ཞིན་ཧྭ་གསར་འགྱུར་ཁང་པེ་ཅིན་ནས་འབྱོར་བའི་གཏམ་གསར།རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་ཐོག་རྒྱལ་ཁབ་ཀྱི་ལས་ལམ་གསར་སྐྲུན་ལ་མ་དངུལ་གཏོང་འཇོག་བྱེད་པའི་སྣེ་ཁྲིད་མ་དངུལ་བསྣན་ཏེ་གསར་དར་ཐོན་ལས་འཕེལ་རྒྱས་ཡོང་བར་སྐུལ་འདེད་གཏང་རྒྱུའི་སྐོར་གྱི་བླང་བྱ་དོན་འཁྱོལ་བྱེད་ཆེད།ཀྲུང་དབྱང་ནོར་སྲིད་ཀྱིས་འཐབ་ཇུས་རང་བཞིན་གྱི་གསར་དར་ཐོན་ལས་སྤེལ་བར་ཆེད་སྤྱོད་མ་དངུལ་སྒོར་དུང་ཕྱུར20བཏང་ཐོག་ས་གནས་ཀྱི་སྲིད་གཞུང་དང་མཉམ་ལས་མ་རྐང་བཞག་སྟེ་སྤྱི་ཚོགས་ཐོག་གི་མ་དངུལ་གཏོང་འཇོག་བྱེད་མཁན་ནང་འགུགས་བྱས་ཏེ་ལས་ལམ་གསར་སྐྲུན་གྱི་མ་དངུལ་གཏོང་འཇོག་བྱེད་མཁན་གྱི་ཐེབས་རྩ49བཙུགས་ཡོད་པ་རེད།
    2009ལོར་རང་རྒྱལ་གྱིས་ལག་བསྟར་བྱེད་འགོ་ཚུགས་པའི་གསར་དར་ཐོན་ལས་གསར་སྐྲུན་བྱེད་པར་མ་དངུལ་གཏོང་འཇོག་བྱེད་པའི་འཆར་གཞི་དེ་ནི་ཀྲུང་དབྱང་ནོར་སྲིད་ཀྱིས་མ་རྐང་བཞག་སྟེ་ལས་ལམ་གསར་སྐྲུན་ལ་མ་དངུལ་གཏོང་འཇོག་བྱེད་པའི་བྱེད་སྟངས་སྤྱོད་ནས་དུས་རིམ་ཐོག་མ་དང་དུས་རིམ་བར་མའི་ལས་ལམ་གསར་སྐྲུན་བྱེད་པའི་ཁེ་ལས་འབྲིང་ཆུང་རིགས་ལ་མ་དངུལ་གཏོང་འཇོག་བྱས་ཡོད་ཅིང་།ལས་ལམ་གསར་སྐྲུན་གྱི་ཉེན་ཁ་འགན་བགོས་བྱེད་པ་དང་།གསར་སྐྲུན་དང་ལས་ལམ་གསར་སྐྲུན་བྱེད་མཁན་ལ་མ་དངུལ་གཏོང་འཇོག་བྱེད་མཁན་གྱི་ཡིད་ཆེས་མཐོ་རུ་གཏོང་བ།འཐབ་ཇུས་རང་བཞིན་གྱི་གསར་དར་ཐོན་ལས་འཕེལ་རྒྱས་ཡོང་བར་སྐུལ་འདེད་གཏོང་བའི་དོན་དུ་ཡིན་པ་རེད།
    མིག་སྔའི་སླེབས་སྐབས།ཀྲུང་དབྱང་ནོར་སྲིད་ཀྱིས་བསྡོམས་རྩིས་བྱས་ན་མ་དངུལ་སྒོར་དུང་ཕྱུར91བཀོད་སྒྲིག་བྱས་ཐོག་ས་གནས་ཀྱི་སྲིད་གཞུང་དང་སྤྱི་ཚོགས་ཀྱི་མ་དངུལ་སྒོར་དུང་ཕྱུར427ནང་འགུགས་དང་སྣེ་ཁྲིད་བྱས་ཏེ་ལས་ལམ་གསར་སྐྲུན་གྱི་མ་དངུལ་གཏོང་འཇོག་བྱེད་མཁན་ཐེབས་རྩ190བཙུགས་ཡོད་ཅིང་།གསར་དར་གྱི་ཁེ་ལས་མང་པོ་སྤེལ་བར་མ་དངུལ་གཏོང་འཇོག་བྱས་པས།ཁེ་ལས་ཆ་ཤས་ལས་རིགས་ཀྱི་སྣེ་ཁྲིད་ཁེ་ལས་སུ་གྱུར་བར་སྐུལ་འདེད་བཏང་ཡོད་ལ།ལས་ལམ་གསར་སྐྲུན་བྱེད་པར་སྐུལ་མ་གཏོང་བ་དང་དཔལ་འབྱོར་བརྟན་བརླིང་ངང་འཕར་སྣོན་ཡོང་བར་སྐུལ་འདེད་གཏོང་བར་གལ་ཆེའི་ནུས་པ་ཐོན་ཡོད་པ་རེད།