ཞིན་ཧྭ་གསར་འགྱུར་ཁང་ཧུའུ་ཧོ་ཧའོ་ཐེ་ནས་འབྱོར་བའི་གཏམ་གསར། ནང་སོག་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་ནས་ཤེས་རྟོགས་བྱུང་དོན།  ཐོན་སྐྱེད་ནུས་ཁུངས་མང་དྲགས་པ་དང་རྗེས་ལུས་ཀྱི་ཐོན་སྐྱེད་ནུས་པ་མི་དགོས་པ། ཁེ་ལས་ཟླ་སྒྲིལ་སྒྲིག་འཛུགས་སོགས་ཀྱི་ལས་ཀ་ལེགས་པོ་སྒྲུབ་ཆེད། ཉེ་ཆར་ནང་སོག་གིས་རེས་སྐོར་གསར་པའི་དཀའ་ངལ་ཡོད་པའི་ཁེ་ལས་ཀྱི་ལས་ཞུགས་ལས་གནས་བརྟན་བརླིང་བྱེད་པར་རོགས་སྐྱོར་བྱེད་པའི་སྲིད་ཇུས་ལག་བསྟར་བྱས་པས། དུས་རིམ་རང་བཞིན་གྱི་ལས་ཤོར་ཉེན་འགོག་གི་འགྲོ་སོང་སྤྲད་པའི་གཞི་གྲངས་དམའ་རུ་བཏང་བ་དང་ལས་ཤོར་ཉེན་འགོག་གི་ཐེབས་རྩ་སྤྱད་དེ་དཀའ་ངལ་ཡོད་པའི་ཁེ་ལས་ཀྱིས་ལས་ཞུགས་ལས་གནས་བརྟན་བརླིང་བྱེད་པར་རོགས་རམ་བྱས་པ་རེད། 
ནང་སོག་གིས་ཆེས་གསར་པའི་སྲིད་ཇུས་ནང་གཏན་འཁེལ་བྱས་དོན། ལས་ཤོར་ཉེན་འགོག་གཅིག་འགྱུར་འཆར་འགོད་ས་ཁུལ་གྱི་མི་དམངས་སྲིད་གཞུང་གིས་ལས་ཤོར་མི་སྣའི་ལས་ཤོར་ཉེན་འགོག་གི་ཐོབ་ཐང་ཆུ་ཚད་མི་ཆག་པ་དང་ལས་ཤོར་ཉེན་འགོག་ཐེབས་རྩ་ལོ་གསུམ་ནང་ཁ་ཤོ་མི་འོངས་བར་ཁག་ཐེག་བྱེད་པའི་ཆ་རྐྱེན་འོག  ལས་ཤོར་ཉེན་འགོག་ལ་ཞུགས་པའི་དཀའ་ངལ་ཡོད་པའི་ཁེ་ལས་ཀྱིས་གཏན་འཁེལ་ལྟར་གྲོན་འཇལ་གཞི་གྲངས་ཀྱི་བརྒྱ་ཆ60ཡི་ཚད་གཞི་ལྟར་ལས་ཤོར་ཉེན་འགོག་གྲོན་དངུལ་སྤྲད་དགོས། དཀའ་ངལ་ཡོད་པའི་ཁེ་ལས་ཀྱི་མི་རེའི་ཆ་སྙོམས་གླ་ཕོགས་དེ་ལོ་འཁོར་སྔ་མའི་ས་གནས་ཀྱི་ལས་ཞུགས་ལས་བཟོའི་ཆ་སྙོམས་གླ་ཕོགས་ཀྱི་བརྒྱ་ཆ60ལས་དམའ་ན། ཁེ་ལས་དང་མི་སྒེར་གྱིས་གླ་ཕོགས་ཀྱི་བསྡོམས་འབོར་དངོས་དེ་གྲོན་འཇལ་གཞི་གྲངས་བྱས་ཏེ་ལས་ཤོར་ཉེན་འགོག་གི་གྲོན་དངུལ་སྤྲོད་དགོས་ཤིང་། ཡིན་ནའང་མི་རེའི་ཆ་སྙོམས་གླ་ཕོགས་དེ་ས་གནས་དེ་གའི་ཆེས་དམའ་བའི་གླ་ཕོགས་ཀྱི་ཚད་གཞི་ལས་དམའ་མི་ཆོག་པ་རེད། 
      མིག་སྔར། ནང་སོག་གིས་དཀའ་ངལ་ཡོད་པའི་ཁེ་ལས་ཀྱིས་ལས་གནས་བརྟན་བརླིང་བྱེད་པར་ཁ་གསབ་རོགས་དངུལ་སྤྲོད་རོགས་བྱ་རྒྱུའི་སྙན་སེང་ཞུ་བ་དང་།  ཞིབ་དཔྱད་བྱེད་པ། གཏོང་སྤྲོད་ཀྱི་གོ་རིམ།  སྲིད་ཇུས་འཕྲོད་པའི་གཞི་ཁྱོན་སོགས་ལ་གཏན་འཁེལ་གསལ་པོ་བྱས་ཤིང་། དུས་ཐོག་ཏུ་ཐོན་སྐྱེད་བདག་གཉེར་བྱེད་ཁྲོད་དཀའ་ངལ་འཕྲད་པའི་ཁེ་ལས་ཀྱི་ཁུར་པོ་ཇེ་ཡང་དུ་གཏོང་རོགས་བྱ་རྒྱུ་དང་། ལས་ཞུགས་ལས་གནས་བརྟན་བརླིང་བྱེད་རོགས་བྱ་རྒྱུ། ཁེ་ལས་དང་ལས་བཟོས་ཉེན་ཁ་འགོག་པ་དང་གྲོས་བསྡུར་བྱས་ཏེ་མཉམ་ཁེ་བྱེད་པའི་ངལ་རྩོལ་འབྲེལ་བ་འཛུགས་སྐྱོང་བྱེད་རོགས་བྱ་རྒྱུ་བཅས་ཡིན་པ་རེད།