རྒྱལ་ཡོངས་དམངས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བ་ཚེས་ཉེར་ལྔ་ཉིན་གྱི་ཕྱི་དྲོར་པེ་ཅིན་མི་དམངས་ཚོགས་ཁང་ཆེན་མོའི་ཚོགས་མགོ་བརྩམས་པ་དང་།ཨུ་ཡོན་ཀྲང་ཀྲང་ཏི་ཅང་གིས་གྲོས་ཚོགས་ལ་མགོ་འཛིན་མཛད།
ཚོགས་ཐོག་ནས་རྒྱལ་ཡོངས་དམངས་ཆེན་བཅའ་ཁྲིམས་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་གཞོན་པ་ཨན་ཅན་གྱིས་ཕུལ་བའི་སྔོན་རྩིས་བཅའ་ཁྲིམས་བཟོ་བཅོས་འཆར་ཟིན་གྲོས་གཞི་ལ་གྲོས་ཞིབ་བྱས་པའི་མཇུག་འབྲས་སྐོར་གྱི་སྙན་ཞུ་དང་རྒྱལ་ཡོངས་དམངས་ཆེན་བཅའ་ཁྲིམས་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་གཞོན་པ་ཀྲང་མེན་ཆི་ཡིས་ཕུལ་བའི་བདེ་འཇགས་ཐོན་སྐྱེད་བཅའ་ཁྲིམས་བཟོ་བཅོས་འཆར་ཟིན་གྲོས་གཞི་ལ་གྲོས་ཞིབ་བྱས་པའི་མཇུག་འབྲས་སྐོར་གྱི་སྙན་ཞུ་ལ་ཉན།
སྲིད་འཛིན་ཞུ་གཏུག་བཅའ་ཁྲིམས་བཟོ་བཅོས་འཆར་ཟིན་ལ་ཐོག་དང་པོར་གྲོས་ཞིབ་བྱས་རྗེས།རྒྱལ་ཡོངས་དམངས་ཆེན་བཅའ་ཁྲིམས་ཨུ་ཡོན་ལྷན་ཁང་གིས་རྒྱུན་ལས་ཨུ་ཡོན་ལྷན་ཁང་གི་ཁོངས་མི་དང་ཕྱོགས་སོ་སོའི་བསམ་འཆར་ལྟར་ཞིབ་འཇུག་དང་བཟོ་བཅོས་བྱས།ཚོགས་ཐོག་ནས་བཅའ་ཁྲིམས་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་གཞོན་པ་ལིས་ཧྲི་ཧྲི་ཡིས་ཕུལ་བའི་བཟོ་བཅོས་གནས་ཚུལ་སྐོར་གྱི་ཡར་ཞུ་ལ་ཉན།
ཁྲིམས་ལྟར་སྲིད་འཛིན་ཞིབ་བཤེར་ཆོག་འགོད་ལམ་ལུགས་བཅོས་སྒྱུར་དང་སྲིད་གཞུང་གི་འགན་ནུས་བསྒྱུར་བར་སྐུལ་འདེད་གཏོང་ཆེད།རྒྱལ་སྲིད་སྤྱི་ཁྱབ་ཁང་གི་མངག་བཅོལ་ལྟར་རྒྱལ་སྲིད་སྤྱི་ཁྱབ་ཁང་ཁྲིམས་ལུགས་གཞུང་སྒྲུབ་ཁང་གི་ཀྲུའུ་རིན་སུང་ཏ་ཧན་གྱིས་ཉེན་ཚབ་བཅའ་ཁྲིམས་སོགས་བཅའ་ཁྲིམས་ལྔའི་བཟོ་བཅོས་འཆར་ཟིན་སྐོར་ལ་གསལ་བཤད་བྱས།
རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཉིས་སྟོང་བཅུ་བཞི་ལོའི་ལྟ་རྟོག་བྱ་བའི་འཆར་གཞི་ལྟར།རྒྱུན་ལས་ཨུ་ཡོན་ལྷན་ཁང་ལག་བསྟར་ཞིབ་བཤེར་ཚན་ཁག་གིས་ནར་མ་སོན་པའི་བྱིས་པའི་སྲུང་སྐྱོབ་བཅའ་ཁྲིམས་དང་འབྲེལ་ཡོད་བཅའ་ཁྲིམས་གཏན་ཁེལ་ལག་བསྟར་གནས་ཚུལ་ལ་ཞིབ་བཤེར་བྱས།རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཝང་ཧྲིན་ཅོན་གྱིས་ཞིབ་བཤེར་ཚན་ཁག་གི་ཚབ་བྱས་ནས་གྲོས་ཚོགས་ལ་ཞིབ་བཤེར་གནས་ཚུལ་ཡར་ཞུ་བྱས།
ཚོགས་ཐོག་ནས་ད་དུང་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་འཐུས་མིའི་ཐོབ་ཐང་ཞིབ་བཤེར་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་མ་ཝུན་གྱིས་ཕུལ་བའི་འཐུས་མི་ཁ་ཤས་ཀྱི་འཐུས་མིའི་ཐོབ་ཐང་སྐོར་གྱི་སྙན་ཞུ་ལ་ཉན་པར་མ་ཟད་འབྲེལ་ཡོད་བསྐོ་འཐེན་གྲོས་གཞི་ལ་གྲོས་ཞིབ་བྱས།  །