ཟླ་ལྔ་བའི་ཚེས་ཉེར་གསུམ་ཉིན། པད་མ་རྫོང་གིས་སྲིད་གཞུང་བོད་ཡིག་དྲ་ཚིགས་ཐོག་མ་ཕྱེས་མགོ་རྩོམ་པའི་མཛད་སྒོ་བསྡུས། དྲ་ཚིགས་འདི་དངོས་སུ་ཕྱེས་མགོ་བརྩམས་པ་འདིས། པད་མ་རྫོང་གིས་རྒྱ་ཆེ་བའི་བོད་རིགས་མང་ཚོགས་ལ་སྲིད་ཇུས་དྲིལ་སྒྲོག་དང་། བསམ་བློ་བརྗེ་རེས།ཞབས་ཞུ་མཁོ་སྤྲོད་བྱེད་པའི་སྟེགས་བུ་གལ་ཆེན་ཞིག་བསྐྲུན་ཡོད་ལ།པད་མ་རྫོང་གི་ཆ་འཕྲིན་ཅན་གྱི་བྱ་བ་དུས་རིམ་གསར་བ་ཞིག་ཏུ་སླེབས་ཡོད་པ་མཚོན་ཐུབ་ལ། རང་ཞིང་ལ་རྫོང་རིམ་པའི་སྲིད་གཞུང་གི་བོད་ཡིག་དྲ་ཚིགས་མེད་པའི་སྟོང་ཆ་བསྐངས།
 པད་མ་རྫོང་སྲིད་གཞུང་གི་བོད་ཡིག་དྲ་ཚིགས་སུ་མགོ་ཁྲིད་པའི་ལེ་ཚན་དང་། སྲིད་དོན་ཆ་འཕྲིན། བཅའ་ཁྲིམས་དང་ཁྲིམས་སྲོལ། སྲིད་གཞུང་གི་ཡིག་ཆ། དཔལ་འབྱོར་འཛུགས་སྐྲུན། ཆེད་དོན་ཆེད་བསྒྲིགས་ལེ་ཚན། སྤྱི་ཚོགས་རིག་གནས་སྣང་ཚུལ་སྣ་ཚོགས་ཀྱི་ལོ་རྒྱུས། ས་གཤིས་དང་གནམ་གཤིས། མི་རིགས་སྲོལ་རྒྱུན། གནས་སྐོར་མཛེས་ལྗོངས། ཐོན་རྫས་མཚམས་སྦྱོར་སོགས་ཚན་བྱང་བཞི་བཅུ་ལྷག་ཡོད། ཚན་བྱང་སོ་སོར་བོད་ཡིག་དང་།རྒྱ་ཡིག་བཀོལ་སྤྱོད་བྱས་ཆོག་ལ།རྫོང་ཡོངས་ཀྱི་ལས་བྱེད་པ་དང་མང་ཚོགས་ཀྱིས་དུས་ཐོག་ཏུ་སྲིད་དོན་ཆ་འཕྲིན་དང་།རིག་གནས་སློབ་གསོ།ཚན་རྩལ་ཤེས་བྱ་བརྒྱུད་སྒྲོག་བྱས་ཏེ་མང་ཚོགས་ཀྱི་ཆུ་ཚད་མཐོ་རུ་བཏེགས་ནས།པད་མ་རྫོང་གི་ཐུན་མིན་ཁྱད་ཆོས་དང་། མཚན་སྙན་གྲགས་ཕྱི་ཕྱོགས་སུ་ཁྱབ་པར་བྱས།