ཚེས24ཉིན་མ་དངུལ་སྒོར་ཁྲི7500ལོན་པའི་བོད་ཀྱི་ས་མཐོའི་བྱིས་པའི་བརྗོད་བྱ་གཙོ་བོའི་རོལ་རྩེད་གླིང་དང་པོའི་རྩིག་རྨང་འདིང་བའི་མཛད་སྒོ་དེ་ལྷ་སར་འཚོགས་ཤིང་།ལྷ་ས་གྲོང་ཁྱེར་སྣེའུ་ཁུལ་གསར་དུ་ཡོད་པའི་རྣམ་གྲངས་དེ་ཉིན་ཤས་གོང་འཛུགས་སྐྲུན་བྱེད་འགོ་ཚུགས་པ་དང་།ལས་གྲྭ་དེ་འཛུགས་སྐྲུན་བྱེད་པ་བརྒྱུད་བོད་དུ་བྱིས་པའི་རོལ་རྩེད་གླིང་ཆེ་གྲས་མེད་པའི་སྟོང་ཆ་ཁ་སྐོང་རྒྱུ་ཡིན་པ་རེད།

ངོ་སྤྲོད་བྱས་པར་གཞིགས་ན།བརྗོད་བྱ་གཙོ་བོའི་རོལ་རྩེད་གླིང་དེའི་མིང་ལ“ལྷ་ས་བདེ་སྐྱིད་ནོར་བུའི་བྱིས་པའི་བརྗོད་བྱ་གཙོ་བོའི་རོལ་རྩེད་གླིང”ཞེས་པ་འདོགས་རྒྱུ་གཏན་འཁེལ་བྱས་ཡོད་པ་དང་ས་བཟུང་ཚད་ཧ་ལམ་སྨི་གྲུ་བཞི་མ་ཁྲི2ལྷག་ཙམ་ཡིན་པ་དང་མ་དངུལ་སྒོར་ཁྲི7500ཙམ་ཡིན་པའི་ནང་ལྷ་ས་གྲོང་ཁྱེར་སྣེའུ་ཁུལ་གསར་གྲོང་ཁྱེར་མ་འཇོག་འཛུགས་སྐྲུན་འཕེལ་རྒྱས་ཚད་ཡོད་ཀུང་སིས་མ་དངུལ་སྒོར་ཁྲི2500དང་པེ་ཅིང་རྒྱལ་ས་ཡུལ་སྐོར་ཚོགས་པས་མ་དངུལ་སྒོར་ཁྲི2500་བཏང་བའི་ཁར་ལྷ་ས་གྲོང་ཁྱེར་གྱིས་པེ་ཅིང་གི་བོད་སྐྱོར་མ་དངུལ1‰ཁྲོད་ནས་སྒོར་ཁྲི2500བཀོད་སྒྲིག་བྱེད་རྒྱུ་ཡིན་པ་དང་།2013ལོའི་ཟླ་6ཚེས1ཉིན་དངོས་སུ་ཕྱི་ཕྱོགས་སུ་ལས་གཉེར་བྱེད་རྩིས་ཡོད་ལ་སྔོན་དཔག་བྱས་ན་ལོ་རེར་ཡུལ་སྐོར་བ་མི་ཐེངས་ཁྲི10ལ་སྣེ་ལེན་ཞུ་རྒྱུ་ཡིན་པ་རེད།

