ཉེ་ལམ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་བུན་ཅ་པའོ་ཡིས་ཀྲེ་ཅང་ཞིང་ཆེན་གྱི་དཔལ་འབྱོར་འཁོར་སྐྱོད་གནས་ཚུལ་ལ་རྟོག་ཞིབ་མཛད་སྐབས། ད་ལྟ་རང་རྒྱལ་གྱི་དཔལ་འབྱོར་འཁོར་སྐྱོད་གནས་ཚུལ་གྱི་སྤྱིའི་གནས་ཚུལ་བཟང་བ་དང་། ང་ཚོས་བླངས་ཟིན་པའི་གྲུབ་འབྲས་དང་འཕེལ་རྒྱས་ཀྱི་མཐུན་རྐྱེན་གཉིས་ལ་ལྟ་སྟངས་ཡང་དག་བཟུང་སྟེ། དཔལ་འབྱོར་བྱ་བ་ལེགས་པོར་སྒྲུབ་པའི་ཡིད་ཆེས་བརྟན་པོ་ཡོད་དགོས་ལ། དཔལ་འབྱོར་འཕེལ་རྒྱས་ལ་འཕྲད་པའི་དཀའ་ཁག་དང་གནད་དོན་ལའང་ཚོད་དཔག་གང་ལེགས་བྱེད་རྒྱུ་དང་། ཉེན་ཁའི་འདུ་ཤེས་ཇེ་དྲག་ཏུ་གཏོང་བ་དང་། སེམས་ལྷོད་ལ་བབས་ཏེ་རྟོག་ཞིབ་དང་ཁ་གཏད་འཇལ་བ་དང་། ཆུ་མ་ཡོང་གོང་ལ་རགས་བརྩིགས་པ་ཞེས་པའི་དཔེ་ལྟར། དཔལ་འབྱོར་འཕེལ་རྒྱས་ཀྱི་རྣམ་པ་བཟང་པོ་དེ་སྔར་ལས་ཇེ་བརྟན་དུ་བཏང་ནས། ད་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཡུལ་མངོན་འགྱུར་བྱེད་པ་དང་། ལོ་ལྔའི་འཆར་གཞི་བཅུ་གཉིས་པའི་མགོ་བཟང་བོར་རྩོམ་པར་འབད་བརྩོན་བྱེད་དགོས་ཞེས་ནན་གྱིས་གསུངས།
 ཟླ་བཞི་བའི་ཚེས་བརྒྱད་ཉིན་ནས་ཚེས་དགུའི་ཉིན་བར། བུན་ཅ་པའོ་ཀྲིག་ཧྲན་གྲོང་ཁྱེར་དང་ཉིན་པོ་གྲོང་ཁྱེར་གྱི་ཉ་འཛིན་སྡེ་བར་ཕེབས་ཏེ་ཉ་བ་རྣམས་ལ་སྐོར་བརྒྱབ་པ་དང་། རྒྱ་མཚོའི་ཚན་རྩལ་དང་སྒྲིག་ཆས་ལས་བཟོ། འཁེལ་འཐག་ཕྱིར་འཚོང་ཁེ་ལས་དང་རྒྱལ་སྤྱིའི་མཚོ་ཐོག་སྐྱེལ་འདྲེན་ཞབས་ཕྱི་ལྟེ་གནས་སོགས་ལ་རྟོག་ཞིབ་མཛད། ཚེས་དགུ་ཉིན་གྱི་སྔ་དྲོར། བུན་ཅ་པའོ་ཡིས་ཉིན་པོ་གྲོང་ཁྱེར་ནས་ཧྲང་ཧེ་དང་ཅང་སུའུ། ཀྲེ་ཅང་བཅས་ཞིང་ཆེན་དང་གྲོང་ཁྱེར་གསུམ་གྱི་དཔལ་འབྱོར་གནས་བབ་སྐོར་གྱི་བཞུགས་མོལ་ཚོགས་ཚོགས་འདུ་ལ་མགོ་འཛིན་མཛད་དེ་གསུང་བཤད་གལ་ཆེན་གནང་།
 ཚེས་བརྒྱད་ཉིན་གྱི་དགོང་མོར། བུན་ཅ་པའོ་ད་དུང་ཉིན་པོ་ནོ་ཏིན་ཧན་སློབ་གྲྭ་ཆེན་ཆེན་མོར་ཕེབས་ཏེ། རྒྱལ་ཁབ་ཕྱི་ནང་གི་དགེ་སློབ་རྣམས་ལ་འཚམས་འདྲི་མཛད་པ་དང་། ཁོ་ཚོ་དང་བགྲོ་གླེང་མཛད།