ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ11པའི་ཚེས18ཉིན་འབྱོར་བའི་གཏམ་གསར།ནོར་སྲིད་པུའུ་ཡིས་གོང་ཚེས་ཉིན་ཁྱབ་བསྒྲགས་བྱས་པར་གཞིགས་ན།《རྒྱལ་ཁབ་ཀྱི་དུས་ཡུན་རིང་འབྲིང་གི་སློབ་གསོ་བཅོས་བསྒྱུར་དང་འཕེལ་རྒྱས་འཆར་འགོད་རྩ་འཛིན།》（2010ལོ་ནས་2020ལོའི་བར）དེ་དོན་འཁྱོལ་མཐར་ཕྱིན་པ་བྱེད་ཆེད།ད་ལོ་ནས་བཟུང་།ཀྲུང་དབྱང་ནོར་སྲིད་ཀྱིས་སྔར་ལྷག་གིས་ཞིང་སྡེའི་འོས་འགན་སློབ་གསོའི་གྲོན་དངུལ་འགན་སྲུང་ནང་རྐྱེན་འཐུས་སྒོ་ཚང་དུ་བཏང་ནས་མུ་མཐུད་ནས་འཇོག་ཤུགས་ཆེ་རུ་བཏང་བ།ལོ་དེར་འོག་རིམ་དུ་སྒོར་དུང་ཕྱུར635.2གཏོང་སྤྲོད་བྱས་པའི་རྨང་གཞིའི་ཐོག་ཉེ་ཆར་ཡང་དུ་སྒོར་དུང་ཕྱུར105གསར་སྣོན་བྱས་ནས་ཞིང་སྡེའི་འོས་འགན་སློབ་གསོའི་གྲོན་དངུལ་འགན་སྲུང་ཆུ་ཚད་སྔར་ལས་ལྷག་པར་མཐོ་རུ་གཏོང་དགོས།
ནོར་སྲིད་པུའུ་ཡིས་བསྟན་དོན།གསར་སྣོན་པའི་མ་དངུལ་དེ་རིགས་གཙོ་བོར་ཕྱོགས་གཉིས་ཐད་ལ་སྤྱོད་དགོས་པ་སྟེ།གཅིག་ནི2010ལོ་ནས་བཟུང་ཞིང་སྡེའི་འོས་འགན་སློབ་གསོ་དུས་རིམ་གྱི་སློབ་མ་ཚང་མར་སྤྱི་སྤྱོད་གྲོན་དངུལ་རྩ་བའི་ཚད་ལྡན་སྒོར100མཐོ་རུ་གཏོང་བ།དེ་ནས་ཤར་རྒྱུད་ས་ཁུལ་གྱི་སློབ་ཆུང་སློབ་མ་རེར་ལོ་རེར་སྒོར450དང་འབྲིང་རིམ་སློབ་མ་སྒོར650།དབུས་ནུབ་རྒྱུད་ས་ཁུལ་གྱི་སློབ་ཆུང་སློབ་མར་སྒོར400དང་སློབ་འབྲིང་ལ་སྒོར600ཐོག་སླེབས་རྒྱུ་རེད།
གཉིས་ནི2010ལོ་ནས་བཟུང་དབུས་ནུས་རྒྱུད་ས་ཁུལ་གྱི་ཞིང་སྡེའི་འོས་འགན་སློབ་གསོ་བྱེད་རིམ་གྱི་དཀའ་ངལ་ཡོད་པའི་ཁྱིམ་ཚང་གི་ཞག་སྡོད་སློབ་མའི་འཚོ་བའི་གྲོན་དངུལ་མི་རེར་ཉིན་རེར་སྒོར1བསྣན་ཏེ་ལོ་རེར་སློབ་ཆུང་སློབ་མར་སྒོར750དང་སློབ་འབྲིང་སློབ་མར་སྒོར1000ཐོག་སླེབས་རྒྱུ་རེད།དེར་བརྟེན་ཀྲུང་དབྱང་ནོར་སྲིད་ཀྱིས་གྲོན་དངུལ་སྒོར་དུང་ཕྱུར་གསར་སྣོན་བྱས་ནས་དབུས་ནུབ་རྒྱུད་ས་ཁུལ་གྱི་ཞག་སྡོད་སློབ་མ་ཁྲི1225ལ་རོགས་དངུལ་ཐོབ་རྒྱུ་བཅས་རེད།