ཉེ་བའི་ལོ་འགའི་རིང་། མཚོ་སྔོན་ཞིང་ཆེན་གྱིས་སྲུང་སྐྱོང་ཁྲོད་གསར་སྤེལ་དང་གསར་སྤེལ་ཁྲོད་སྲུང་སྐྱོང་བྱེད་པའི་རྩ་དོན་རྒྱུན་འཁྱོངས་བྱས་ཏེ། ཡང་དག་པའི་སྒོ་ནས་གཏེར་ཁོངས་ཐོན་ཁུངས་སྔོག་འདོན་བེད་སྤྱོད་དང་རང་བྱུང་སྐྱེ་ཁམས་ཁོར་ཡུག་སྲུང་སྐྱོང་གི་འབྲེལ་བ་ཐག་གཅོད་བྱས་པ་དང་། སྐྱེ་ཁམས་སྲུང་སྐྱོང་དང་སྐྱེ་ཁམས་འཛུགས་སྐྲུན་མཉམ་དུ་གཙོར་འཛིན་པའི་རྩ་དོན་རྒྱུན་བསྐྱངས་ཤིང་། ཕྱོགས་ཡོངས་ནས་ཞིང་ཆེན་ཡོངས་ཀྱི་གཏེར་རི་ས་གཤིས་ཁོར་ཡུག་ལེགས་བཅོས་དང་སྐྱེ་ཁམས་སླར་གསོ་བྱ་བར་ཤུགས་བསྣན་ལ། མ་དངུལ་སྒོར་དུང་ཕྱུར6ལྷག་བཏང་ནས་གཏེར་ཁ་སྔོག་འདོན་ལས་ས་རྒོད་དུ་གྱུར་བ་མུའུ་ཁྲི15ལྷག་སླར་གསོ་བྱས་པས་དཔལ་འབྱོར་དང་སྤྱི་ཚོགས། ཁོར་ཡུག་མཐུན་སྦྱོར་ངང་འཕེལ་རྒྱས་སུ་གཏོང་བ་མངོན་འགྱུར་བྱེད་པར་ཕན་ནུས་ཐོན།

མཚོ་སྔོན་ཞིང་ཆེན་རྒྱལ་ཁོངས་ཐོན་ཁུངས་ཐིན་གྱིས་ཧུར་བརྩོན་གྱིས་རྒྱལ་ཁབ་མངའ་ཁོངས་ཐོན་ཁུངས་པུའུ་དང་ནོར་སྲིད་པུའུ་ལ་གཏེར་རི་ས་གཤིས་ཁོར་ཡུག་སླར་གསོ་ལེགས་བཅོས་བྱེད་པའི་ལས་གཞིའི་སྙན་ཞུ་ཕུལ་ཏེ་མ་དངུལ་བརྩོན་ལེན་བྱས། མཚོ་སྔོན་ཞིང་ཆེན་གྱིས2003ལོ་ནས་བཟུང་སྔོན་ཆད་ཀྱི་གཏེར་རིའི་ཁོར་ཡུག་ལེགས་བཅོས་བྱ་བ་སྒྲུབ་མགོ་བརྩམས་ཤིང་། 2010ལོའི་བར་དུ་ཀྲུང་དབྱང་དང་ཞིང་ཆེན་ནོར་སྲིད་ཀྱི་གཏེར་རི་ས་གཤིས་ཁོར་ཡུག་ལེགས་བཅོས་ཁ་གསབ་མ་དངུལ་སྒོར་ཁྲི55715.5བརྩོན་ལེན་བྱས་ནས་རྨ་འབྲི་རྫ་གསུམ་འབྱུང་ཡུལ་གྱི་གསེར་དང་བྱེ་མ་སྔོག་འདོན་ཁུལ་གྱི་གཏེར་རི་ས་གཤིས་ཁོར་ཡུག་སླར་གསོ་ལེགས་བཅོས་བྱས་པ་དང་། ས་གཤིས་སླར་གསོ་ལེགས་བཅོས་བྱས་པ་མུའུ་ཁྲི14ལ་སླེབས་ཡོད། 2011ལོའི་ལོ་མཇུག་ཏུ་ཡང་བསྐྱར་ཀྲུང་དབྱང་ནོར་སྲིད་ཁ་གསབ་མ་དངུལ་སྒོར་ཁྲི4500བརྩོན་ལེན་བྱས་ནས་རྨ་འབྲི་རྫ་གསུམ་འབྱུང་ཡུལ་ས་ཁུལ་དང་ཚྭ་འདམ་གཞོང་གི་འཁོར་རྒྱུག་དཔལ་འབྱོར་ཚོད་ལྟ་ཁུལ་གྱི་གཏེར་རི་ལེགས་བཅོས་བྱས་ཏེ། མུའུ10926ལ་ལེགས་བཅོས་བྱས།