ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཟླ་དགུ་བའི་ཚེས་གཉིས་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ནས།སྔོན་རྩིས་དོ་དམ་བྱ་བ་འཐུས་ཚང་དུ་བཏང་སྟེ་ནོར་སྲིད་བསྡུ་གཏོང་ཚད་ལྡན་དང་མངོན་གསལ་ཡོང་བར་བྱེད་པའི་སྐོར་གྱི་འབྲེལ་ཡོད་བསམ་འཆར་ལ་ཞིབ་འཇུག་བྱས་པར་མ་ཟད།ལུས་རྩལ་ཐོན་ལས་མྱུར་དུ་འཕེལ་རྒྱས་སུ་གཏོང་བ་དང་།ལུས་རྩལ་འཛད་སྤྱོད་ལ་ཡར་སྐུལ་གཏོང་བ།དམངས་ཡོངས་ཀྱི་ལུས་ཕུང་སྦྱོང་བརྡར་བྱེད་པ་བཅས་བཀོད་སྒྲིག་བྱས།
ཚོགས་ཐོག་ནས་བསྟན་དོན།སྔོན་རྩིས་ནི་སྤྱི་པའི་ནོར་སྲིད་ཀྱི་རྨང་གཞི་ཡིན།སྔོན་རྩིས་དོ་དམ་བཅོས་བསྒྱུར་དང་འཐུས་ཚང་དུ་བཏང་སྟེ།དེང་རབས་ཅན་མངོན་འགྱུར་བྱེད་པ་དང་མཐུན་པའི་དེང་རབས་ཀྱི་ནོར་སྲིད་ལམ་ལུགས་འཛུགས་པ་ནི་ནོར་ཁྲལ་སྒྲིག་གཞི་བཅོས་བསྒྱུར་བྱེད་པའི་བྱ་བ་གཙོ་བོ་ཡིན་ལ།སྲིང་གཞུང་གིས་རང་ཉིད་གསར་བརྗེ་བྱེད་པའི་བྱེད་ཐབས་གལ་ཆེན་ཞིག་ཀྱང་ཡིན་པས།ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་བཀོད་སྒྲིག་དང་།རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་སྟེང་གྲོས་ཞིབ་དང་གྲོས་འཆམ་བྱུང་བའི་སྔོན་རྩིས་བཟོ་བཅོས་འཆར་ཟིན་ལྟར།སྔོན་རྩིས་དོ་དམ་ལ་ཤུགས་སྣོན་དང་འཐུས་ཚང་དུ་གཏོང་བ་དང་།ནོར་སྲིད་ཡོང་སྒོ་ཚད་ལྡན་དང་མངོན་གསལ་ཡོང་བར་བྱེད་དགོས་ཟེར།
ཚོགས་ཐོག་ནས་བལྟས་ན།ལུས་རྩལ་ཐོན་ལས་འཕེལ་རྒྱས་སུ་གཏོང་བ་དང་།ལུས་རྩལ་ཐོན་རྫས་དང་ཞབས་ཞུ་མཁོ་སྤྲོད་ཇེ་མང་དུ་གཏོང་རྒྱུ་ནི་མི་དམངས་མང་ཚོགས་ཀྱི་ལུས་ཕུང་ཇེ་བཟང་དུ་གཏོང་བ་དང་།དམངས་འཚོར་ཁག་ཐེག་དང་ལེགས་བཅོས་བྱེད་པའི་བྱ་བ་གཙོ་བོ་ཡིན་ལ།འཛད་སྤྱོད་ལ་ཡར་སྐུལ་གཏོང་བ་དང་།ནང་མཁོ་དང་ལས་ཞུགས་རྒྱ་བསྐྱེད་པ།དཔལ་འབྱོར་འཕེལ་རྒྱས་སུ་གཏོང་བ་བཅས་ཐད་ལའང་དོན་སྙིང་གལ་ཆེན་ལྡན་པར་སྙམ།
ཚོགས་ཐོག་ནས་ད་རུང་དོན་དག་གཞན་པར་ཞིབ་འཇུག་བྱས།  །