བདེ་སྐྱིད་ནོར་བུའི་བྱིས་པའི་རོལ་རྩེད་གླིང་ནི་གཞོན་ནུ་ལོ་ཆུང་ལ་ཁ་ཕྱོགས་ཤིང་ཡུལ་སྐོར་བ་དར་མར་ཡང་སྣེ་ལེན་བྱེད་པའི་དེང་རབས་ཅན་གྱི་གྲོང་ཁྱེར་གྱི་སྤྲོ་གསེང་རྣམ་གྲངས་ཤིག་ཡིན།གླིང་ཁུལ་གྱི་ཇུས་འགོད་འཆར་གཞི་ལྟར་སྤྲོ་གསེང་རྣམ་གྲངས་ཀྱིས་ས་མཐོའི་གནམ་གཤིས་ཀྱི་ཁྱད་ཆོས་དང་ཡུལ་སྐོར་བའི་ལུས་ཁམས་ཁྱད་ཆོས་ལ་གཞིགས་ཏེ་མཁར་སྙེག་འཁོར་ལོ་དང་སྐོར་རྒྱག་ཤིང་རྟ།མཚོ་ཇག་གྲུ་གཟིངས་སོགས་སྤྲོ་གསེང་རྣམ་གྲངས་ཆེ་གྲས་དང་དེ་བཞིན་ཤུད་སྐས་དང་།ཇིང་ཏ་ལིང་ཏ།བྱེ་རྫིང་སོགས་སྒྲིག་སྦྱོར་བྱས་ཡོད་པ་དང་།ལྷ་སའི་དགུན་ཁའི་གནམ་གཤིས་ཀྱི་ཁྱད་ཆོས་དང་འཚམ་ཕྱིར་གཞོན་ནུ་ལོ་ཆུང་དགུན་ཁའི་སྤྲོ་གསེང་ལ་འཚམ་པའི་སྤྲོ་གསེང་ཁང་ཡང་འཆར་འགོད་བྱས་ཡོད་པའི་ནང་གདོང་ཐུག་འཁོར་རིགས་དང་།སྦལ་མཆོང་།གློག་སྒུལ་རྩེད་ཆས་སོགས་རོལ་རྩེད་རྣམ་གྲངས་སྒྲིག་སྦྱོར་བྱས་ཡོད་པ་དང་།ཁང་པ་དེ་ད་དུང་གཞོན་ནུ་ལོ་ཆུང་གི་རོལ་དབྱངས་དང་།ཞབས་བྲོ།རི་མོ་སོགས་སློབ་གསེང་གི་རིག་གནས་བྱེད་སྒོ་སྤེལ་རྒྱུའི་ཐད་ཀྱང་སྤྱོད་རྒྱུ་ཡིན་པ་རེད།

གཞན་ཡང་གླིང་ཁུལ་ནང་དུ་ཉི་ནུས་འོད་ཕུའུ་གློག་འདོན་མ་ལག་འཛུགས་སྐྲུན་བྱེད་རྒྱུ་ཡིན་པ་མ་ཟད་ཁོར་ཡུག་སྲུང་སྐྱོང་དང་ནུས་རྒྱུ་གྲོན་ཆུང་གི་འཛུགས་སྐྲུན་རྒྱུ་ཆ་དང་ཨར་ལས་བཟོ་རྩལ་གསར་པ་འབོར་ཆེན་སྤྱད་དེ་གླིང་ཁུལ་དེ་ལྗང་མདོག་དང་།ཁོར་ཡུག་སྲུང་སྐྱོང་།ཟད་གྲོན་ཉུང་བ་བཅས་ཀྱི་རྣམ་གྲངས་ཤིག་ཏུ་འཛུགས་སྐྲུན་བྱེད་རྒྱུ་ཡིན་པ་རེད།  །

ཟླ5བའི་ཚེས24ཉིན་བོད་ཀྱི་དེང་རབས་ཅན་གྱི་བྱིས་པའི་རོལ་རྩེད་གླིང་ཆེ་གྲས་དང་པོ་སྟེ་ལྷ་ས་གྲོང་ཁྱེར་བདེ་སྐྱིད་ནོར་བུའི་བྱིས་པའི་རོལ་རྩེད་གླིང་འཛུགས་སྐྲུན་བྱེད་འགོ་ཚུགས་ཤིང་།རོལ་རྩེད་གླིང་དེ་ནི་ལྷ་ས་མེ་འཁོར་བབས་ཚུགས་ཁ་གཏད་ཀྱི་སྐྱིད་ཆུའི་ངོགས་སུ་ཆགས་ཡོད་ལ་རྣམ་གྲངས་ཀྱི་མ་དངུལ་སྒོར་ཁྲི7500དང་འཛུགས་སྐྲུན་རྒྱ་ཁྱོན་སྨི་གྲུ་བཞི་མ4281.82ཡིན་པ་དེ2013ལོའི“དྲུག་གཅིག”བྱིས་པའི་དུས་ཆེན་སྐབས་དངོས་སུ་ལས་གཉེར་བྱེད་རྩིས་ཡོད་ཅིང་།ཟླ་5ཚེས་24ཉིན་ལྷ་ས་གྲོང་ཁྱེར་བདེ་སྐྱིད་ནོར་བུའི་བྱིས་པའི་རོལ་རྩེད་གླིང་གིས་རྩིག་རྨང་འདིང་བའི་མཛད་སྒོ་འཚོགས་པ།  །