ཟླ་བཞི་བའི་ཚེས་བཞི་ཉིན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཅ་ཆིན་ལིན་གྱིས་ནེ་པུས་ཏུའུ་གྲོང་ཁྱེར་ནས་འབར་མའི་མི་དམངས་ཁང་གི་གྲོས་དཔོན་བུའུ་རོས་མན་དང་གྲོས་མོལ་མཛད།

  རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཅ་ཆིན་ལིན་གྱིས་ཚེས་བཞི་ཉིན་གྱི་སྔ་དྲོར་ནེ་པུས་ཏུའུ་གྲོང་ཁྱེར་ནས་འབར་མའི་མི་དམངས་ཁང་གི་གྲོས་དཔོན་བུའུ་རོས་མན་དང་གྲོས་མོལ་མཛད།

  གྲོས་མོལ་མཛད་སྐབས་ཅ་ཆིན་ལིན་གྱིས་ཕྱོགས་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བའི་ཐད་ལ་གྲོས་གཞི་འགའ་བཏོན། གཅིག མཐོ་རིམ་མགོ་ཁྲིད་པའི་བར་གྱི་འགྲོ་འོང་རྒྱུན་འཁྱོངས་བྱས་ནས་ཆབ་སྲིད་ཐད་ཀྱི་ཡིད་ཆེས་སྔར་ལས་ཇེ་བརྟན་དུ་གཏོང་བ་དང་མཛའ་མཐུན་མཉམ་ལས་ཇེ་མང་དུ་གཏོང་དགོས། གཉིས། རྒྱལ་བཅོས་སྲིད་སྐྱོང་གི་ཉམས་མྱོང་དང་དཔལ་འབྱོར་དང་སྤྱི་ཚོགས་འཕེལ་རྒྱས་བསམ་ཕྱོགས་ཀྱི་བྱེད་ཐབས་བརྗེ་རེས་བྱེད་པར་ཤུགས་སྣོན་དགོས། གསུམ། གཉིས་ཕན་མཉམ་ལས་གཏིང་ཟབ་ཏུ་སྤེལ་ནས། རྒྱལ་ཁབ་གཉིས་ཀྱི་འགྲིམ་འགྲུལ་དང་ནུས་ཁུངས་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་དགོས། བཞི། ཏང་བར་གྱི་འབྲེལ་འདྲིས་ཇེ་ཟབ་ཏུ་གཏོང་དགོས། ལྔ། རྒྱལ་སྤྱིའི་ས་ཁུལ་བར་གྱི་ལས་དོན་མཐུན་སྦྱོར་བྱེད་པར་ཤུགས་སྣོན་དགོས་ཟེར།

  བུའུ་རོས་མན་གྱིས་བཤད་རྒྱུར། འབར་མ་ཕྱོགས་ཀྱིས་ཀྲུང་གོའི་བར་གྱི་མཛའ་མཐུན་འགྲོ་འོང་ཇེ་མང་དུ་གཏོང་བ་དང་། རྒྱལ་ཁབ་གཉིས་ཀྱི་མགོ་ཁྲིད་པ་དང་སྲིད་གཞུང་། དེ་མིན་མི་དམངས་བར་གྱི་མཛའ་མཐུན་འབྲེལ་བ་སྔར་ལས་ཇེ་བརྟན་དུ་གཏོང་འདོད་ཡོད་པར་མ་ཟད། ཀྲུང་གོ་ཕྱོགས་དང་མཉམ་དུ་འབད་བརྩོན་བྱས་ཏེ་རྒྱལ་ཁབ་གཉིས་ཀྱི་ཆབ་སྲིད་དང་དཔལ་འབྱོར། སྤྱི་ཚོགས་སོགས་ཁྱབ་ཁོངས་ཀྱི་མཉམ་ལས་རྒྱ་བསྐྱེད་པ་དང་། རྒྱལ་ཁབ་གཉིས་ཀྱི་འབྲེལ་བ་དེ་འཐབ་ཇུས་མཉམ་ལས་ཀྱི་མཐོ་ཚད་དུ་བསླེབ་པར་སྐུལ་འདེད་གཏོང་འདོད་ཡོད་ཟེར།