རྒྱལ་སྲིད་སྤྱི་ཁྱབ་ཁང་གིས་རྒྱུན་ལས་གྲོས་ཚོགས་བསྡུས་ནས་རང་བྱུང་ནགས་ཀྱི་ཐོན་ཁུངས་ལ་སྲུང་སྐྱོབ་བྱེད་པའི་དུས་རིམ་གཉིས་པའི་བཟོ་སྐྲུན་ལག་བསྟར་བྱེད་རྒྱུའི་ཐག་བཅད་པ།
ཕྱུག་ལོ། མཚོ་སྔོན་བོད་སྐད་རླུང་འཕྲིན། 2010-12-30
རྒྱལ་སྲིད་སྤྱི་ཁྱབ་ཁང་གི་ཙུང་ལི་བུན་ཅ་པའོ་ཡིས་ཟླ་བཅུ་གཉིས་པའི་ཚེས་ཉེར་དགུ་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་པ་དང་། ཚོགས་ཐོག་ནས་རང་བྱུང་ནགས་ཀྱི་ཐོན་ཁུངས་ལ་སྲུང་སྐྱོབ་བྱེད་པའི་དུས་རིམ་གཉིས་པའི་བཟོ་སྐྲུན་ལག་བསྟར་བྱེད་རྒྱུའི་ཐག་བཅད།
ཚོགས་ཐོག་ནས་ཉིས་སྟོང་བཅུ་གཅིག་ལོ་ནས་ཉིས་སྟོང་ཉི་ཤུ་ལོའི་བར་རང་བྱུང་ནགས་ཀྱི་ཐོན་ཁུངས་ལ་སྲུང་སྐྱོབ་བྱེད་པའི་དུས་རིམ་གཉིས་པའི་བཟོ་སྐྲུན་ལག་བསྟར་བྱས་ཏེ། གསར་དུ་བྱུང་བའི་རང་བྱུང་ནགས་ཀྱི་རྒྱ་ཁྱོན་མུའུ་བྱེ་བ་བདུན་དང་ས་ཡ་བརྒྱད་ལ་བསླེབ་ཏུ་འཇུག་རྒྱུའི་ཐག་བཅད་པ་དང་། དེའི་བྱེད་ཐབས་གཙོ་བོ་ནི། གཅིག ནགས་ཚལ་ཐོན་ཁུངས་ཀྱི་སྲུང་སྐྱོབ་བྱེད་ཤུགས་ཇེ་ཆར་གཏོང་བ། གཉིས། ནགས་ཚལ་ཐོན་ཁུངས་རྒྱ་བསྐྱེད་ཤུགས་ཇེ་ཆེར་གཏོང་བ། གསུམ། ནགས་ཁུལ་གྱི་མང་ཚོགས་ཀྱི་འཚོ་བར་འགན་སྲུང་དང་ལེགས་བཅོས་ཆེན་པོ་བྱེད་པ་བཅས་ཡིན་ཞེས་བསྟན།