ཀྲུང་གུང་ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན་ལིས་ཁྲང་ཁྲོན་གྱིས་ས་དེའི་ཚེས་ཉེར་གཉིས་ཉིན་གྱི་ཕྱི་དྲོར་མཱ་ཕུའུ་ཐའོ་ནས་མའོ་སིང་པུས་ཁིའི་ཙུང་ཐུང་། བཅིངས་འགྲོལ་འཐབ་ཕྱོགས་ཏང་གི་ཀྲུའུ་ཞི་ཀི་པུའུ་ཀྲ་ལ་མཇལ་འཕྲད་གནང་།
 ལིས་ཁྲང་ཁྲོན་གྱིས་གསུང་དོན། མའོ་སིང་པུས་ཁི་ནི་ཀྲུང་གོའི་ཨ་ཧྥེ་རི་ཁའི་གྲོགས་པོ་དང་སྤུན་ཟླ་བཟང་བོ་ཡིན་ལ། ཕན་ཚུན་བར་འབྲེལ་བ་བཙུགས་ནས་ལོ་ངོ་སོ་དྲུག་འགོར་བའི་རིང་ལ། རྒྱལ་ཁབ་གཉིས་ཀྱི་མཛའ་མཐུན་མཉམ་ལས་འབྲེལ་བ་ནམ་ཡང་བདེ་བླག་ངང་འཕེལ་རྒྱས་སུ་སོང་བ་དང་། ཁྱབ་ཁོངས་སོ་སོའི་བརྗེ་རེས་མཉམ་ལས་ལ་གྲུབ་འབྲས་བཟང་བོ་ཐོབ་ཡོད། ཕྱོགས་གཉིས་ཀྱིས་འབད་བརྩོན་བྱས་འོག་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་པེ་ཅིན་མཐོ་རིམ་གྲོས་ཚོགས་ནས་གཏན་འཁེལ་བྱས་པའི་མའོ་སིང་པུས་ཁི་བར་གྱི་མཉམ་ལས་བྱེད་ཐབས་དང་ཀྲུང་གོ་དང་མའོ་སིང་པུས་ཁི་རྒྱལ་ཁབ་གཉིས་ཀྱི་མགོག་ཁྲིད་པས་ཕན་ཚུན་འཚམས་འདྲི་བྱས་པའི་གྲུབ་འབྲས་དང་འབྲེལ་བའི་ལས་གཞི་ཡོད་ཚད་དངོས་འབེབས་བྱས་པ་དང་། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པུའུ་ཀྲང་རིམ་པའི་གྲོས་ཚོགས་སྐབས་བཞི་བའི་བྱེད་ཐབས་གསར་བ་བརྒྱད་བཏོན་པའི་མའོ་སིང་པུས་ཁི་བར་གྱི་མཉམ་ལས་ལས་གཞི་དག་ཀྱང་ཡོངས་འགྲུབ་བྱས་ཡོད་ཅེས་གསུངས།
 ཀྲུང་གོ་དང་ཨ་ཧྥེ་རི་ཁའི་འབྲེལ་བ་གླེང་སྐབས། ལིས་ཁྲང་ཁྲོན་གྱིས་ཀྲུང་གོས་ཐོག་མཐའ་བར་གསུམ་དུ་བློ་བརྟན་འགྱུར་མེད་སྒོས་ཀྲུང་གོ་དང་ཨ་ཧྥེ་རི་ཁའི་སྲོལ་རྒྱུན་མཛའ་མཐུན་སྲ་བརྟན་དང་འཕེལ་རྒྱས་སུ་གཏོང་རྒྱུ་བསྐྱར་སྒྲོག་བྱས་པ་དང་། མའོ་སིང་པུས་ཁི་དེ་ཨ་ཧྥེ་རི་ཁ་ལྷོ་མའི་རྒྱལ་ཁབ་གལ་ཆེན་ཞིག་ཡིན་པའི་ཆ་ནས་ཀྲུང་གོ་དང་མཉམ་དུ་འབད་བརྩོན་བྱས་ཏེ། ཀྲུང་གོ་དང་ཨ་ཧྥེ་རི་ཁའི་མཉམ་ལས་འབྲེལ་བ་ཇེ་ཟབ་ཏུ་གཏོང་བར་ཆ་རྐྱེན་བཟང་བོ་སྐྲུན་ནས། ཀྲུང་གོ་དང་ཨ་ཧྥེ་རི་ཁའི་རྣམ་པ་གསར་བའི་འཐབ་ཇུས་གྲོགས་པོའི་འབྲེལ་བ་མགྱོགས་ཤིང་བཟང་བའི་སྒོ་ནས་འཕེལ་རྒྱས་སུ་འགྲོ་བར་ཡས་སྐུལ་བྱེད་དགོས་ཞེས་གསུངས།