རྒྱལ་ཁབ་ཀྱི་ཀྲུའུ་ཞི་གཞོན་པ་ཞི་ཅིན་ཕེན་གྱིས་ཚེས་ཉེར་དགུ་ཉིན་པེ་ཅིན་ནས་ཨ་མེ་རི་ཁའི་པིས་ཨེར་ཅི་མེ་ལིན་ཏ་ཀེད་ཚི་ཐེབས་རྩ་ཚོགས་པའི་མཉམ་འབྲེལ་ཀྲུུའུ་ཞི་པིས་ཨེར་ཀེད་ཚི་ལ་མཇལ་འཕྲད་གནང་།

ཞི་ཅིན་ཕེན་གྱིས་བསྟན་དོན། དེང་སྐབས་ཀྲུང་གོ་དང་ཨ་མེ་རི་ཁ་ཕྱོགས་ཀས་རྒྱལ་ཁབ་གཉིས་ཀྱི་མགོ་གཙོ་བར་བྱུང་བའི་གཅིག་མཐུན་གྱི་ལྟ་ཚུལ་གཞིར་བཟུང་ནས།ཧུར་ཐག་སྒོས་ཕན་ཚུན་བརྩི་འཇོག་དང་གཉིས་ཕན་མཉམ་རྒྱལ་གྱི་མཉམ་ལས་འབྲེལ་བ་འཛུགས་པར་སྐུལ་འདེད་བྱེད་བཞིན་ཡོད་ལ།ཕྱོགས་གཉིས་བར་གྱི་རྒྱ་ཆེན་པོའི་ཁྱབ་ཁོངས་མཉམ་ལས་སྔར་བས་འཕེལ་རྒྱས་ཆེན་པོ་འགྲོ་བཞིན་ཡོད། འདིས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་པ་མ་ཟད་འཛམ་གླིང་གི་ཞི་བདེ་དང་འཕེལ་རྒྱས་ལའང་ཕན་པ་ཡོད།

ཞི་ཅིན་ཕེན་གྱིས་ཀེད་ཚི་ཐེབས་རྩ་ཚོགས་པས་ཡུན་རིང་བོར་འགྲོ་བ་མིའི་རིགས་ཀྱི་བདེ་ཐང་དང་འཕེལ་རྒྱས་ལས་དོན་ཐད་ཐུགས་འཁུར་དང་རྒྱབ་སྐྱོར།དེ་མིན་འཛམ་གླིང་ཡོངས་ཀྱི་དབུལ་ཕོངས་མེད་པར་གཏོང་བ་དང་ནད་རིགས་འགོག་བཅོས་བྱེད་པའི་ཐད་ལ་འབད་པ་བྱས་པ་དང་།ཀྲུང་གོ་འབྲེལ་ཡོད་སྡེ་ཁག་དང་མཉམ་དུ་འཕྲོད་བསྟེན་དང་ཞིང་ལས། ཚན་རྩལ་སོགས་ཁྱབ་ཁོངས་སུ་ཧུག་ཐག་སྒོས་གཉིས་ཕན་མཉམ་ལས་སྤེལ་བར་བསྟོད་བསྔགས་བྱས། ཞི་ཅིན་ཕེན་གྱིས་ཀེད་ཚི་ཐེབས་རྩ་ཚོགས་པས་ཀྲུང་གོའི་མཉམ་ལས་ཕྱོགས་དང་མཉམ་དུ་མཉམ་ལས་ཀྱི་ལས་གཞི་ལག་བསྟར་བྱེད་པ་སྲུང་འཛིན་ལེགས་པོ་བྱེད་དགོས་པ་དང་།མུ་མཐུད་དུ་ནུས་ལྡན་གྱི་མཉམ་ལས་རྣམ་པ་འཚོལ་ཞིབ་དང་གསར་གཏོད་བྱས་ཏེ།མཉམ་ལས་སྒྲིག་སྲོལ་ཇེ་ལེགས་ཇེ་རྒྱས་སུ་བཏང་སྟེ།ཕན་ཚུན་བར་གྱི་དགེ་མཚན་ཁ་གསབ་བྱེད་པ་མངོན་འགྱུར་བྱེད་པ་དང་། དེ་དང་མཉམ་དུ་ད་དུང་ཐོན་ཁུངས་སོ་སོའི་ཐབས་ལམ་སྣ་ཚོགས་སྤྱད་ནས་ཚན་རྩལ་གསར་གཏོད་དང་གྲུབ་འབྲས་བེད་སྤྱོད་བྱེད་པར་ཤུགས་བསྣོན་པ་དང་།ཀྲུང་གོ་དང་རྒྱ་ཆེ་བའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་སྨན་བཅོས་འཕྲོད་བསྟེན་ཆུ་ཚད་མཐོར་འདེགས་སུ་གཏོང་བའི་ཐད་ལ་ནུས་པ་བཟང་བོ་འདོན་པའི་རེ་བ་བཅངས་ཡོད་ཟེར།

པིས་ཨེར་ཀེད་ཚི་ཡིས་བསྟན་དོན། ཨ་མེ་རི་ཁ་དང་ཀྲུང་གོའི་བར་མཉམ་ལས་འབྲེལ་བ་ལེགས་པོ་རྒྱུན་འཁྱོངས་བྱེད་པ་ནི་འཛམ་གླིང་ལ་མཚོན་ན་ཧ་ཅང་གལ་ཆེན་པོ་ཡིན། ཐེབས་རྩ་ཚོགས་པས་ཀྲུང་གོའི་བར་གྱི་མཉམ་ལས་ལ་ཚད་མཐོན་པའི་སྒོ་ནས་མཐོང་ཆེན་བྱེད་བཞིན་ཡོད། རྗེས་ཕྱོགས་ནས་ཀྱང་མུ་མཐུད་དུ་འབྲེལ་ཡོད་ལས་གཞི་སྤེལ་ནས་ཀྲུང་གོའི་ནད་རིགས་ཚོད་འཛིན་དང་བདེ་ཐང་ལས་དོན་གྱི་འཕེལ་རྒྱས་ཐད་ལ་རང་ཉིད་ཀྱི་བྱས་རྗེས་འཇོག་རྒྱུ་ཡིན་ཟེར།