ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།ཨུ་རུ་སིས་ཚེས་གསུམ་ཉིན་ཝུའུ་ཁི་ལན་ཤར་ཕྱོགས་ས་ཁུལ་གྱི་གནས་བབ་བརྟན་འཇགས་ཐད་ཀྱི་ཞི་བདེ་འཆར་གཞི་བཏོན།ཨ་མེ་རི་ཁའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་པ་ཕུའུ་སཱ་ཅི་ཡིས་ཉིན་དེར་བཤད་རྒྱུར།འཆར་གཞི་དེ་ལས་ཨུ་རུ་སི་ཡིས་འགན་འཁྲི་གང་དག་འཁུར་དགོས་པ་གསལ་བོར་བསྟན་མེད་ཟེར།མོས་བཤད་རྒྱུར།ཙུང་ཐུང་ཕུའུ་ཅིན་གྱིས་གནད་དོན་མང་བོ་གླེང་ཡང་།ལག་བསྟར་གཏན་ནས་བྱེད་མི་སྲིད་ཟེར།
ཨུ་རུ་སིའི་ཙུང་ཐུང་ཕུའུ་ཅིན་གྱིས་ཚེས་གསུམ་ཉིན་ཝུའུ་ཁི་ལན་གྱི་ཙུང་ཐུང་པའོ་ལོ་ཧྲིན་ཁི་ལ་ཁ་པར་བཏང་སྟེ།ཝུའུ་ཁི་ལན་ཤར་ཕྱོགས་ས་ཁུལ་གྱི་གནས་བབ་ལ་གྲོས་བསྡུར་བྱས།བསྒྲགས་པའི་གནས་ཚུལ་ལྟར་ན།ཕུའུ་ཅིན་གྱིས་ཞི་བདེའི་འཆར་གཞི་ཞིག་བཏོན་པ་དང་།དེར་ཝུའུ་ཁི་ལན་སྲིད་གཞུང་དམག་དཔུང་ཕྱིར་འཐེན་བྱེད་པ་དང་།མི་ཆོས་རིང་ལུགས་ཀྱི་རྒྱུ་ལམ་འཛུགས་པ།རྒྱལ་སྤྱིའི་སྤྱི་ཚོགས་ཀྱིས་འཁྲུག་རྩོད་ལ་ལྟ་རྟོག་བྱེད་དགོས་པ་སོགས་ནང་དོན་བདུན་འདུས་ཟེར།
ཧྥ་རན་སིའི་ཙུང་ཐུང་བཞུགས་ཤག་གིས་ཚེས་གསུམ་ཉིན་གསལ་སྒྲོག་སྤེལ་ཏེ།ཨུ་རུ་སི་ཡིས་ཉེ་ལམ་ཝུའུ་ཁི་ལན་ཤར་ཕྱོགས་ས་ཁུལ་དུ་སྤེལ་བའི་བྱ་སྤྱོད་ལ་དམིགས་ཏེ།ཧྥ་རན་སི་རྒྱལ་ཁབ་ཀྱིས་ཨུ་རུ་སི་ལ་གནས་སྐབས་སུ་ནུབ་བྱང་གི་རླུང་ཞེས་པའི་སྐམ་མཚོ་གཉིས་སྤྱོད་ཀྱི་དཔུང་འཇུག་གྲུ་གཟིངས་དེ་སྤྲོད་རྒྱུ་མིན་ཟེར།
ཕུའུ་སཱ་ཅི་ཡིས་ཚེས་གསུམ་ཉིན་བཤད་རྒྱུར།དེ་ནི་བློ་གྲོས་ལྡན་པའི་ཆོད་དོན་ཞིག་རེད།ཨ་མེ་རི་ཁས་ཧྥ་རན་སིའི་ཆོད་དོན་དེར་རྒྱབ་སྐྱོར་བྱེད་བཞིན་ཡོད་ཟེར།ཨ་མེ་རི་ཁའི་རྒྱལ་སྲུང་པུའུ་ཡིས་བསྒྲགས་པའི་གནས་ཚུལ་ལྟར་ན།ཨ་མེ་རི་ཁའི་དམག་དཔུང་གིས་ཟླ་འདིར་ཝུའུ་ཁི་ལན་གྱི་དམག་དཔུང་དང་མཉམ་དུ་དམག་དོན་སྦྱོང་བརྡར་བྱ་འགུལ་ཐེངས་གཉིས་སྤེལ་རྒྱུ་རེད།ཨ་མེ་རི་ཁའི་རྒྱལ་སྲུང་པུའུ་ཡི་མགྲིན་ཚབ་པ་བོ་ལོན་གྱིས་བསྟན་དོན།ཨ་མེ་རི་ཁ་དང་ཝུའུ་ཁི་ལན་གྱིས་ཝུའུ་ཁི་ལན་ནུབ་ཕྱོགས་ས་ཁུལ་ནས་མཉམ་འབྲེལ་དམག་དོན་སྦྱོང་བརྡར་བྱ་འགུལ་སྤེལ་རྒྱུ་ཡིན་པ་དང་།ཨ་མེ་རི་ཁས་དམག་མི་ཉིས་བརྒྱ་ཙམ་མངག་གཏོང་བྱེད་རྒྱུ་ཡིན་ཟེར།ཁོས་བསྟན་དོན།དམག་དོན་སྦྱོང་བརྡར་དེ་ནི་ཚེས་བཅུ་གསུམ་ཉིན་ནས་མགོ་རྩོམ་རྒྱུ་ཡིན་པ་དང་ཚེས་ཉེར་དྲུག་ཉིན་མཇུག་སྒྲིལ་རྒྱུ་ཡིན་ཟེར།
དེ་ལས་གཞན་ཨ་མེ་རི་ཁས་གཟའ་འཁོར་རྗེས་མར་ཝུའུ་ཁི་ལན་དང་ཐུར་ཁེ།ཀི་ལུའུ་ཅི་ཡཱ།རོ་མཱ་ནི་ཡཱ་སོགས་རྒྱལ་ཁབ་དང་མཉམ་དུ་མཚོ་ནག་མཚོ་ཁོངས་ནས་མཉམ་འབྲེལ་དམག་དོན་སྦྱོང་བརྡར་བྱ་འགུལ་སྤེལ་བའི་འཆར་གཞི་ཡོད།དམག་དོན་སྦྱོང་བརྡར་དེ་ཉིན་གསུམ་ལ་སྤེལ་རྒྱུ་ཡིན་པ་དང་།ཨ་མེ་རི་ཁའི་དམག་དཔུང་གིས་ལོ་སི་རྟགས་ཅན་གྱི་མཐར་སྐྲོད་གྲུ་གཟིངས་དང་མཚོ་དམག་ཉིས་བརྒྱ་དང་བརྒྱད་ཅུ་མངག་གཏོང་བྱེད་རྒྱུ་རེད།ཨ་མེ་རི་ཁའི་དམག་ཕྱོགས་ཀྱིས་བཤད་རྒྱུར།དམག་དོན་སྦྱོང་བརྡར་བྱ་འགུལ་སྤེལ་བའི་དམིགས་ཡུལ་ནི་ས་ཁུལ་གྱི་བརྟན་འཇགས་དང་བདེ་འཇགས་ལ་སྲུང་སྐྱོབ་བྱེད་པའི་ཆེད་དུ་ཡིན་ཟེར།