ལན་རྫོང་གི་པེ་ཀོན་སྡེ་བ་དང་ཞན་རྫོང་གི་ཀྲང་ཅ་བན་སྡེ་བའི་མང་ཚོགས་དང་བཞུགས་མོལ་མཛད་སྐབས་བུན་ཅ་པོ་ཡིས་གསུངས་རྒྱུར། ས་ཞིང་ནི་ཞིང་བའི་ཆེས་ཆེ་བའི་སྤྱི་ཚོགས་འགན་སྲུང་ཡིན་པ་དང་། ཞིང་བའི་གཞི་རྩའི་ཁེ་དབང་སྲུང་སྐྱོབ་བྱེད་སྐབས་ཆེས་གལ་ཆེ་བ་ནི་ས་ཞིང་ཁེ་དབང་སྲུང་སྐྱོབ་བྱེད་རྒྱུ་དེ་ཡིན་ལ། ཞིང་ས་ནི་ཞིང་བའི་ཁེ་ཕན་ཡིན་པར་མ་ཟད་རྒྱལ་ཁབ་ཀྱི་ཁེ་ཕན་ཡང་ཡིན་པས། ས་ཞིང་བཀོད་སྤྱོད་བྱེད་སྐབས་ཞིང་བ་མང་ཚོགས་ཀྱི་འདོད་བློ་ལ་བརྩི་འཇོག་བྱེད་དགོས་པ་ལས་བཙན་ཤུགས་བཀོལ་མི་རུང་བ་དང་། ལམ་ལས་བ་དང་ཁང་བ་ལས་སྐབས་ཞིང་བའི་ཞིང་ས་གང་འདོད་དུ་བཀོལ་མི་ཆོག་ཟེར།

  ཚེས་གཉིས་ཉིན་གྱི་ཕྱི་དྲོར་ཙུང་ལི་བུན་ཅ་པོ་ལན་རྫོང་གི་ཕུའུ་མེན་གྲོང་བརྡལ་ལྟེ་གནས་འཕྲོད་བསྟེན་ཁང་དུ་ཕེབས་ནས་ཞིང་སྡེའི་སྨན་བཅོས་ཉེན་སེལ་གནས་ཚུལ་རྒྱུས་ལོན་ཞིབ་མོ་མཛད། ཁོང་གིས་གསུངས་རྒྱུར། ལོ་འདི་དག་གི་རིང་ལ་རྒྱལ་ཁབ་ཀྱིས་མ་དངུལ་གང་མང་བཏང་ནས་སྨན་བཅོས་བཅོས་སྒྱུར་བྱ་བའི་ཐད་ནས་གྲུབ་འབྲས་ཆེན་པོ་བླངས་པར་མ་ཟད་ཞིང་བས་ནད་སྟོན་དཀའ་བ་སོགས་ཀྱི་གནད་དོན་ཐག་གཅོད་བཟང་བོ་བྱས་ཟེར།

  ཚེས་གཉིས་ཉིན་གྱི་དགོང་མོ་དང་ཚེས་གསུམ་ཉིན་གྱི་དགོང་མོར་བུན་ཅ་པོ་ཡིས་ལན་རྫོང་དང་ལིན་རྫོང་དུ་བཞུགས་མོལ་ཚོགས་འདུ་བསྡུས་ཏེ། ས་གནས་སྲིད་གཞུང་གིས་དེང་སྐབས་ཀྱི་དཔལ་འབྱོར་བྱ་བའི་གནས་ཚུལ་ཡར་ཞུ་བྱས་པ་དང་གཞི་རིམ་ལས་བྱེད་པ་དང་མང་ཚོགས་ཀྱིས་བཏོན་པའི་བསམ་འཆར་དང་གྲོས་གཞི་ལ་ཉན། ཁོང་གིས་གསུངས་རྒྱུར། ལོས་ལེང་ནི་རང་རྒྱལ་གྱིས་དབུལ་སྐྱོར་གསར་སྤེལ་བྱེད་པའི་ས་ཁུལ་གཙོ་བོ་ཞིག་ཡིན་པས། ས་གནས་སྲིད་གཞུང་གིས་མུ་མཐུད་དུ་དབུལ་ཕོངས་ས་ཁུལ་ལ་རོགས་སྐྱོར་བྱེད་པའི་ཤུགས་ཚད་ཇེ་ཆེར་གཏོང་དགོས་པ་དང་། སྤྱི་ཚོགས་ཀྱི་ལས་རིགས་སོ་སོ་སྐུལ་སློང་བྱས་ཏེ་དབུལ་སྐྱོར་གསར་སྤེལ་བྱེད་དགོས། ལོ་བཅུ་ལྷག་གི་རིང་ལ་འབད་བརྩོན་བྱས་པ་བརྒྱུད་ནས་ལོས་ལེང་རི་ཁུལ་དང་དབུལ་ཕོངས་ས་ཁུལ་གཞན་དག་གི་རྣམ་པར་འགྱུར་ལྡོག་ཆེན་པོ་བྱུང་ཟེར།