ཞིན་ཧྭ་གསར་འགྱུར་ཁང་ཧུའུ་ཧོ་ཧའོ་ཐེ་ནས་འབྱོར་བའི་གཏམ་གསར།ནང་སོག་རང་སྐྱོང་ལྗོངས་སྲིད་གཞུང་ནས་ཤེས་རྟོགས་བྱུང་དོན།ནང་སོག་རང་སྐྱོང་ལྗོངས་དེ་རྒྱལ་ཡོངས་ཀྱི་དེང་རབས་སྒྲིག་སྦྱོར་བཟོ་སྐྲུན་ལས་རིགས་ཀྱི་གནས་གཞི་འཛུགས་སྐྲུན་མགྱོགས་པོ་བྱེད་ཆེད།འབྲེལ་ཡོད་སྡེ་ཁག་གིས་《དེང་རབས་ཀྱི་སྒྲིག་སྦྱོར་བཟོ་སྐྲུན་ལས་རིགས་འཕེལ་རྒྱས་ཇེ་མགྱོགས་སུ་གཏོང་བར་སྔར་ལྷག་གིས་རྒྱབ་སྐྱོར་བྱ་རྒྱུའི་སྐོར་གྱི་བསམ་འཆར་དུ་མ》དངོས་སུ་བཏོན།ཁྲལ་བསྡུའི་མ་དངུལ་དང་ནོར་སྲིད་ཀྱིས་རྒྱབ་སྐྱོར།ས་ཞིང་བེད་སྤྱོད།ཐོན་ཁུངས་བཀོད་སྒྲིགལག་རྩལ་གསར་སྐྲུན།ཚོང་ར་ཁྱབ་གདལ།ཁོར་ཡུག་འཕེལ་རྒྱས་གཏོང་བ་སོགས་ཀྱི་ཐད་ལ་གྲོས་གཞི་དང་བྱེད་ཐབས་བཏོན་ནས་དེང་རབས་ཀྱི་སྒྲིག་སྦྱོར་བཟོ་སྐྲུན་བཟོ་ལས་རིགས་དེ་བས་ལེགས་པ་དང་དེ་ལས་མགྱོགས་པའི་སྒོ་ནས་འཕེལ་རྒྱས་ཡོང་བར་སྐུལ་འདེད་བྱས་པ་རེད།
    ཁྲལ་བསྡུའི་མ་དངུལ་གྱི་ཐད་ལ་མཚོན་ན།ནང་སོག་གི་བཟོ་ལས་སྡེ་ཁུལ་གཙོ་གནད་དང་བསྡུས་འདུས་ཁུལ་དུ་གསར་དུ་བསྐྲུན་ཞིང་ཐོན་ལས་འཕེལ་རྒྱས་གཏོང་བའི་ཁ་ཕྱོགས་དང་མཐུན་པའི་དེང་རབས་སྒྲིག་སྦྱོར་བཟོ་སྐྲུན་ལས་རིགས་ཀྱི་ཁེ་ལས་ནང་རྡོ་སོལ་དང་གཞན་པའི་ཐོན་ཁུངས་བཀོད་སྒྲིག་བྱེད་པའི་སྲིད་ཇུས་ལོངས་སུ་སྤྱད་པའི་ཁེ་ལས་ཕུད།ཐོན་སྐྱེད་བདག་གཉེར་གྱི་ཡོང་འབབ་དང་པོ་ཁྲལ་འཇལ་བའི་ལོ་འཁོར་ནས་བཟུང་ལོ་དང་པོ་ནས་ལོ་གཉིས་པའི་བར་རྣམ་གྲངས་ལག་ལེན་བསྟར་མཁན་ཁེ་ལས་ཐོབ་ཁྲལ་ནང་གི་ས་གནས་ཀྱི་མཉམ་སྤྱོད་བྱ་རྒྱུའི་ཆ་ཤས་དཔྱ་ཁྲལ་རྩ་ཆག་གཏང་རྒྱུ་ཡིན་པ།ལོ་གསུམ་པ་ནས་ལོ་ལྔ་པའི་བར་ཐོབ་ཁྲལ་གྱི་ཕྱེད་ཀ་དཔྱ་ཁྲལ་རྩ་ཆག་གཏང་རྒྱུ་ཡིན་པ་རེད།