ་གྱི་ཕྱོགས་ལྔའི་ལས་ཀ་ཁག་ཡག་པོ་སྒྲུབ་དགོས་པ་སྟེ།གཅིག་ནི་རྩྭ་ཐང་གི་སྐྱེ་ཁམས་སྲུང་སྐྱོང་དང་འཛུགས་སྐྲུན་བྱ་རྒྱུར་ཤུགས་སྣོན་བརྒྱབ་ནས་འབྲོག་ཁུལ་རྒྱུན་མཐུད་ངང་འཕེལ་རྒྱས་གཏོང་བའི་ནུས་པ་མཐོ་རུ་གཏོང་དགོས།ཕྱུགས་འཚོ་འཚམས་བཞག་པར་ཁ་གསབ་མ་དངུལ་སྤྲོད་རྒྱུ་དང་གཟན་རྩྭ་དང་ཕྱུགས་ཟོག་དོ་སྙོམས་ཡོང་བར་བྱ་དགའ་སྤྲོད་རྒྱུའི་ནང་རྐྱེན་ལག་བསྟར་བྱས་ཏེ་འབྲོག་དམངས་ཀྱི་རྩྭ་ཐང་སྲུང་སྐྱོང་བྱ་རྒྱུའི་ཧུར་བརྩོན་རང་བཞིན་སྐུལ་འདེད་གང་ལེགས་གཏོང་དགོས།གཉིས་ནི་འཕེལ་རྒྱས་གཏོང་སྟངས་འགྱུར་ལྡོག་བྱས་ཏེ་དེང་རབས་ཀྱི་རྩྭ་ཐང་གི་ཕྱུགས་འབྲོག་ལས་རིགས་འཕེལ་རྒྱས་ཧུར་ཐག་གཏོང་དགོས།རྩྭ་ཐང་ལ་ཕྱུགས་འཚོ་འཚམས་བཞག་པ་དང་རྩྭ་ར་ངལ་གསོ་དང་རེས་སྐོར་རྒྱབ་པའི་ལམ་ལུགས་དོན་འཁྱོལ་བྱེད་དགོས་དང་།འབྲོག་ཁུལ་གྱི་རྨང་གཞི་ནུས་པ་དང་ཞབས་འདེགས་མ་ལག་བསྐྲུན་རྒྱུར་ཤུགས་སྣོན་རྒྱག་དགོས།གནོད་སྐྱོན་སྔོན་འགོག་བྱེད་ནུས་མཐོ་རུ་གཏོང་དགོས།རྩྭ་ཐང་གི་ཕྱུགས་འབྲོག་ལས་རིགས་ཀྱི་ཐོན་སྐྱེད་བྱེད་པར་ཁ་གསབ་མ་དངུལ་སྤྲོད་རྒྱུའི་སྲིད་ཇུས་འཐུས་སྒོ་ཚང་དུ་གཏོང་དགོས་ཤིང་ཁ་གསབ་བྱེད་ཤུགས་ཆེ་རུ་གཏོང་དགོས།གསུམ་ནི་འབྲོག་ཁུལ་གྱི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ནས་འབྲོག་དམངས་ཀྱི་ཡོང་འབབ་འཕར་སྣོན་ཡོང་བ་དང་ལས་ཞུགས་བྱེད་ཁྱོན་རྒྱ་ཆེ་གཏོང་དགོས།མ་དངུལ་དང་སྲིད་ཇུས་ཐད་ཀྱི་རོགས་སྐྱོར་བྱེད་ཤུགས་ཆེ་རུ་བཏང་ནས་འབྲོག་ཁུལ་གྱི་ཁྱད་ཆོས་ལྡན་པའི་མཐུན་རྐྱེན་ཡག་པོའི་ཐོན་ལས་འཕེལ་རྒྱས་ཧུར་ཐག་གཏོང་དགོས།དེ་བས་དགེ་མཚན་ལྡན་པའི་ལས་ཞུགས་སྲིད་ཇུས་ལག་བསྟར་བྱས་ཏེ་འབྲོག་དམངས་ཐོན་སྐྱེད་འགྱུར་ལྡོག་དང་ལས་ཞུགས་བྱ་རྒྱུར་སྐུལ་འདེད་གཏོང་དགོས།བཞི་ནི་ཤུགས་ཆེན་པོས་སྤྱི་པའི་བྱ་གཞག་འཕེལ་རྒྱས་བཏང་ནས་དམངས་འཚོ་འགན་ལེན་དང་ལེགས་བཅོས་ནན་པོ་བྱེད་དགོས།འབྲོག་ཁུལ་གྱི་འགྲིམ་འགྲུལ་དང་།གློག་ཤུགས།འཕྲིན་སྐྱེལ་སོགས་རྨང་གཞི་སྒྲིག་ཆས་བསྐྲུན་རྒྱུར་ཤུགས་སྣོན་བརྒྱབ་ནས་འབྲོག་པ་གནས་སྤོ་དང་འབྲོག་ཁུལ་དུ་ཉེན་མེད་འཐུང་ཆུ་རག་བཅུག་པའི་ཨར་ལས་ལག་བསྟར་མགྱོགས་པོ་བྱེད་དགོས།ཤུགས་ཆེན་པོས་འབྲོག་ཁུལ་གྱི་སློབ་གསོ་དང་།ལུས་རྩལ།རིག་གནས་བྱ་གཞག་སོགས་འཕེལ་རྒྱས་ཆེན་པོ་བཏང་ནས་སྤྱིའི་འཕྲོད་བསྟེན་གྱི་ཞབས་འདེགས་ཞུ་ནུས་མཐོ་རུ་གཏོང་དགོས་པ་མ་ཟད།ལོ་ལྔའི་འཆར་གཞི་བཅུ་གཉིས་པའི་སྐབས་སུ་འབྲོག་ཁུལ་ཡོངས་སུ་ཞིང་སྡེའི་སྤྱི་ཚོགས་རྒན་གསོ་ཉེན་འགོག་ལམ་ལུགས་ལག་བསྟར་བྱེད་དགོས།འབྲོག་ཁུལ་གྱི་དབུལ་སྐྱོར་གསར་སྦོལ་བྱེད་ཤུགས་ཆེ་རུ་གཏོང་དགོས།ལྔ་ནི་རྩྭ་ཐང་འགན་གཙང་ལེན་དང་བདག་གཉེར་གྱི་ལམ་ལུགས་བརྟན་བརླིང་དང་འཐུས་སྒོ་ཚང་དུ་གཏོང་དགོས།བདག་དབང་གསལ་པོ་ཤེས་པ་དང་།དོ་དམ་ཚད་ལྡན།དུད་ཚང་ལ་འགན་གཙང་ལེན་བྱེད་པའི་བླང་བྱ་ལྟར་རྩྭ་ཐང་འགན་གཙང་ལེན་བྱ་རྒྱུའི་ལས་ཀ་མགྱོགས་སུ་བསྒྲུབས་ནས་ལོ་ལྔའི་དུས་ཚོད་སྤྱད་དེ་གཞི་རྩའི་ཐོག་རྩྭ་ཐང་འགན་གཙང་ལེན་གྱི་ལས་ཀ་ལེགས་འགྲུབ་བྱེད་དགོས།

     གྲོས་ཚོགས་ཐོག་ད་རུང་འབྲེལ་ཡོད་ས་གནས་དང་སྡེ་ཚན་ལ་མཐོང་ཆེན་བྱས་ཤིང་སྒྲིག་འཛུགས་དང་འགོ་ཁྲིད་བྱ་རྒྱུ་དང་མཐུན་སྦྱོར་མཉམ་ལས་བྱ་རྒྱུར་ཤུགས་སྣོན་བརྒྱབ་སྟེ་འབྲོག་ཁུལ་ཡག་ཅིང་མགྱོགས་པོ་འཕེལ་རྒྱས་གཏོང་རྒྱུའི་ལག་བསྟར་འཆར་གཞི་གཏན་འཁེལ་བྱེད་དགོས་དང་།ལས་འགན་དོན་འཁྱོལ་བྱས་ཏེ་སྲིད་ཇུས་དང་བྱེད་ཐབས་ཁག་དོན་ཐོག་ཏུ་འཁྱོལ་ཐུབ་པ་བྱེད་དགོས་པའི་བླང་བྱ་བཏོན་ཡོད།